Matyu 28:1-20
28 Di fɔs de insay di wik* afta di Sabat, we di ples bigin fɔ brayt, Meri Magdalin ɛn di ɔda Meri kam fɔ wach di grev.
2 Wan bad bad atkwek bin dɔn apin bikɔs Jiova* in enjɛl kɔmɔt na ɛvin ɛn kam rol di ston kɔmɔt ɛn sidɔm pan am.
3 Di enjɛl bin tan lɛk laytin ɛn in klos bin wayt lɛk sno.
4 Di wachman dɛn bin so fred am dat dɛn trimbul, ɛn i bin tan lɛk se dɛn dɔn day.
5 Bɔt di enjɛl tɛl di uman dɛn se: “Una nɔ fred, a no se una de luk fɔ Jizɔs we dɛn bin kil na di tik.
6 I nɔ de ya. I dɔn gɛt layf bak, jɔs lɛk aw i bin se. Una kam, luk di ples usay dɛn bin le am.
7 Una go kwik kwik wan ɛn tɛl in disaypul dɛn se i dɔn gɛt layf bak. I de go bifo una na Galili. Una go si am de. Una mɛmba wetin a dɔn tɛl una.”
8 So wantɛm wantɛm, dɛn lɛf di grev. Dɛn bin de fred bɔt dɛn bin rili gladi, ɛn dɛn rɔn fɔ go tɛl in disaypul dɛn.
9 Na de Jizɔs mit dɛn ɛn grit dɛn. Dɛn go nia am ɛn tɔch in fut ɛn sho am rɛspɛkt.*
10 Jizɔs tɛl dɛn se: “Una nɔ fred! Una go tɛl mi brɔda dɛn so dat dɛn go go na Galili; na de dɛn go si mi.”
11 As dɛn de go, sɔm pan di gaydman dɛn go na di siti ɛn tɛl di edman dɛn fɔ di prist dɛn ɔl wetin apin.
12 Ɛn afta dɛn dɔn ɛng ed wit di lida dɛn, dɛn gi di sojaman dɛn bɔku silva mɔni
13 ɛn tɛl dɛn se: “Una tɔk se, ‘In disaypul dɛn kam na nɛt ɛn tif am we wi de slip.’
14 If di gɔvnɔ yɛri bɔt dis, una nɔ wɔri, wi go ɛksplen wetin apin to am.”*
15 So dɛn tek di silva mɔni dɛn ɛn du wetin dɛn tɛl dɛn, ɛn dis stori dɔn skata to di Ju dɛn te tide.
16 Bɔt di 11 disaypul dɛn go na Galili na di mawntin usay Jizɔs bin dɔn tɛl dɛn fɔ go.
17 We dɛn si am, dɛn sho am rɛspɛkt,* bɔt sɔm dɛn dawt.
18 Jizɔs go nia dɛn ɛn tɛl dɛn se: “Gɔd dɔn put mi oba ɔltin na ɛvin ɛn na dis wɔl.
19 So, una go ɛn mek pipul dɛn bi mi disaypul na ɔl di neshɔn dɛn. Una baptayz dɛn insay di Papa in nem, di Pikin in nem, ɛn di oli spirit in nem.
20 Una tich dɛn fɔ du ɔl di tin dɛn we a dɔn tɛl una. A de wit una ɔltɛm te di tɛm want fɔ dɔn.”*
Futnot Dɛn
^ Dis na di de we wi de kɔl Sɔnde. To di Ju dɛn, Sɔnde na di fɔs de insay di wik.
^ Rid Baybul Wɔd dɛn Minin.
^ Ɔ “butu bifo am.”
^ Insay Grik, “mek i biliv.”
^ Ɔ “butu bifo am.”
^ Rid Baybul Wɔd dɛn Minin.
