DI TƆPIK NA DI FRƆNT PEJ | YU GO EBUL FƆ ƆNDASTAND DI BAYBUL
Wetin Mek Wi Fɔ Ɔndastand di Baybul?
“Di Baybul na buk we bɔku pipul dɛn sabi. Bɔt Chayniz pipul dɛn nɔ sabi am ɛn i nɔ impɔtant to dɛn.”—LIN, CHAYNA.
“A nɔ ivin ebul fɔ ɔndastand di oli buk dɛn we de na mi Indu rilijɔn. So aw a go ebul fɔ ɔndastand di Oli Baybul?”—AMIT, INDIA.
“A rɛspɛkt di Baybul as buk we dɔn ol ɛn a dɔn yɛri se i dɔn sɛl pas bɔku buk dɛn. Bɔt a nɔ wande si Baybul yet.”—YUMIKO, JEPAN.
Bɔku pipul dɛn na di wɔl rili rɛspɛkt di Baybul. Bɔt sɔntɛm na smɔl tin nɔmɔ dɛn no ɔ dɛn nɔ ivin no ɛnitin bɔt wetin de insay di Baybul. Bɔku pipul dɛn we de na Eshia ɛn ivin sɔm pipul dɛn we de na say dɛn usay dɛn gɛt bɔku Baybul dɛn, nɔ sabi ɛnitin bɔt di Baybul ɔ na smɔl tin nɔmɔ dɛn no bɔt am.
Bɔt sɔntɛm yu go aks se: ‘Wetin mek a fɔ rili want fɔ no mɔ bɔt di Baybul?’ We yu ɔndastand di tin dɛn we de insay dis oli buk, dat go ɛp yu fɔ:
-
Satisfay wit wetin yu gɛt ɛn gɛt gladi at
-
Sɔlv prɔblɛm dɛn we kin de na famili
-
Bia wit tin dɛn we kin mek yu wɔri
-
Gɛt fayn padi biznɛs wit ɔda pipul dɛn
-
Manej di mɔni we yu gɛt
Fɔ ɛgzampul, wan uman we nem Yoshiko we de na Jepan, bin de wɔnda wetin di Baybul de bɔt ɛn i bin disayd fɔ rid am fɔ insɛf. Wetin bin apin afta i rid di Baybul? I bin tɔk se: “Di Baybul dɔn ɛp mi fɔ no wetin mek Gɔd mek mi ɛn i dɔn mek a gɛt op fɔ tumara bambay.” I tɔk bak se: “A dɔn lɛf fɔ fil se a nɔ gɛt op.” Amit we wi bin dɔn tɔk bɔt bin disayd fɔ stɔdi di Baybul fɔ insɛf. I bin tɔk se: “A bin sɔprayz. Di Baybul gɛt bɔku advays dɛn we go bɛnifit ɔlman.”
Di Baybul dɔn rili bɛnifit bɔku bɔku pipul dɛn. Yu nɔ tink se i go fayn fɔ mek yusɛf stɔdi di Baybul ɛn si aw i go bɛnifit yu?
