တကြၢးဘၣ်. လံာ်စီဆှံ ပာ်ဖျါထီၣ်ဝဲလၢ ပကဘၣ်​ ဃ့ဘါထုကဖၣ်ထဲလၢ ကစၢ်ယွၤအအိၣ်​ ခီဖျိလၢ ယ့ၣ်ၡူးအမံၤလီၤ. ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “သုဘၣ်ဃ့ဘါထုကဖၣ်တၢ် ဒ်အံၤလီၤ. “‏‘အိၣ်လၢမူခိၣ်ပပၢ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်.” (မးသဲ ၆:၉) ယ့ၣ်ၡူးတမၢ အပျဲၢ်အဘီၣ်တဖၣ်​ ဃ့ဘါထုကဖၣ်လၢ ပှၤစီဆှံတဖၣ်တအအိၣ်, မူခိၣ်ကလူးတဖၣ်အအိၣ်​ ဒီးပှၤအဂၤတဖၣ်အအိၣ်​ နီတဘျီဘၣ်.

 တကးဒံးဘၣ်​ ယ့ၣ်ၡူးတဲဘၣ်​ ပှၤလၢအပိာ်အခံတဖၣ်လၢ “ယမ့ၢ်ကျဲ ဒီးတၢ်မ့ၢ်တၢ်တီ ဒီးတၢ်မူလီၤ. မ့တမ့ၢ် ခီဖျိလၢ ယၤဘၣ်န့ၣ်​ ပှၤလဲၤဆူ ပၢ်အအိၣ်​ တသ့နီတဂၤဘၣ်.”‏ (ယိၤဟၣ်​ ၁၄:၆) ထဲဒၣ်ယ့ၣ်ၡူးတဂၤဧိၤန့ၣ်​ အိၣ်ဒီးတၢ်ခွဲးတၢ်ယာ်လၢ ကမၤတၢ်လၢ ကစၢ်ယွၤ ဒီးပဝဲဒၣ်​ အခၢၣ်စးလီၤ.—ဧ့ၤဘြံၤ ၇:၂၅.

ပဃ့ဘါထုကဖၣ်လၢ ကစၢ်ယွၤအအိၣ်​ ဒီးပဃ့စ့ၢ်ကီးလၢ ပှၤစီဆှံတဖၣ်အအိၣ်​ သ့ဧါ

 ဖဲမုၣ်ကီၤလံၢ် လ့ပစီယ့ၣ်ၡူးအခါ ယ့ၣ်ၡူးတဲဆၢအီၤလၢ “နကဘၣ်​ ဘူၣ်ထီၣ်ဘါထီၣ်​ နကစၢ်ယဟိဝၤယွၤ ဒီးနကဘၣ်မၤထဲ အဝဲဒၣ်အတၢ်လီၤ.” (မးသဲ ၄:၁၀) ကစၢ်ယွၤ မၤလိာ်ဝဲလၢပှၤကတီဒီးအီၤ ဒီးဘူၣ်ထီၣ်ဘါထီၣ်အီၤ ထဲတဂၤဧိၤ, ဖဲန့ၣ်အကျါ ပၣ်ဃုာ်ဒီး ပကဘၣ်ဃ့ဘါထုကဖၣ်လၢ ကစၢ်ယွၤအအိၣ်​ ထဲတဂၤဧိၤလီၤ.—ယၡါယၤ ၄၈:၁၁.

 ပမ့ၢ်ဃ့ဘါထုကဖၣ်လၢ ပှၤဂၤအအိၣ်မ့ၢ်ဂ့ၤ, ပှၤစီဆှံအအိၣ်မ့ၢ်ဂ့ၤ, မူခိၣ်ကလူးအအိၣ်မ့ၢ်ဂ့ၤ မ့ၢ်ဒၣ်ပမၤဘၣ်ဒိ ကစၢ်ယွၤအသးလီၤ. ဖဲတၢ်မၢဖိယိၤဟၣ်​ ကဘူၣ်ထီၣ်ဘါထီၣ်​ မူခိၣ်ကလူးအခါ မူခိၣ်ကလူး တြီအီၤဒီးတဲအီၤလၢ “တဘၣ်မၤဒ်န့ၣ်တဂ့ၤ. ဘူၣ်ထီၣ်ဘါထီၣ်​ ကစၢ်ယွၤတက့ၢ်. ယမ့ၢ်ဒၣ်ကုၢ်ကဒဲကဒဲ ဒ်သိးဒီးနၤ ဒီးနဒီပုၢ်ဝဲၢ်တဖၣ်လၢ အအိၣ်ဝဲဒီးတၢ်မၤလၢ ကအုၣ်အသးဘၣ်ဃးဒီး ယ့ၣ်ၡူး” လီၤ.—လီၣ်ဖျါ ၁၉:၁၀.