1 Timoti 5:1-25
5 Nɔ tɔk ash wan pan man we dɔn ol. Bifo dat, tɔk to am fayn lɛk se na yu papa, tɔk to yɔŋman dɛn lɛk se na yu brɔda dɛn,
2 tɔk to uman dɛn we dɔn ol lɛk se na yu mama dɛn, tɔk to yɔŋuman dɛn lɛk se na yu sista dɛn, biev di rayt we to dɛn.
3 Ɔnɔ uman dɛn we dɛn man dɔn day ɛn we nɔ gɛt pɔsin fɔ ɛp dɛn.
4 Bɔt if ɛni uman we in man dɔn day, gɛt pikin dɛn ɔ granpikin dɛn, mek dɛn lan fɔs aw fɔ fetful to Gɔd na dɛn os ɛn gi dɛn mama ɛn papa dɛn ɛn grani ɛn granpa dɛn wetin dɛn fɔ gɛt, bikɔs dis na sɔntin we fayn na Gɔd in yay.
5 Di uman we in man dɔn day ɛn we nɔ gɛt pɔsin fɔ ɛp am ɛn we nɔ gɛt natin dɔn abop pan Gɔd, ɛn i de kɔntinyu fɔ rili beg Gɔd ɛn pre de ɛn nɛt.
6 Bɔt di wan we jɔs de nɔmɔ fɔ ɛnjɔy insɛf dɔn day pan ɔl we i de liv.
7 So kɔntinyu fɔ tɛl dɛn fɔ de du dɛn tin ya, so dat dɛn nɔ go fɛn fɔlt pan dɛn.
8 Fɔ tru, if ɛnibɔdi nɔ gi di wan dɛn we na in yon wetin dɛn nid, mɔ di wan dɛn we de na in os, i dɔn lɛf fɔ biliv wetin wi biliv, ɛn i wɔs pas pɔsin we nɔ gɛt fet.
9 Put ɛni uman we in man dɔn day, in nem na di list if i dɔn 60 ia ɔ i dɔn pas, if na wan man i bin gɛt,
10 if dɛn sabi am as pɔsin we de du gud tin dɛn, if i bin mɛn pikin dɛn, if i bin lɛk strenja dɛn, if i bin was di oli wan dɛn fut, if i bin de ɛp di wan dɛn we bin de sɔfa, if i bin de yuz in tɛm fɔ du ɔlkayn gud tin.
11 Bɔt nɔ put yɔŋuman dɛn we dɛn man dɔn day, na di list, bikɔs we di filin fɔ du mami ɛn dadi biznɛs kam bitwin dɛn ɛn Krays, dɛn kin want fɔ mared.
12 Ɛn dɛn go briŋ jɔjmɛnt pan dɛnsɛf bikɔs dɛn dɔn lɛf di fɔs we aw dɛn sho se dɛn gɛt fet.*
13 Dɔn dɛn de mek am abit fɔ de aydul wan, dɛn de go frɔm os to os; ɛn dɛn nɔ kin jɔs de aydul wan nɔmɔ, bɔt dɛn kin kongosa bak ɛn put mɔt pan ɔda pipul dɛn biznɛs ɛn tɔk bɔt tin dɛn we dɛn nɔ fɔ tɔk bɔt.
14 So a want lɛ di yɔŋuman dɛn we dɛn man dɔn day, mared, bɔn pikin dɛn, tek kia ɔf di wan we de na dɛn os, ɛn dɛn nɔ fɔ gi di wan we de agens wi ɛni chans fɔ tɔk bad bɔt wi.
15 Infakt, sɔm dɔn ɔlrɛdi tɔn fɔ fala Setan.
16 If ɛni uman we biliv di Masta gɛt fambul dɛn we dɛn man dɛn dɔn day, lɛ i ɛp dɛn so dat ɛvi lod nɔ go de na di kɔngrigeshɔn in ed. Dɔn di kɔngrigeshɔn go ɛp di uman dɛn we dɛn man dɔn day ɛn we nɔ gɛt ɛnibɔdi fɔ ɛp dɛn.
17 Lɛ ɔlman rili ɔnɔ di ɛlda dɛn we de du dɛn wok fayn wan, mɔ di wan dɛn we de wok tranga wan we i kam pan di we aw dɛn de tɔk ɛn tich.
18 Di skripchɔ se, “We kaw de mas mas wit* fɔ pul di chafchaf, yu nɔ fɔ kɔba in mɔt,” dɔn i tɔk bak se, “Di wokman fit fɔ gɛt in pe.”
19 Nɔ du ɛnitin if pɔsin se man we dɔn ol* dɔn du bad tin, pas nɔmɔ if tu ɔ tri witnɛs dɛn tɔk am.
20 Na bifo ɔlman yu fɔ kɔrɛkt di wan dɛn we dɔn mek am abit fɔ de sin, fɔ lɛ i bi wɔnin to di ɔda wan dɛn.*
21 A de tɛl yu bifo Gɔd ɛn Krays Jizɔs ɛn di enjɛl dɛn we Gɔd dɔn pik, fɔ mek yu du dɛn tin ya, bɔt yu nɔ fɔ disayd bifo yu no di tru ɔ tek wan pɔsin bɛtɛ pas ɔda pɔsin.
22 Nɔ ɛva le yu an kwik kwik wan pan ɛni man;* ɔ jɔyn pan ɔda pipul dɛn sin; kɔntinyu fɔ liv klin layf.
23 Nɔ drink wata igen;* drink smɔl wayn bikɔs ɔf yu bɛlɛ ɛn di sik we yu de sik fast fast.
24 Ɔlman kin no bɔt sɔm pipul dɛn sin, we kin mek dɛn jɔj dɛn wantɛm wantɛm, bɔt ɔda pipul dɛn yon, na leta i kin kɔmɔt na do.
25 Semweso, ɔlman kin no bɔt di gud tin dɛn we pipul dɛn kin du, bɔt ivin di wan dɛn we ɔlman nɔ kin no, nɔ kin ayd.
Futnot Dɛn
^ Ɔ “nɔ du wetin dɛn bin prɔmis.”
^ Wit na tin we pipul dɛn de it.
^ Ɔ “ɛlda.”
^ Insay Grik, “so dat di ɔda wan dɛn go fred.”
^ Dat na, nɔ pik ɛni man kwik kwik wan.
^ Ɔ “Lɛf fɔ drink wata nɔmɔ.”
