Bɔku pipul dɛn nɔ lɛk fɔ wok tranga wan lɛk Alɛks. Wan man we na mɛkanik we nem Erɔn bin tɔk se: “Bɔku pipul dɛn kin tink se dɛn nɔ fɔ du ‘af-af’ wok we nɔ impɔtant. Dɛn kin tɔk se, ‘A jɔs de manej dis wok te a gɛt bɛtɛ wok.’”

Wetin mek bɔku pipul dɛn fil se dɛn nɔ fɔ wok tranga wan? Sɔntɛm na wetin dɛn de tɔk na tɛlivishɔn ɛn redio na in de ambɔg di we aw dɛn de tink. Di tin dɛn we dɛn kin tɔk na tɛlivishɔn ɛn redio kin mek dɛn fil se fɔ “ɛnjɔy layf” na we yu liv pɔsh ɛn izi layf. Wan man we nem Matyu we kin mek say dɛn we dɔn pwɛl pan bildin, bin tɔk se: “Pipul dɛn de tink se di mɔ yu de wok tranga wan fɔ ebul liv fayn, na di mɔ yu nɔ go go bifo.” Wan ɔda man we nem Shen, we in wok na fɔ klin bildin dɛn, gri se na so i bi. In tɔk se: “Pipul dɛn nɔ want fɔ wok fɔ di tɛm we dɛn dɔn gri se dɛn fɔ wok, bɔt dɛn want lɛ dɛn pe dɛn di kɔrɛkt mɔni.”

Bɔt pipul dɛn we dɔn go bifo na layf dɔn rili ɛnjɔy we dɛn de wok tranga wan. Wan man we nem Daniɛl, we ol 25 ia bin tɔk se: “A tink se pɔsin go gɛt bɔku bɛnifit we i de wok tranga wan, mɔ we i de du am fɔ di rayt rizin.” Andre we ol 23 ia, insɛf gri wit dis. I bin tɔk se: “A biliv se we pɔsin wok tranga wan, i de gɛt gladi at ɛn ɛnjɔy in layf. Bɔt pɔsin we nɔ de wok bɛtɛ, nɔ kin rili gladi, i kin jɔs gens wit ɔltin.”

Wetin ɛp pipul dɛn lɛk Daniɛl ɛn Andre fɔ si wok as sɔntin we fayn? Wan tin we dɔn ɛp dɛn na we dɛn de fala di Baybul in advays. Di Baybul ɛnkɔrej wi fɔ kɔntinyu fɔ wok tranga wan. Bɔt nɔto dat nɔmɔ di Baybul tɛl wi fɔ du. I sho wi aw wi go ɛnjɔy wi wok.

Us advays dɛn na di Baybul go ɛp yu fɔ gɛt gladi at we yu de wok? Wi de ɛnkɔrej yu fɔ rid dɛn advays ya insay di ɔda atikul.