Emɔs 7:1-17
7 Dis na wetin Jiova we na di Masta We De Rul Ɔlman sho mi: I mek grasɔpa* dɛn kam di tɛm we di las plant dɛn* de bigin fɔ gro. Dis na bin di las plant afta dɛn bin dɔn kɔt di kiŋ in dray gras dɛn.
2 We di grasɔpa* dɛn dɔn dɔn fɔ it di plant dɛn na di land, a tɔk se: “E Jiova we na di Masta We De Rul Ɔlman, duya fɔgiv! Aw Jekɔp go liv?* I nɔ gɛt trɛnk!”
3 So Jiova chenj in maynd bɔt* dis. Jiova tɔk se, “I nɔ go apin.”
4 Dis na wetin Jiova we na di Masta We De Rul Ɔlman sho mi: Jiova we na di Masta We De Rul Ɔlman briŋ faya as pɔnishmɛnt. Di faya bɔn di dip dip wata dɛn, ɛn i bɔn sɔm pat dɛn na di land.
5 Dɔn a tɔk se: “E Jiova we na di Masta We De Rul Ɔlman, duya mek dis stɔp. Aw Jekɔp go liv?* I nɔ gɛt trɛnk!”
6 So Jiova chenj in maynd bɔt* dis. Jiova we na di Masta We De Rul Ɔlman tɔk se, “Dande bak nɔ go apin.”
7 Dis na wetin i sho mi: Luk! Jiova bin tinap na wan wɔl we dɛn mek wit plɔm layn,* ɛn i bin ol plɔm layn* na in an.
8 Dɔn Jiova aks mi se: “Emɔs, wetin yu de si?” So a ansa se: “A de si plɔm layn.”* Dɔn Jiova se: “A de put di plɔm layn* midul mi pipul dɛn na Izrɛl. A nɔ go sɔri fɔ dɛn igen.
9 Di pipul dɛn nɔ go de go na Ayzak in ay ples dɛn, ɛn dɛn go pwɛl pwɛl di tɛmpul dɛn na Izrɛl. Dɔn a go atak Jɛroboam in famili wit sɔd.”
10 Amazaya di prist na Bɛtɛl sɛn dis mɛsej to Kiŋ Jɛroboam na Izrɛl se: “Emɔs de plan agens yu rayt insay Izrɛl. Di pipul dɛn na di land nɔ ebul bia ɔl wetin i de tɔk.
11 Dis na wetin Emɔs se, ‘Dɛn go kil Jɛroboam wit sɔd, ɛn dɛn go mɔs pul Izrɛl kɔmɔt na in land ɛn kɛr am go na ɔda land.’”
12 Dɔn Amazaya tɛl Emɔs se: “E pɔsin we de si vishɔn, rɔnawe go Juda, go fɛn tin fɔ it* de, ɛn na de yu go prɔfɛsay.
13 Bɔt yu nɔ fɔ prɔfɛsay na Bɛtɛl igen, bikɔs na kiŋ in tɛmpul ɛn na frɔm de di kiŋ de rul.”
14 Dɔn Emɔs tɛl Amazaya se: “Mi nɔto bin prɔfɛt ɛn mi papa nɔto bin prɔfɛt, bɔt mi na bin shɛpad ɛn a bin de kia fɔ sikamɔ fig stik dɛn.
15 Bɔt Jiova mek a lɛf fɔ kia fɔ ship dɛn, ɛn Jiova tɛl mi se, ‘Go, prɔfɛsay to di Izrɛlayt dɛn we na mi pipul dɛn.’
16 So naw yɛri wetin Jiova se, ‘Yu de tɛl mi se, “Nɔ prɔfɛsay agens Izrɛl, ɛn nɔ prich agens Ayzak in famili.”
17 So dis na wetin Jiova se: “Yu wɛf go bi raregal na di siti, ɛn dɛn go kil yu bɔypikin dɛn ɛn yu galpikin dɛn wit sɔd. Dɛn go sheb yu land wit rop we dɛn de tek mɛzhɔ, ɛn yu go day na land we nɔ klin; dɛn go mɔs pul Izrɛl kɔmɔt na in land ɛn kɛr am go na ɔda land.”’”
Futnot Dɛn
^ Ɔ “lokɔs.”
^ Dat na, insay Janwari ɛn Fɛbwari.
^ Ɔ “lokɔs.”
^ Insay Ibru, “grap?”
^ Ɔ “rigrɛt.”
^ Insay Ibru, “grap?”
^ Ɔ “rigrɛt.”
^ Dis na rop we dɛn tay mɛtal, ston, ɔ kle na di ɛj ɛn we dɛn kin yuz fɔ chɛk if sɔntin stret.
^ Dis na rop we dɛn tay mɛtal, ston, ɔ kle na di ɛj ɛn we dɛn kin yuz fɔ chɛk if sɔntin stret.
^ Dis na rop we dɛn tay mɛtal, ston, ɔ kle na di ɛj ɛn we dɛn kin yuz fɔ chɛk if sɔntin stret.
^ Dis na rop we dɛn tay mɛtal, ston, ɔ kle na di ɛj ɛn we dɛn kin yuz fɔ chɛk if sɔntin stret.
^ Insay Ibru, “go it bred.”
