လီၣ်ဖျါ ၆:၁-၁၇
-
သိဖိ အိးထီၣ်ဝဲတၢ်စဲပနီၣ် အဆိကတၢၢ်ဃုခါ (၁-၁၇)
-
ပှၤလၢအမၤနၢၤတၢ်တဂၤ အိၣ်ဝဲလၢ ကသ့ၣ်ဝါအလိၤ (၁, ၂)
-
ပှၤလၢအဒိးကသ့ၣ် အလွဲၢ်ဂီၤန့ၣ် ထုးထီၣ်ကွံာ် တၢ်မုာ်တၢ်ခုၣ် (၃, ၄)
-
ပှၤလၢအဒိးကသ့ၣ်သူန့ၣ် ဒုးအိၣ်ထီၣ်ဝဲ တၢ်သၣ်ဝံၤလီၤဒိ (၅, ၆)
-
ပှၤလၢအဒိးကသ့ၣ်လၢ အလီၤဝါတဒုန့ၣ် အမံၤမ့ၢ်ဝဲတၢ်သံ (၇, ၈)
-
ပှၤလၢဘၣ်တၢ်မၤသံအီၤတဖၣ် အိၣ်လၢတၢ်လုၢ်လီၢ် အဖီလာ် (၉-၁၁)
-
ဟီၣ်ခိၣ်ဟူးဝဲဖးဒိၣ် (၁၂-၁၇)
-
၆ ဒီးယထံၣ် သိဖိအိးထီၣ်+ တၢ်စဲပနီၣ်နွံခါအကျါ အဆိကတၢၢ်တခါ+ ဒီးယနၢ်ဟူ ခ့ရူာ်အဆိကတၢၢ်တဂၤ+ တဲထီၣ်တၢ်လၢ အကလုၢ်လၢ အလီၤဂာ်ဒ်လီသီၣ်လၢ “ဟဲဟီ.”
၂ ဒီးယထံၣ်ဘၣ် ကသ့ၣ်ဝါတဒု+ ဒီးပှၤလၢအဆ့ၣ်နီၤလၢ အလိၤတဂၤန့ၣ် အိၣ်ဒီးအချံၣ်လီၤ. ဒီးကစၢ်ယွၤ ဟ့ၣ်လီၤအီၤလၢ ခိၣ်သလုး+ ဒီးအဝဲလဲၤမၤနၢၤတၢ် ဒ်သိးအကမၤနၢၤတၢ် တုၤလၢအဝံၤတစုလီၤ.+
၃ ဖဲသိဖိအိးထီၣ် တၢ်စဲပနီၣ် ခံခါတခါအဆၢကတီၢ်န့ၣ် ယနၢ်ဟူခ့ရူာ်ခံဂၤတဂၤ+ တဲဝဲလၢ “ဟဲဟီ.”
၄ ဒီးကသ့ၣ်အဂၤတဒုလၢ အလွဲၢ်ဂီၤန့ၣ် ဟဲထီၣ်ဝဲလီၤ. ဒီးပှၤလၢ အဒိးအီၤတဂၤန့ၣ် ဒိးန့ၢ်ဘၣ် တၢ်စိတၢ်ကမီၤလၢ အကထုးထီၣ်ကွံာ် တၢ်မုာ်တၢ်ခုၣ်လၢ ဟီၣ်ခိၣ်ချၢ ဒ်သိး ပှၤကမၤသံလိာ်သး တဂၤဒီးတဂၤလီၤ. ဒီးအဝဲဒိးန့ၢ်ဘၣ် နးဖးဒိၣ်တဘ့ၣ်လီၤ.+
၅ ဖဲသိဖိအိးထီၣ် တၢ်စဲပနီၣ် သၢခါတခါ+ အဆၢကတီၢ်န့ၣ် ယနၢ်ဟူ ခ့ရူာ်သၢဂၤတဂၤ+ တဲဝဲလၢ “ဟဲဟီ.” ဒီးယထံၣ် ကသ့ၣ်သူတဒု ဒီးပှၤလၢအဒိးအီၤတဂၤန့ၣ် စိာ်ဝဲဒီးစီၤပီၢ်လီၤ.
၆ ယနၢ်ဟူတၢ်လၢ အလီၤဂာ်ဒီးတၢ်အကလုၢ် ဟဲသီၣ်ထီၣ်လၢ ခ့ရူာ်လွံၢ်ဂၤအခၢၣ်သး ဒီးအတဲဝဲလၢ “ဘုကၠူၣ်တသလိး* လၢစ့ဒန့ၤရံၤတဘ့ၣ်*+ အဂီၢ် ဒီးဘုမုယီၤသၢသလိးလၢ စ့ဒန့ၤရံၤတဘ့ၣ်အဂီၢ်လီၤ. ဒီးတဘၣ်ပျဲ သ့ၣ်စၤယံးအသိ ဒီးစပံးထံတဖၣ် လၢာ်ကွံာ်တဂ့ၤ.”+
၇ ဖဲသိဖိအိးထီၣ် တၢ်စဲပနီၣ် လွံၢ်ခါတခါ အဆၢကတီၢ်န့ၣ် ယနၢ်ဟူ ခ့ရူာ်လွံၢ်ဂၤတဂၤ+ တဲဝဲလၢ “ဟဲဟီ.”
၈ ဒီးယထံၣ်ဘၣ် ကသ့ၣ်လၢအလီၤဝါတဒု ဒီးပှၤလၢအဆ့ၣ်နီၤလၢ အလိၤတဂၤန့ၣ် အမံၤမ့ၢ်တၢ်သံလီၤ. ဒီးတၢ်သွၣ်ခိၣ်* ပိာ်ထီၣ်အခံဘူးဘူးလီၤ. ဒီးတၢ်ဟ့ၣ်လီၤအဝဲသ့ၣ် တၢ်စိတၢ်ကမီၤလၢ ဟီၣ်ခိၣ်လွံၢ်ပူတပူအဖီခိၣ် ဒ်သိး အကမၤသံတၢ် ခီဖျိနးဖးထီတဘ့ၣ်, တၢ်သၣ်ဝံၤလီၤဒိ,+ တၢ်ဆူးတၢ်ဆါလၢ အမၤသံတၢ် ဒီးခီဖျိလၢ ဆၣ်ဖိကီၢ်ဖိ အမံၤတဖၣ်လၢ ဟီၣ်ခိၣ်ချၢလီၤ.+
၉ ဖဲသိဖိအိးထီၣ် တၢ်စဲပနီၣ် ယဲၢ်ခါတခါ အဆၢကတီၢ် ပှၤလၢအဘၣ်တၢ်မၤသံအီၤ+ ခီဖျိလၢ ကစၢ်ယွၤ အကလုၢ်ကထါအဃိ ဒီးခီဖျိလၢ အဝဲသ့ၣ် အတၢ်စံၣ်တဲၤတဲလီၤတၢ်မၤလၢ+ အမၤတ့ၢ်ဝဲအဃိန့ၣ် ယထံၣ်အဝဲသ့ၣ်အသွံၣ် လၢတၢ်လုၢ်လီၢ် အဖီလာ်လီၤ.+
၁၀ အဝဲသ့ၣ် ကိးထီၣ်ဝဲလၢ အကလုၢ်ဖးဒိၣ်လၢ “တၢ်ပၢကစၢ်လၢ အစီဆှံ ဒီးမ့ၢ်ဝဲတီဝဲတဂၤဧၢ,+ နကစံၣ်ညီၣ် ဒီးနကဟ့ၣ်ကၣ် ပှၤအိၣ်လၢ ဟီၣ်ခိၣ်ချၢတဖၣ်လၢ ပသွံၣ်အဃိ ဆံးယံာ်လဲၣ်.”+
၁၁ ဒီးကစၢ်ဟ့ၣ်လီၤ အဝဲသ့ၣ်တဂၤစုာ်စုာ် လၢဆ့ဝါဖးထီလီၤ.+ ဒီးကစၢ်တဲဘၣ်အဝဲသ့ၣ်လၢ အဝဲသ့ၣ်ကဘၣ် ဆဲးအိၣ်ခိးဆူညါ တစိၢ်ဖိတုၤလၢ အဝဲသ့ၣ်အဒီပုၢ်ဝဲၢ်ခွါတဖၣ် ဒီးကုၢ်ဒ်သိးဒီးအီၤ လၢအဘူးကဘၣ် တၢ်မၤသံအီၤ ဒ်အဝဲသ့ၣ်အနီၢ်ကစၢ် ဘၣ်တၢ်မၤသံတ့ၢ်အီၤအသိးန့ၣ် အနီၣ်ဂံၢ်ပှဲၤထီၣ်ဝဲတစုလီၤ.+
၁၂ ဒီးယထံၣ်လၢ သိဖိအိးထီၣ်ဝဲ တၢ်စဲပနီၣ် ဃုခါတခါဒီး ဟီၣ်ခိၣ်ဟူးဝဲဖးဒိၣ် ဒီးမုၢ်န့ၣ်သူထီၣ်ဒ် ထၢၣ်တၢ်ကံးညာ်* လၢဘၣ်တၢ်တ့အီၤလၢ တၢ်ဆူၣ်အသိး* ဒီးလါဒီတဘ့ၣ်န့ၣ် ကဲထီၣ်ဒ် တၢ်သွံၣ်အသိးလီၤ.+
၁၃ ဒီးဆၣ်တဖၣ်လၢမူခိၣ်န့ၣ် လီၤတဲာ်လၢဟီၣ်ခိၣ်ချၢ ဒ်ချၢၣ်ဒၢသၣ်လၢ အတမံဒံးဘၣ် လီၤတဲာ်ဝဲ ခီဖျိကလံၤလၢအဆူၣ် မၤဟူးမၤဝးဝဲ ချၢၣ်ဒၢထူၣ်အဃိအသိးလီၤ.
၁၄ ဒီးမူခိၣ်လီၤမၢ်ကွံာ်ဝဲ ဒ်လံာ်ထူ ဘၣ်တၢ်ထူထီၣ်အီၤအသိး+ ဒီးကစၢၢ်ကလိ ဒီးကီးကိးဖျၢၣ်ဒဲး ဘၣ်တၢ်သုးကွံာ်အီၤလၢအလီၢ်လီၤ.+
၁၅ ဒီးစီၤပၤတဖၣ် လၢဟီၣ်ခိၣ်ချၢ, ပဒိၣ်ပပှၢ်လၢ အပတီၢ်ထီတဖၣ်, သုးခိၣ်တဖၣ်, ပှၤထူးပှၤတီၤ, ပှၤလၢအဂံၢ်ဆူၣ်ဘါဆူၣ်, ကုၢ်ကိးဂၤဒဲး ဒီးပှၤလၢအအိၣ်ဒီး တၢ်သဘျ့ခဲလၢာ်န့ၣ် အိၣ်ခူသူၣ်လၢ လ့တဖၣ်အပူၤ ဒီးလၢကစၢၢ်ကလိတဖၣ် အလၢၢ်ဧိၤလ့ဧိၤအကျါလီၤ.+
၁၆ ဒီးအဝဲသ့ၣ် ဆဲးတဲဘၣ် ကစၢၢ်တဖၣ် ဒီးလၢၢ်ဧိၤလ့ဧိၤတဖၣ်လၢ “လီၤတဲာ်လၢပလိၤ+ ဒီးပာ်ခူသူၣ် ပဝဲသ့ၣ်တဖၣ်လၢ ပှၤလၢအဆ့ၣ်နီၤလၢ လီၢ်ပစိာ်တဂၤန့ၣ်+ အမဲာ်ညါ ဒီးလၢသိဖိ အတၢ်သးဒိၣ်ထီၣ်တက့ၢ်.+
၁၇ အဝဲသ့ၣ် အတၢ်သးဒိၣ်ထီၣ် အမုၢ်နံၤဖးဒိၣ် ဟဲတုၤလံ+ ဒီးမတဂၤလဲၤခီဖျိအီၤ ကသ့တဂၤလဲၣ်.”+
တၢ်ဂ့ၢ်အဘျဲၣ်တဖၣ်
^ ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ ပှၤရိမ့ၤဖိ အစ့လၢ အထဲသိးဒီး ပှၤမၤတၢ်ဖိ အဘူးအလဲ တသီအဂီၢ်. ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
^ လၢကြံးကျိာ် မ့ၢ်ဝဲ ဟ့ဒံ(စ်). ကွၢ် တၢ်ကတိၤအခီပညီ.
^ ကွၢ် တၢ်ကတိၤအခီပညီ.
^ ဘၣ်သ့ၣ်သ့ၣ် မဲာ်တဲးလဲးအဆူၣ်.
