Ɛfishians 2:1-22
2 Pantap dat, Gɔd gi una layf pan ɔl we una sin dɛn bin dɔn mek una day.
2 Tɛm bin de we una bin de liv di we aw pipul dɛn na di wɔl* de liv, di we aw di wan we de rul di briz want. Na in de rul di spirit we de wok insay pipul dɛn we nɔ de obe.
3 Tɛm bin de we wi ɔl bin de du tin di we aw di bɔdi want jɔs lɛk dɛn; wi bin de du wetin di bɔdi want ɛn wetin wi bin de tink bɔt; ɛn frɔm we dɛn bɔn wi, Gɔd fit fɔ vɛks pan wi jɔs lɛk di ɔda wan dɛn.
4 Bɔt bikɔs Gɔd na pɔsin we rili gɛt sɔri-at ɛn i lɛk wi pasmak,
5 i dɔn gi wi layf wit Krays, pan ɔl we wi sin dɛn bin dɔn mek wi day—Gɔd in spɛshal gudnɛs* dɔn sev una.
6 Pantap dat, i dɔn es wi ɔp togɛda ɛn mek wi sidɔm togɛda na di ples dɛn na ɛvin bikɔs wi gɛt wanwɔd wit Krays Jizɔs,
7 so dat insay di difrɛn tɛm* dɛn we gɛt fɔ kam, i go sho in spɛshal gudnɛs* we rili bɔku we i du gud tin dɛn fɔ wi we gɛt wanwɔd wit Krays Jizɔs.
8 Dis spɛshal gudnɛs* dɔn mek una sev bikɔs una gɛt fet, nɔto bay una yon pawa, bɔt na Gɔd in gift.
9 Nɔto bikɔs ɔf di tin dɛn we una du, so dat nɔbɔdi nɔ go gɛt rizin fɔ bost.
10 Wi na sɔntin we Gɔd mek wit in an, ɛn i mek wi tru di wanwɔd we wi gɛt wit Krays Jizɔs fɔ du gud wok dɛn we I bin dɔn arenj bifo tɛm fɔ mek wi du.
11 So una, we na pipul dɛn we kɔmɔt na ɔda neshɔn dɛn, fɔ mɛmba se tɛm bin de we pipul dɛn we mɔtalman “sakɔmsayz” bin de kɔl una pipul dɛn we “nɔ sakɔmsayz.”
12 Da tɛm de, una nɔ bin no Krays, una nɔ bin gɛt natin fɔ du wit di Izrɛl neshɔn, una nɔ bin de pan di agrimɛnt dɛn we gɛt fɔ du wit di prɔmis, una nɔ bin gɛt op, ɛn una nɔ bin no Gɔd na di wɔl.
13 Bɔt naw we una dɔn gɛt wanwɔd wit Krays Jizɔs, una we bin de fa dɔn kam nia bikɔs ɔf Krays in blɔd.
14 Na in na wi pis, na in mek di tu grup dɛn bi wan ɛn brok di fɛns we bin de midul dɛn.
15 I yuz in bɔdi fɔ pul di tin we bin mek dɛn bi ɛnimi, dat na di Lɔ, so dat i go mek di tu grup dɛn we gɛt wanwɔd wit am bi nyu pɔsin ɛn fɔ mek pis,
16 ɛn i yuz di tik we i sɔfa pan* fɔ mek di tu grup dɛn rili gɛt pis wit Gɔd so dat di tu grup dɛn go bi wan bɔdi, bikɔs i yuz in bɔdi fɔ kil di tin we bin mek dɛn bi ɛnimi.
17 Ɛn i kam ɛn prich di gud nyuz bɔt pis to una we bin de fa ɛn to di wan dɛn we de nia,
18 bikɔs wi we na di tu grup dɛn, dɔn ebul fɔ go bifo di Papa tru am, bikɔs wi ɔl gɛt wan spirit.
19 So una nɔto strenja ɛn fɔrina dɛn igen, una na sitizin dɛn wit di oli wan dɛn, ɛn una de na Gɔd in famili,
20 ɛn i dɔn bil una pan di fawndeshɔn, dat na di apɔsul dɛn ɛn prɔfɛt dɛn, ɛn Krays Jizɔs insɛf sɛf na di ston we de na di kɔna na di fawndeshɔn.
21 Di wan ol bildin we gɛt wanwɔd wit am ɛn we di pat dɛn jɔyn togɛda fayn fayn wan, de tɔn to oli tɛmpul fɔ Jiova.*
22 Bikɔs una gɛt wanwɔd wit am, Gɔd dɔn mek unasɛf bi wan os we i de insay, bikɔs in spirit de de.
Futnot Dɛn
^ Ɔ “dis tɛm na dis wɔl.” Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
^ Rid Baybul Wɔd dɛn Minin.
