နာ်ဝဲလီၤ. ယဟိဝၤပှၤအုၣ် အသးတဖၣ်န့ၣ် နာ်ဝဲလၢ လံာ်စီဆှံ ဒီတဘ့ၣ်န့ၣ် “ကွဲးအသးလၢ ယွၤအသးစီဆှံ” လီၤ. (၂ တံၤမသ့း ၃:၁၆) တၢ်န့ၣ်ပာ်ဃုာ်ဒီး လံာ်တၢ်အၢၣ်လီၤ အီလီၤ အလီၢ်လံၤ တကတြူၢ် ဒီးအသီ တကတြူၢ် လၢညီနုၢ် တၢ်ကိးအီၤန့ၣ်လီၤ. အါတက့ၢ်, ယဟိဝၤပှၤအုၣ် အသးတဖၣ် ညီနုၢ် ယၢၤဖျါထီၣ်ဝဲ လံာ်စီဆှံ အကူာ်တဖၣ်အံၤလၢ ဧ့ၤဘြံၤကျိာ် လံာ်စီဆှံ ဒီးခရံာ်ဖိကြံးခ်ကျိာ် လံာ်စီဆှံလီၤ. လၢတၢ်န့ၣ်အဃိ, ပဟးဆှဲး တၢ်ဟ့ၣ်တၢ်ထံၣ် လၢအမ့ၢ် လံာ်စီဆှံ အကူာ်တနီၤန့ၣ် အဘျုးတအိၣ် လၢစိၤခဲအံၤလီၤ.

 လၢယွၤအသးစီဆှံ အတၢ်ထိၣ်ဂဲၤထီၣ် အဖီလာ်န့ၣ်, ခရံာ်ဖိတၢ်မၢဖိ စီၤပီလူး ကွဲးတ့ၢ်ဝဲလၢ “ဖဲဒၣ်တၢ်ကွဲးအသး တဘီလၢ်လၢ်န့ၣ်, ဘၣ်ကွဲးအသးလၢ ပဘၣ်တၢ်သိၣ်တၢ်သီအဂီၢ်” လီၤ. (ရိမ့ၤ ၁၅:၄) လၢတၢ်န့ၣ်အဃိ, တၢ်ကစီၣ်လၢ အလုၢ်ဒိၣ်ပှ့ၤဒိၣ် လၢပဂီၢ်န့ၣ် အိၣ်လၢ ဧ့ၤဘြံၤကျိာ် လံာ်စီဆှံပူၤလီၤ. လၢတၢ်အဂုၤ အဂၤအကျါ, အဝဲသ့ၣ် ဟ့ၣ်ထီၣ်ဝဲ တၢ်စံၣ်စိၤတဲစိၤလၢ ဘၣ်ဃးလိာ်သး ဒီးစိၤခဲအံၤ ဒီးတၢ်ဟ့ၣ်ကူၣ်လၢ အဘျုးအိၣ်လီၤ.

•   တၢ်စံၣ်စိၤတဲစိၤလၢ ဘၣ်ဃးလိာ် သးဒီး စိၤခဲအံၤ. ဧ့ၤဘြံၤကျိာ် လံာ်စီဆှံန့ၣ် ပာ်ဃုာ်ဒီး တၢ်ကွဲးနီၣ် လီၤတံၢ်လီၤဆဲးလၢ ဘၣ်ဃးဒီး တၢ်ဘၣ်တ့ ဒီးပှၤကညီကဲထီၣ် ပှၤတၢ်ဒဲးဘးဖိ အဂ့ၢ်လီၤ. လံာ်အံၤမ့ၢ် တအိၣ်ဘၣ်န့ၣ် တမ့ၢ်ပက သ့ၣ်ညါဘၣ် တၢ်သံကွၢ်ဒ်သိး, မ့ၢ်ပဟဲဖဲလဲၣ်, ဘၣ်မနုၤအဃိ ပှၤကညီတဖၣ် ဘၣ်သံလဲၣ်, အတၢ်စံးဆၢလၢ လီၤသူၣ်မံသးမုာ်ဘၣ်. (၁ မိၤၡ့ ၂:၇, ၁၇) ဘၣ်ဆၣ်, ဧ့ၤဘြံၤကျိာ် လံာ်စီဆှံန့ၣ် ကွဲးနီၣ်ပာ်ဝဲ ယဟိဝၤယွၤရ့ဒီး ပှၤကညီလၢ ထံၣ်ဘၣ်တၢ် သူၣ်ဖှံသးညီ ဒီးထံၣ်ဘၣ် တၢ်ကီတၢ်ခဲလၢလီၤဂာ်ဒီး ပစိၤခဲအံၤလီၤ.—ယၤကိာ် ၅:၁၇.

•   တၢ်ဟ့ၣ်ကူၣ်လၢ အဘျုးအိၣ်. လံာ်တၢ်ကတိၤဒိ ဒီးလံာ်ပှၤစံၣ် တဲၤတဲလီၤတၢ်, လၢအမ့ၢ်ဧ့ၤဘြံၤကျိာ် လံာ်စီဆှံအကူာ်န့ၣ် ပာ်ဃုာ်ဒီး တၢ်ကူၣ်သ့ကိးဆၢ ကတီၢ်ဒဲးလၢ ပှၤကညီအဂီၢ်လီၤ. တၢ်သ့ၣ်တဖၣ်အံၤ ဟ့ၣ်ထီၣ် တၢ်ဟ့ၣ်ကူၣ်လၢ တၢ်မုာ်လၤဘၣ် ဟံၣ်မုာ်ဃီပၢၤအဂ့ၢ် (ကတိၤဒိ ၁၅:၁၇), တၢ်ထံၣ်ဘၣ်လိာ်ဘၣ်စး လၢတၢ်ဖံးတၢ်မၤ (ကတိၤဒိ ၁၀:၄; စံၣ်တဲၤတဲလီၤ ၄:၆), ဒီးသးစၢ်တဖၣ် သူဝဲအသးစၢ် ဆၢကတီၢ်လၢ တၢ်သူၣ်ခုသးခု သ့အဂ့ၢ် (စံၣ်တဲၤတဲလီၤ ၁၁:၉–၁၂:၁) လီၤ.

 အါန့ၢ်အန့ၣ်, ပဒိးန့ၢ်ဘၣ် တၢ်အဘျုးလၢ တၢ်မၤလိစီၤမိၤၡ့ အတၢ်မၤလိာ်လၢ တၢ်ကွဲးနီၣ်တ့ၢ်ဖဲ လံာ်တၢ်သိၣ်တၢ်သီ (လံာ်စီဆှံ အဆိကတၢၢ် ယဲၢ်ဘ့ၣ်တဘ့ၣ်) အပူၤလီၤ. တၢ်မၤလိာ်အံၤန့ၣ် တစၢဃာ် ခရံာ်ဖိတဖၣ်သနာ်က့, တၢ်အံၤပာ်ဃုာ်ဒီး တၢ်သိၣ်တၢ်သီ လုၢ်ဒိၣ်ပှ့ၤဒိၣ်လၢ မၤစၢၤပှၤလၢ ပကအိၣ်ဒီး တၢ်အိၣ်မူလၢ လီၤသူၣ်ခုသးခုသ့လီၤ.—၃ မိၤၡ့ ၁၉:၁၈; ၅ မိၤၡ့ ၆:၅–၇.