Yu dɔn ɛva tink bɔt dɛn kwɛstyɔn ya? If yu ansa na yɛs, nɔto yu wangren. Pipul dɛn ɔlsay na di wɔl de tink bɔt dɛn kwɛstyɔn ya. Yu tink se yu go ebul fɔ fɛn di ansa dɛn?

Bɔku bɔku pipul dɛn na di wɔl go se, “Yɛs!” Wetin du? Bikɔs dɛn dɔn fɛn ansa dɛn na di Baybul we dɔn mek dɛn satisfay. Yu go lɛk fɔ no wetin di Baybul se? If yu go lɛk fɔ no, na fɔ stɔdi di Baybul wit Jiova Witnɛs dɛn. Na fri. *

We dɛn kin aks sɔm pipul dɛn if dɛn go want fɔ stɔdi di Baybul, dɛn kin se: “A bizi.” “Di Baybul tu at fɔ ɔndastand.” “A de fred se a nɔ go ebul fɔ kɔntinyu.” Bɔt ɔda pipul dɛn kin si am difrɛn we. Dɛn kin gladi fɔ lan wetin di Baybul de tich. Lɛ wi si sɔm ɛgzampul dɛn:

• “A bin de go na dɛn Katolik ɛn Protɛstant chɔch dɛn, dɔn a bin de go na wan tɛmpul we dɛn kɔl Sik tɛmpul, a ivin go na wan Budist sɛminari, ɛn a stɔdi bɔt Gɔd ɛn rilijɔn na yunivasiti. Bɔt stil, a nɔ bin ebul gɛt ansa to bɔku kwɛstyɔn dɛn we a bin gɛt bɔt Gɔd. Wan tɛm, wan Jiova Witnɛs kam na mi os. A bin kɔle di we aw i bin de pul di ansa dɛn frɔm di Baybul, so a gri fɔ stɔdi di Baybul.”—Gil, Ingland.

• “A bin gɛt bɔku kwɛstyɔn dɛn bɔt layf, bɔt a nɔ bin satisfay wit di ansa dɛn we mi pastɔ bin gi mi. Bɔt wan pan Jiova Witnɛs dɛn bin yuz di Baybul fɔ ansa ɔl mi kwɛstyɔn dɛn. We i aks mi if a want fɔ no mɔ, a bin gladi fɔ stɔdi.”—Kofi, Bɛnin.

• “A bin want fɔ no wetin de apin to dayman. A bin biliv se di wan dɛn we dɔn day kin ebul fɔ du bad to di wan dɛn we gɛt layf, bɔt a bin want fɔ no wetin di Baybul in se. So a bigin fɔ stɔdi di Baybul wit wan mi padi we na bin Jiova Witnɛs.”—Jozi, Brazil.

• “A tray fɔ rid di Baybul, bɔt a nɔ ebul fɔ ɔndastand am. Wande, Jiova Witnɛs dɛn kam na mi os ɛn ɛksplen to mi klia wan sɔm tin dɛn we di Baybul bin dɔn tɔk se go apin. A bin want fɔ si wetin igen a go lan.”—Dɛniz, Mɛksiko.

• “A bin de wɔnda if Gɔd rili bisin bɔt mi. So a disayd fɔ pre to di Gɔd we mek di Baybul. Di nɛks de, Witnɛs dɛn nak na mi domɔt, ɛn a gri fɔ stɔdi di Baybul.”—Anju, Nepal.

Dɛn ɛgzampul ya de mɛmba wi wetin Jizɔs bin tɔk, we i se: “Di wan dɛn we no se dɛn fɔ lan bɔt Gɔd go gladi.” (Matyu 5:3) Fɔ tru, mɔtalman want fɔ no bɔt Gɔd. Na Gɔd nɔmɔ go mek wi no bɔt am, ɛn i de du dat wit in Wɔd, di Baybul.

So, wetin na Baybul stɔdi? Aw i go bɛnifit yu? Di nɛks atikul go ansa dɛn kwɛstyɔn ya.