FƆ DI Ibru pipul dɛn we bin de na di Prɔmis Land, di ia bin de bigin di tɛm we dɛn de rɛdi di grɔn fɔ plant ɛn di tɛm we dɛn de plant sid, we bin de apin insay Sɛptɛmba/Ɔktoba insay wi yon tɛm.

Pipul dɛn bin de yuz di mun fɔ kalkyulet di mɔnt, we kin de lɛk 29 ɔ 30 dez. Dɛn bin de yuz di san fɔ kalkyulet di ia. Bɔt we dɛn yuz di mun fɔ kalkyulet di ia, i de shɔt pas we dɛn yuz di san. So dɛn bin nid fɔ fɛn we fɔ mek dɛn tu we dɛn ya fɔ kɔnt tɛm bi di sem. Dɛn bin de du dis bay we dɛn bin de ad ɛkstra dez dɛn ɔ sɔntɛm bay we dɛn bin de ad mɔnt bifo di nɛks ia stat. Dis bin de mek di kalɛnda mach di sizin dɛn fɔ plant ɔ fɔ avɛst.

Bɔt insay Mozis in tɛm, Gɔd bin tɛl In pipul dɛn se di oli ia fɔ bigin insay di mɔnt we nem Ebib ɔ Naysan, we go de arawnd Mach/Epril insay wi yon tɛm. (Ɛks. 12:​2; 13:​4) Wan fɛstival we kin tek ples insay dis mɔnt kin gɛt fɔ du wit di bali avɛst.—Ɛks. 23:​15, 16.

Wan masta sabi bukman bin tɔk se, “I bin izi fɔ no ustɛm fɔ ad ɛkstra mɔnt insay di kalɛnda.” I bin tɔk bak se: “Di Pasova fɛstival fɔ apin ɔltɛm afta di de insay Mach/Epril we di de ɛn nɛt ikwal. . . . Bɔt if dɛn kam fɔ no se we di ia de dɔn, di Pasova fɛstival go bi bifo da de de insay Mach/Epril, di Ju dɛn kin ad wan mɔnt bifo Naysan.”

Jiova Witnɛs dɛnsɛf kin yuz dis sem we fɔ kalkyulet di rayt det fɔ di Masta in Ivintɛm It, we go bi di sem tɛm arawnd Mach/Epril we go ikwal to Naysan 14 na di Ibru pipul dɛn kalɛnda. Bifo tɛm, dɛn kin mek di kɔngrigeshɔn dɛn ɔlsay na di wɔl no bɔt dis det. *

Bɔt aw di Ibru pipul dɛn bin de no ustɛm wan mɔnt de dɔn ɛn ustɛm nyu mɔnt go bigin? Tide, yu kin jɔs wach kalɛnda we dɛn print ɔ kalɛnda ap we de na yu ilɛktronik divays. Bɔt insay di tɛm we dɛn rayt di Baybul, i nɔ bin izi da we de.

Insay Noa in tɛm, mɔnt dɛn bin de las fɔ 30 dez. (Jɛn. 7:​11, 24; 8:​3, 4) Leta, insay di Ibru pipul dɛn tɛm, di kalɛnda mɔnt nɔ bin de las fɔ 30 dez. Insay di Ibru pipul dɛn kalɛnda, di mɔnt bin de bigin as dɛn si di nyu mun. Dat na bin 29 ɔ 30 dez afta di mɔnt we bin de bifo am stat.

Wantɛm, Devid ɛn Jonɛthan bin kɔl nyu mɔnt we fɔ stat as “di nɛks de we na di Nyu Mun.” (1 Sam. 20:​5, 18) So i tan lɛk se insay dɛn yon tɛm, dɛn bin de kalkyulet mɔnt dɛn bifo tɛm. Bɔt aw di Izrɛlayt dɛn bin de no we nyu mɔnt bigin? Di Mishna, we na di Ju pipul dɛn lɔ ɛn tradishɔn, gi wi sɔm infɔmeshɔn. I sho se afta di Ju pipul dɛn bin kam bak frɔm ɛgzayl na Babilɔn, di Sanɛndrin (we na di Ju ay kɔt) bin de pat pan dɛn. Insay di sɛvin mɔnt dɛn we dɛn bin de gɛt di fɛstival, dɛn bin de gɛda na di kɔt ali insay di de we mek 30 na di mɔnt. Na dɛn man dɛn de bin gɛt di wok fɔ sho ustɛm di nɛks mɔnt fɔ bigin. Aw dɛn bin de disayd dat?

Man dɛn we bin de tinap pantap ay il dɛn arawnd Jerusɛlɛm kin wach di skay na nɛt fɔ si we di nyu mun de apia. Wantɛm wantɛm, dɛn kin tɛl di Sanɛndrin. We di man dɛn insay di kɔt si se dɛn dɔn gɛt bɔku pruf fɔ se dɛn dɔn si di nyu mun, dɛn go anawns se nyu mɔnt dɔn bigin. Bɔt wetin dɛn go du if di klawd mek di wachman dɛn nɔ ebul fɔ si di nyu mun? Wɛl, dɛn go tɛl di pipul dɛn  se na 30 dez di mɔnt we dɛn de insay las fɔ, dɔn di nyu mɔnt go bigin di nɛks de.

Fɔ anawns di tɛm we di nyu mɔnt fɔ stat, dɛn kin layt faya na Mawnt Ɔliv, we de nia Jerusɛlɛm. Dɛn bin de layt faya na ɔdasay dɛn na Izrɛl we ay, so dat pipul dɛn go no bɔt di nyu mɔnt. Dɔn leta, dɛn kin sɛn di mɛsenja dɛn. So dɛn go mek di Ju dɛn we de na Jerusɛlɛm ɛn ɔdasay dɛn no se dɛn de kam stat nyu mɔnt. Dɔn dɛn ɔl kin sɛlibret di fɛstival dɛn di sem tɛm.

Di chat go ɛp yu fɔ ɔndastand di mɔnt dɛn, fɛstival dɛn, ɛn sizin dɛn insay di Izrɛlayt dɛn tɛm.