Kwɛstyɔn dɛn we Pipul dɛn Kin Aks
Aw di atikul we gɛt di taytul “Lɛ Ɔlman Tek Yu Nem as Sɔntin we Oli” we de na di Jun 2020 Wachtawa ɛp wi fɔ ɔndastand klia wan wetin wi biliv bɔt Jiova in nem ɛn di rayt we i gɛt fɔ rul?
Insay da atikul de, wi lan se na wan impɔtant tin de afɛkt ɔl mɔtalman ɛn di enjɛl dɛn. Dat na fɔ mek ɔlman tek Jiova in gret nem as sɔntin we oli. Di prɔblɛm bɔt udat gɛt di rayt fɔ rul ɛn if di we aw Jiova de rul na di bɛst we ɔ nɔto di bɛst we gɛt sɔntin fɔ du wit fɔ mek in nem oli. Ɔda tin bak we gɛt fɔ du wit fɔ tek Jiova in nem as sɔntin we oli na if pɔsin kɔntinyu fɔ fetful to Gɔd ɔ i nɔ kɔntinyu fɔ fetful to am.
Wetin mek naw wi tɔk mɔ se di prɔblɛm we pas ɔl na bɔt Jiova in nem ɛn fɔ tek am as sɔntin we oli? Lɛ wi tɔk bɔt tri rizin dɛn.
Setan dɔn pwɛl Gɔd in nem frɔm we i mek Adam ɛn Iv tɔn dɛn bak pan Gɔd na di gadin we bin de na Idɛn
Fɔs, Setan bin tɔk bad bɔt Jiova in nem, ɔ di kayn pɔsin we i bi, na di gadin we bin de na Idɛn. Di kwɛstyɔn we Setan bin aks Iv bin mek i tan lɛk se Jiova na Gɔd we nɔ gɛt fri-an, ɛn di tin dɛn we i bin tɛl Adam ɛn Iv fɔ du nɔ bin fia. Dɔn Setan bin twis wetin Jiova bin se. Infakt, i bin de kɔl Jiova layman. So i bin pwɛl Jiova in gudnem. I bin kam fɔ bi “di Dɛbul,” we min “pɔsin we de pwɛl sɔmbɔdi in nem.” (Jɔn 8:44) Bikɔs Iv bin biliv Setan in lay, i nɔ obe Gɔd ɛn dis sho se i nɔ want mek Gɔd rul am. (Jɛn. 3:1-6) Te naw, Setan de kɔntinyu fɔ pwɛl Jiova in nem, i de tɔk lay lay tin dɛn bɔt di kayn pɔsin we Jiova bi. Di wan dɛn mɔ we biliv dɛn lay dɛn de nɔ de obe Jiova. So to Gɔd in pipul dɛn, di lay we Setan lay agens Jiova in oli nem na sɔntin we rili bad. Na dat na di men rizin we mek bad ɛn sɔfanɛs bɔku na di wɔl.
Sɛkɔn, fɔ mek ɔlman go bɛnifit, Jiova go pul ɔl di badnem we dɛn dɔn put pan am. Na dat impɔtant to Jiova pas ɔl ɔda tin. Na dat mek i tɔk se: “Ɛn a go pruv di oli, we, mi pawaful nem oli.” (Izi. 36:23) Ɛn Jizɔs bin sho klia wan wetin fɔ bi di tin we impɔtant pas ɔl we Jiova in fetful savant dɛn fɔ pre bɔt we i se: “Lɛ ɔlman tek yu nem as sɔntin we oli.” (Mat. 6:9) Bɔku tɛm, di Baybul de tɔk mɔ bɔt wetin mek i impɔtant fɔ prez Jiova in nem. Jɔs tink bɔt sɔm ɛgzampul dɛn: “Gi PAPA GƆD [“Jiova,” NWT] di glori bikɔs i fit fɔ gɛt am.” (1 Kro. 16:29; Sam 96:8) “Siŋ siŋ dɛn we de tɔk aw PAPA GƆD [in nem] wɔndaful.” (Sam 66:2) “A go prez yu nem sote go.” (Sam 86:12, NWT) Wan pan di tɛm dɛn we Jiova insɛf bin tɔk frɔm ɛvin bin apin na di tɛmpul na Jerusɛlɛm, usay Jizɔs tɔk se: “Papa, mek lɛ yu nem gɛt glori.” Dɔn Jiova ansa am se: “A dɔn mek i gɛt glori ɛn a go mek i gɛt glori bak.”—Jɔn 12:28. a
Tɔd, wetin Jiova want frɔm tɛm gɛt fɔ du wit in nem, ɔ di kayn pɔsin we i bi. Tink bɔt dis: Wetin go apin afta di faynal tɛst we di Wan Tawzin Ia we Krays Go De Rul dɔn? Aw ɔl di enjɛl dɛn ɛn mɔtalman dɛn go fil bɔt Jiova in nem da tɛm de? Da tɛm de, nid nɔ go de fɔ mek mɔtalman dɛn pruv se dɛn fetful. Dɛn go pafɛkt ɛn dɛn go dɔn pas ɔl di tɛst dɛn. Dɛn go dɔn gɛt layf we go de sote go. Dɔn bak, nid nɔ go de fɔ pruv if di we aw Jiova de rul na di bɛst ɔ nɔto di bɛst. Da tɛm de, ɔl di enjɛl dɛn na ɛvin ɛn mɔtalman dɛn na di wɔl go gɛt wanwɔd ɛn dɛn go gri fɔ mek Jiova rul dɛn. Bɔt fɔ se Jiova in nem go stil bi di tin we impɔtant to in pipul dɛn pas ɔl ɔda tin da tɛm de?
Da tɛm de, ɔlman go dɔn no di tru bɔt Jiova ɛn tek in nem as sɔntin we oli. Bɔt, Jiova in nem go kɔntinyu fɔ bi tin we impɔtant pas ɔl ɔda tin to ɔl in fetful savant dɛn na ɛvin ɛn dis wɔl. Wetin mek? Na bikɔs dɛn go kɔntinyu fɔ si di wɔndaful tin dɛn we i go de du. Tink bɔt dis: Bikɔs Jizɔs go put ɔltin ɔnda Jiova, Gɔd go “bi ɔltin to ɔlman.” (1 Kɔr. 15:28) Afta dat, mɔtalman dɛn na di wɔl go ɛnjɔy “di wɔndaful fridɔm as Gɔd in pikin dɛn.” (Rom. 8:21) Ɛn Jiova go du wetin i bin want fɔ du fɔ lɔng tɛm, we na fɔ gɛt wan famili na ɛvin ɛn di wɔl we gɛt wanwɔd.—Ɛfi. 1:10.
Afta ɔl dɛn tin dɛn ya apin, aw Jiova in famili na ɛvin ɛn na di wɔl go fil? Wan dawt nɔ de se wi go stil want fɔ prez Jiova in wɔndaful nem. Gɔd bin dayrɛkt Devid fɔ rayt se: “Lɛ wi prez PAPA GƆD [“Jiova,” NWT]” . . . Lɛ wi prez in nem sote go, in nem we big ɛn pawaful.” (Sam 72:18, 19) Wi go kɔntinyu fɔ fɛn nyu ɛn gud rizin dɛn fɔ du dat sote go.
Jiova in nem tinap fɔ ɔltin we gɛt fɔ du wit am. We wi tink bɔt Jiova in nem, wi de tink bɔt in lɔv. (1 Jɔn 4:8) Wi go mɛmba ɔltɛm se na bikɔs Jiova lɛk wi na dat mek i mek wi, ɛn na dat mek i mek in Pikin kam day fɔ wi sin dɛn. Ɛn wi go mɛmba ɔltɛm se i de rul di rayt we ɛn i de rul wit lɔv. Bɔt wi go kɔntinyu fɔ si aw Jiova de sho se i lɛk wi sote go. Wi go gladi fɔ kam nia am as wi Papa ɛn siŋ fɔ prez in wɔndaful nem sote go.—Sam 73:28.
