“Di Witnɛs dɛn nɔ bin jɔs gud to pipul dɛn, bɔt dɛn bin gud bak to mi dɔg dɛn. Wan de, Ilen, we bin tinap nia di kat, bin gi biskit to mi tu smɔl dɔg dɛn. Frɔm da tɛm de, ɛnitɛm wi go nia di kat, di dɔg dɛn kin want fɔ go to di Witnɛs dɛn so dat dɛn go gi dɛn biskit.

“Sɔm mɔnt bin pas. Di dɔg dɛn bin de ɛnjɔy dɛn biskit, ɛn misɛf bin de ɛnjɔy di shɔt tɛm we a bin de tɔk wit di Witnɛs dɛn. Bɔt a nɔ bin want fɔ tɔk bɔku wit dɛn. A bin dɔn pas 70 ia, ɛn a nɔ bin rili shɔ bɔt wetin di Witnɛs dɛn biliv. Bikɔs bɔku chɔch dɛn dɔn disapɔynt mi, a bin tink se i go bɛtɛ fɔ stɔdi di Baybul fɔ misɛf.

“Insay dɛn tɛm dɛn de, a bin de si ɔda Witnɛs dɛn na difrɛn say dɛn na di siti, tinap nia dɛn kat dɛn. Dɛnsɛf bin nays. Dɛn bin de yuz di Baybul fɔ ansa mi kwɛstyɔn dɛn ɔltɛm, ɛn dat bin mek a biliv dɛn mɔ.

“Wan de, Ilen aks mi se, ‘Yu biliv se animal dɛn na gift frɔm Gɔd?’ A ansa am se, ‘Yɛs, a biliv dat!’ Dɔn Ilen rid wit mi Ayzaya 11:​6-9. Frɔm da tɛm de, a bin want fɔ lan bɔt di Baybul, bɔt a stil nɔ bin want fɔ tek ɛnitin fɔ rid frɔm di Witnɛs dɛn.

“Afta da tɛm de, a bin de ɛnjɔy di smɔl tɛm we a bin de tɔk wit Ilen ɛn in man Brɛnt, bikɔs a bin de bɛnifit. Dɛn bin advays mi fɔ rid frɔm Matyu te to Akt fɔ no wetin i min fɔ bi tru Kristian. So a bin du dat. I nɔ tu te, a bin gri fɔ stɔdi di Baybul wit Brɛnt ɛn Ilen. Dat na bin midul 2016.

“A bin de wet fɔ mek di de rich fɔ stɔdi di Baybul ɛn fɔ go na Kiŋdɔm Ɔl ɛni wik. A bin si am as blɛsin ɛn a bin rili gladi fɔ de lan wetin rili di Baybul se. Jɔs afta wan ia, a bin baptayz ɛn bi Jiova Witnɛs. Naw a ol 79 ia, ɛn a rili gladi bikɔs a dɔn fɛn di tru rilijɔn. Jiova dɔn blɛs mi bay we i dɔn alaw mi fɔ de pat pan in famili we de ɔlsay na di wɔl.”