ယၤကိာ် ၄:၁-၁၇
၄ တၢ်တဲအါလိာ်သး ဒီးတၢ်အ့ၣ်လိာ်ဆိးက့ လၢသုကျါန့ၣ် ဟဲအိၣ်ထီၣ်လၢ မနုၤအဃိလဲၣ်. အဟဲအိၣ်ထီၣ် ခီဖျိလၢ သုတၢ်ဖံးတၢ်ညၣ် အတၢ်သူၣ်လီသးကွံတဖၣ်လၢ အဂုာ်ကျဲးစၢးဒိၣ်စိလၢသုဖီခိၣ် တမ့ၢ်ဘၣ်ဧါ.+
၂ သုသးလီတၢ် ဘၣ်ဆၣ် တၢ်လၢသုသးလီန့ၣ် အတအိၣ်ဒီးသုဘၣ်. သုသးဟ့လိာ်သးတဂၤဒီးတဂၤ* ဒီးသးကွံပှၤတၢ် ဘၣ်ဆၣ် သုတဒိးန့ၢ်ဘၣ် တၢ်နီတမံၤဘၣ်. သုဆဲးအ့ၣ်လိာ်သး ဒီးအလီၤဂာ်လၢ သုဒုးတၢ်ယၤတၢ်လီၤ.+ ဘၣ်ဆၣ် မ့ၢ်လၢ သုတဃ့ဘၣ်အဃိ သုတဒိးန့ၢ်အီၤဘၣ်.
၃ ဒီးဖဲသုဃ့တၢ်အခါ မ့ၢ်လၢ သုတၢ်တိာ်ပာ်တဂ့ၤဘၣ် ဒီးသုဃ့ဒ်သိး သုကမၤလၢပှဲၤ တၢ်ဖံးတၢ်ညၣ် အတၢ်သူၣ်လီသးကွံအဃိ သုတဒိးန့ၢ်ဘၣ်အီၤဘၣ်.
၄ ပှၤအဲၣ်ဘၢမါအဲၣ်ဘၢဝၤသ့ၣ်ဧၢ,* ပှၤလၢ အဒီတံၤဒီသကိးဒီး ဟီၣ်ခိၣ်န့ၣ် ကဲဝဲကစၢ်ယွၤ အဒုၣ်အဒါန့ၣ် မ့ၢ်သုတသ့ၣ်ညါဘၣ်ဧါ. ပှၤလၢအအဲၣ်ဒိး ဒီတံၤဒီသကိးဒီး ဟီၣ်ခိၣ်န့ၣ် ဒုးကဲထီၣ် အနီၢ်ကစၢ်လၢ ကစၢ်ယွၤအဒုၣ်အဒါလီၤ.+
၅ တၢ်ကွဲးအသးတဲဝဲလၢ “သးလၢ အသူၣ်က့ၣ်သးကါတၢ် လၢအအိၣ်ဝဲဆိးဝဲလၢ ပပူၤန့ၣ် ဆဲးသူၣ်လီသးကွံတၢ် အကလုာ်ကလုာ်ထီဘိလီၤ.”+ တၢ်ကွဲးအသးအံၤ မ့ၢ်သုဆိကမိၣ်လၢ အခီပညီတအိၣ်ဘၣ်ဧါ.
၆ ဘၣ်ဆၣ် တၢ်သးကညီၤ ဒိၣ်ဒိၣ်မုၢ်မုၢ်လၢ ကစၢ်ယွၤ ပာ်ဖျါထီၣ်လၢ ပဖီခိၣ်န့ၣ် မၤစၢၤပှၤလၢ ပမၤနၢၤ တၢ်ပာ်သူၣ်ပာ်သးဒ်န့ၣ်တဖၣ်လီၤ. အဃိ တၢ်ကွဲးအသးအိၣ်ဝဲလၢ “ကစၢ်ယွၤထီဒါ ပှၤလၢ အပာ်ထီၣ်ထီအသးလီၤ.+ မ့မ့ၢ်ပှၤလၢအဆီၣ်လီၤအသးန့ၣ် အဝဲပာ်ဖျါထီၣ် တၢ်သးကညီၤ ဒိၣ်ဒိၣ်မုၢ်မုၢ်လၢ အဝဲသ့ၣ်အဖီခိၣ်လီၤ.”+
၇ လၢတၢ်န့ၣ်အဃိ ဒိးပၢသုသးလၢ ကစၢ်ယွၤအဖီလာ်+ ဒီးထီဒါမုၣ်ကီၤလံၢ်တက့ၢ်.+ ဒီးအဝဲကဃ့ၢ်ထီၣ်ကွံာ်လၢ သုအိၣ်လီၤ.+
၈ သုးဘူးသုသးဆူ ကစၢ်ယွၤအအိၣ်တက့ၢ်. ဒီးအဝဲကသုးဘူးအသး ဆူသုအိၣ်လီၤ.+ ပှၤတၢ်ဒဲးဘးဖိသ့ၣ်ဧၢ, မၤကဆှီထီၣ်သုစုတက့ၢ်.+ ဒီးပှၤလၢအသးဒ့ဒီသ့ၣ်ဧၢ, မၤကဆှီထီၣ် သုသးတက့ၢ်.+
၉ မ်သုသးဘၣ်ဖှီၣ် ဒီးဟီၣ်တၢ်ယၢၤတၢ်တက့ၢ်.+ မ်သုတၢ်နံၤတၢ်အ့ ကဲထီၣ်က့ၤလၢ တၢ်ဟီၣ်တၢ်ယၢၤ ဒီးသုတၢ်သးခု ကဲထီၣ်က့ၤလၢ တၢ်သးအုးတက့ၢ်.
၁၀ ဆီၣ်လီၤသုသးလၢ ယဟိဝၤယွၤ* အမဲာ်ညါတက့ၢ်.+ ဒီးအဝဲကပာ်ထီၣ်ထီသုလီၤ.+
၁၁ ဒီပုၢ်ဝဲၢ်သ့ၣ်ဧၢ, ကတိၤထီဒါလိာ်သး တဂၤဒီးတဂၤလၢၤတဂ့ၤ.+ ပှၤတဂၤဂ့ၤ တဂၤဂ့ၤလၢ အကတိၤထီဒါ ဒီပုၢ်ဝဲၢ်တဂၤဂၤ မ့တမ့ၢ် စံၣ်ညီၣ်အဒီပုၢ်ဝဲၢ်န့ၣ် မ့ၢ်အကတိၤထီဒါ တၢ်သိၣ်တၢ်သီ ဒီးစံၣ်ညီၣ် တၢ်သိၣ်တၢ်သီလီၤ. ဒီးသုမ့ၢ်စံၣ်ညီၣ် တၢ်သိၣ်တၢ်သီန့ၣ် သုကဲစံၣ်ညီၣ်ကွီၢ်လံ ဒီးသုတမ့ၢ်ပှၤလၢ အမၤထွဲတၢ်သိၣ်တၢ်သီလၢၤဘၣ်.
၁၂ ပှၤလၢအဟ့ၣ်လီၤ တၢ်သိၣ်တၢ်သီ ဒီးပှၤလၢ အစံၣ်ညီၣ်တၢ်န့ၣ် အိၣ်ထဲတဂၤလီၤ.+ ဒီးအဝဲအုၣ်က့ၤခီၣ်က့ၤတၢ်သ့ ဒီးမၤဟးဂီၤကွံာ်တၢ်သ့လီၤ.+ ဘၣ်ဆၣ် မ့မ့ၢ်နၤန့ၣ် လၢနကစံၣ်ညီၣ် ပှၤလၢနဃၢၤအဂီၢ် နမ့ၢ်မတဂၤလဲၣ်.+
၁၃ သုဝဲတနီၤ သုတဲလၢ “တနံၤအံၤ မ့တမ့ၢ် ခဲမုၢ်ဆ့ၣ်န့ၣ် ပကလဲၤလၢ ဝ့ၢ်တဖျၢၣ်အံၤ ဒီးပကအိၣ်ဖဲန့ၣ်တနံၣ် ဒီးပကဆါတၢ်ပှ့ၤတၢ် ဒီးပကမၤန့ၢ်ကျိၣ်စ့လီၤ.”+
၁၄ နီၢ်ကီၢ်န့ၣ် ခဲမုၢ်ဆ့ၣ် သုတၢ်အိၣ်မူ ကမၤအသးဒ်လဲၣ်န့ၣ် သုတသ့ၣ်ညါဘၣ်.+ သုသးသမူန့ၣ် လီၤဂာ်ဒ်ဘှ့ၣ်လၢ အဟဲဖျါထီၣ်တစိၢ်ဖိ ဝံၤဒီးလီၤမၢ်ကွံာ်ဝဲလီၤ.+
၁၅ အဃိ သုကြၢးတဲလၢ “မ့ၢ်ဘၣ်ယဟိဝၤယွၤ အသးန့ၣ်+ ပကမူဒီးပကမၤတၢ် ဒ်အံၤဒ်နုၤလီၤ.”
၁၆ ဘၣ်ဆၣ် ခဲအံၤန့ၣ် သုပာ်ထီၣ်ထီသုသး ဒီးပတြၢၤလီၤသုသးလၢ တၢ်ပာ်ကဖၢလၢသးအပူၤလီၤ. တၢ်ပတြၢၤလီၤသးဒ်အံၤတဖၣ်န့ၣ် မ့ၢ်တၢ်လၢအအၢအသီလီၤ.
၁၇ အဃိ ပှၤတဂၤလၢအသ့ၣ်ညါ တၢ်လၢအဘၣ် ဘၣ်ဆၣ် မ့ၢ်တမၤဝဲဘၣ်န့ၣ် မ့ၢ်တၢ်ဒဲးဘးလၢ အဂီၢ်လီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “မၤသံတၢ်.”
^ မ့ၢ်စ့ၢ်ကီး “ပှၤလၢတၢ်သးတီ တအိၣ်ဘၣ်တဖၣ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
