LƐSIN 3
Na Frɔm Udat di Gud Nyuz Kɔmɔt?
1. Na udat rayt di Baybul?
Di gud nyuz fɔ se pipul dɛn go de sote go na dis wɔl, de na di Baybul. (Sam 37:29) Na 66 smɔl smɔl buk dɛn de insay di Baybul. Gɔd yuz 40 man dɛn fɔ rayt dɛn buk ya. Na Mozis rayt di fɔs fayv buk dɛn na di Baybul. I dɔn pas 3,500 ia frɔm we i rayt dɛn. Na Apɔsul Jɔn rayt di las buk na di Baybul. I dɔn pas 1,900 ia frɔm we i rayt am. Na udat tɛl di wan dɛn we rayt di Baybul wetin fɔ rayt? Gɔd yuz in oli spirit fɔ tɛl dɛn wetin fɔ rayt. (2 Samiɛl 23:2) Dɛn nɔ rayt wetin dɛn tink, bɔt na wetin Gɔd tɛl dɛn fɔ rayt na in dɛn rayt. So na Jiova rayt di Baybul.—Rid Sɛkɛn Lɛta To Timoti 3:16; Pita In Sɛkɛn Lɛta 1:20, 21.
Wach di fim we gɛt di taytul: Udat in Wɔd De Insay di Baybul?
2. Wetin mek wi biliv se di tin dɛn we de na di Baybul na tru?
Wi no se na Gɔd rayt di Baybul bikɔs di Baybul de sho wi wetin gɛt fɔ apin tumara bambay. No mɔtalman nɔ ebul du dat. (Jɔshwa 23:14) Na Gɔd nɔmɔ ebul fɔ tɛl wi wetin go apin tumara bambay.—Rid Ayzaya 42:9; 46:10.
Di Baybul difrɛn frɔm ɔda buk dɛn bikɔs na Gɔd rayt am. Dɛn dɔn rayt di Baybul insay bɔku bɔku langwej dɛn. Di Baybul gri wit wetin tru tru sayɛns se, pan ɔl we i dɔn te we dɛn rayt am. Ɔltin we di 40 man dɛn rayt na di Baybul, gri. Dis nɔ se wan tin dɔn di ɔda wan se difrɛn tin. * Nɔto dat nɔmɔ, di Baybul de sho wi se Gɔd lɛk wi ɛn i de mek pipul dɛn de chenj dɛn layf. Na ɔl dis mek bɔku pipul dɛn biliv se na Gɔd rayt di Baybul.—Rid Fɔs Lɛta Fɔ Tɛsalonayka 2:13.
Wach di fim we gɛt di taytul: Aw Wi Go No fɔ se Wetin di Baybul De Tɔk na Tru?
3. Wetin di Baybul de tɔk bɔt?
Di men tin we di Baybul de tɔk bɔt na dat, Gɔd gɛt gud tin we i want du fɔ mɔtalman. Di Baybul de sho wetin mek di wɔl nɔto Paradays naw ɛn aw di wɔl go bi Paradays tumara bambay.—Rid Rɛvɛleshɔn 21:4, 5.
Gɔd in Wɔd gɛt lɔ ɛn advays dɛn. Pantap dat, i de sho aw Gɔd bin de trit pipul dɛn trade. Ɛn dis go ɛp yu fɔ no uskayn pɔsin Gɔd bi. So, di Baybul go ɛp yu fɔ no Gɔd. I go sho yu aw yu go bi Gɔd in padi.—Rid Sam 19:7, 11; Jems 2:23; 4:8.
4. Aw yu go ebul ɔndastand di Baybul?
Dis buk go ɛp yu fɔ ɔndastand di Baybul bikɔs i de falamakata di we aw Jizɔs bin de tich. Jizɔs bin de kot difrɛn difrɛn say dɛn na di Baybul ɛn ɛksplen “wetin dɛn rayt” de.—Rid Lyuk 24:27, 45.
Di gud nyuz we Gɔd gɛt fɔ wi fayn pas ɛni ɔda tin. Bɔt sɔm pipul dɛn nɔ kin lisin to di gud nyuz, ɛn sɔm kin ivin vɛks we dɛn tɛl dɛn bɔt di gud nyuz. Bɔt lɛ dat nɔ mek yu at pwɛl. Fɔ mek yu go ebul de sote go, yu gɛt fɔ lan bɔt Gɔd.—Rid Jɔn 17:3.
^ par. 3 Rid wan buk we dɛn kɔl A Book for All People.
