လီၣ်ဖျါ ၄:၁-၁၁
၄ တၢ်န့ၣ်ဝံၤအလီၢ်ခံ ကွၢ်မီၤ, ယထံၣ်တြဲၤတဘ့ၣ် အိးထီၣ်အသးလၢမူခိၣ် ဒီးတၢ်ကလုၢ်လၢ ယနၢ်ဟူအဆိကတၢၢ်လၢ အတဲတၢ်ဒီးယၤန့ၣ် အသီၣ်လီၤဂာ်ဒ် ကွဲၤအသိး ဒီးတဲဝဲလၢ “ဟဲထီၣ်လၢအံၤ, ယကဒုးနဲၣ်နၤတၢ်လၢ ကဘၣ်မၤအသးတဖၣ်လီၤ.”
၂ ဒီးတဘျီဃီန့ၣ် သးစီဆှံ အတၢ်စိတၢ်ကမီၤ မၤတၢ်လၢယပူၤ ဒီးကွၢ်မီၤ, လၢမူခိၣ်န့ၣ် လီၢ်ပစိာ်အိၣ်ဝဲတဖျၢၣ်+ ဒီးပှၤအိၣ်ဝဲတဂၤလၢ အဆ့ၣ်နီၤလၢ အလိၤလီၤ.
၃ ဒီးပှၤလၢအဆ့ၣ်နီၤဝဲတဂၤန့ၣ် ဖျါလီၤဂာ်ဒ် တၢ်မျၢ်နကၤသွဲး+ ဒီးတၢ်မျၢ်ဆီသွံၣ်အသိး ဒီးတၢၢ်ကွဲၤလၢ အဖျါလီၤဂာ်လၢ တၢ်မျၢ်လါဟ့န့ၣ်+ အိၣ်ဝးတရံးဝဲ လီၢ်ပစိာ်လီၤ.
၄ ဒီးလၢ လီၢ်ပစိာ်အဃၢၤဝးဝးန့ၣ် လီၢ်ပစိာ် အိၣ်ဝဲ ၂၄ ဖျၢၣ် ဒီးပှၤသူၣ်က့သးပှၢ် ၂၄ ဂၤ+ လၢအကၤဝဲ တၢ်ကူတၢ်ကၤ အဝါန့ၣ် ဆ့ၣ်နီၤဝဲလၢ လီၢ်ပစိာ်တဖၣ်အံၤအလိၤ ဒီးခိၣ်သလုးထူတဖၣ် အိၣ်ဝဲလၢ အဝဲသ့ၣ် အခိၣ်လိၤလီၤ.
၅ လီဝၢ်ဒံး,+ လီသီၣ်+ ဒီးတၢ်ကလုၢ်တဖၣ် ဟဲထီၣ်လၢ လီၢ်ပစိာ်တဖျၢၣ်န့ၣ် အအိၣ်လီၤ. ဒီးမ့ၣ်အူဒၢနွံဖျၢၣ် ကဲၤထီၣ်ဝဲလၢ လီၢ်ပစိာ်အမဲာ်ညါ ဒီးတၢ်သ့ၣ်တဖၣ်အံၤ အခီပညီမ့ၢ်ဝဲ ကစၢ်ယွၤ အသးနွံဖျၢၣ်လီၤ.+
၆ ဒီးလၢလီၢ်ပစိာ် အမဲာ်ညါန့ၣ် တၢ်အိၣ်ဝဲတခါလၢ အလီၤဂာ်ဒီး ပီၣ်လဲၣ်လၢ အဖျါလီၤဂာ်ဒ် မဲာ်ထံကလၤ+ မ့တမ့ၢ် လၢၢ်ဖျါကလၤအသိးလီၤ.
ဒီးခ့ရူာ်* လွံၢ်ဂၤအိၣ်ဝဲလၢ+ တၢ်ခၢၣ်သး ဖဲလီၢ်ပစိာ်အိၣ်ဝဲအလီၢ် ဒီးအိၣ်ဝးတရံးဝဲ လီၢ်ပစိာ်လီၤ. လၢအဝဲသ့ၣ် အမိၢ်ပှၢ်အလိၤလၢ အမဲာ်ညါတပၤ ဒီးလၢအချၢဃံန့ၣ် အိၣ်ဒီးမဲာ်ချံပှဲၤပှဲၤလီၤ.
၇ ခ့ရူာ်အဆိကတၢၢ်တဂၤန့ၣ် လီၤဂာ်ဒီးခ့ယုၢ်,+ ခ့ရူာ်ခံဂၤတဂၤန့ၣ် လီၤဂာ်ဒီးကျီၢ်ဖါ,+ ခ့ရူာ်သၢဂၤတဂၤန့ၣ်+ အမဲာ်သၣ်လီၤဂာ်ဒီး ပှၤပိာ်ခွါအမဲာ်သၣ် ဒီးခ့ရူာ်လွံၢ်ဂၤတဂၤန့ၣ်+ လီၤဂာ်ဒီး လံာ်ကြီကြာ်လၢ အယူၤဝဲန့ၣ်လီၤ.+
၈ ဒီးခ့ရူာ်လွံၢ်ဂၤအံၤ တဂၤစုာ်စုာ်န့ၣ် အဒံးဆ့အိၣ်ဝဲဃုဘ့ၣ် ဒီးလၢအဒံးဆ့တဖၣ်အံၤအလိၤန့ၣ် အိၣ်ပှဲၤဝဲဒီး မဲာ်ချံတဖၣ်ဝးဝးလီၤ.+ အဝဲသ့ၣ် ဆဲးတဲဝဲ ဒီနံၤဒီနၤလၢ “ယဟိဝၤယွၤ*+ လၢအမ့ၢ် သ့တၢ်လၢာ်ကစၢ် လၢအအိၣ်ဝဲ, လၢအအိၣ်ပာ်စၢၤဝဲ, လၢအကဟဲဝဲတဂၤန့ၣ်+ စီဆှံ, စီဆှံ, စီဆှံဝဲလီၤ.”
၉ ဖဲခ့ရူာ်တဖၣ် မၤလၤကပီၤ ဒီးယူးယီၣ် ဒီးစံးဘျုးစံးဖှိၣ် ပှၤလၢအဆ့ၣ်နီၤလၢ လီၢ်ပစိာ်အလိၤလၢ အမူဝဲ လီၤထူလီၤယိာ်တဂၤ+ တဘျီဂ့ၤတဘျီဂ့ၤအခါ
၁၀ ပှၤသူၣ်က့သးပှၢ် ၂၄ ဂၤန့ၣ်+ ထိၣ်လီၤပှီၤအသးလၢ ပှၤလၢအဆ့ၣ်နီၤလၢ လီၢ်ပစိာ်အလိၤတဂၤန့ၣ် အမဲာ်ညါ ဒီးဘူၣ်ထီၣ်ဘါထီၣ် ပှၤလၢအမူဝဲ လီၤထူလီၤယိာ်တဂၤအံၤလီၤ. ဒီးအဝဲသ့ၣ်ကွံာ်လီၤဝဲ အခိၣ်သလုးလၢ လီၢ်ပစိာ်အမဲာ်ညါ ဒီးတဲဝဲလၢ
၁၁ “ပကစၢ်ယဟိဝၤယွၤဧၢ, နတ့လီၤတၢ်ခဲလၢာ်+ ဒီးခီဖျိလၢ နတၢ်ဘၣ်သးအဃိ တၢ်ဘၣ်တ့တဖၣ် ဟဲကဲထီၣ်ဝဲ ဒီးဘၣ်တၢ်တ့လီၤအီၤလီၤ. အဃိ နကြၢးဒိးန့ၢ်ဘၣ် တၢ်လၤတၢ်ကပီၤ,+ တၢ်ယူးယီၣ်+ ဒီးတၢ်စိတၢ်ကမီၤလီၤ.”+
တၢ်ဂ့ၢ်အဘျဲၣ်တဖၣ်
^ ခ့ရူာ်န့ၣ် မ့ၢ်ဝဲ မူခိၣ်ကလူးလၢ အပတီၢ်ထီတဖၣ်.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
