၁ ပ့းတရူး ၅:၁-၁၄
၅ ခီဖျိလၢ ယမ့ၢ်စ့ၢ်ကီး တၢ်အိၣ်ဖှိၣ်သးပှၢ် ဒီးပှၤလၢအထံၣ်တ့ၢ် တၢ်လၢ ခရံာ်တူၢ်ဘၣ်ဝဲတဖၣ် ဒီးပှၤလၢအကန့ၢ်ဃုာ် တၢ်လၤကပီၤလၢ တၢ်ကလီၣ်ဖျါထီၣ်အီၤအဃိ+ ယဃ့ကညး တၢ်အိၣ်ဖှိၣ်သးပှၢ်တဖၣ် လၢသုကျါ ဒ်အံၤလီၤ.
၂ ဒ်ပှၤကွၢ်သိအသိး အံးထွဲကွၢ်ထွဲ ကစၢ်ယွၤအသိလၢ+ အအိၣ်လၢ သုတၢ်ကွၢ်ထွဲ အဖီလာ်တက့ၢ်. ဒ်ပှၤကွၢ်ထွဲတၢ်တဖၣ်အသိး မၤသုမူဒါလၢ တၢ်သူၣ်အိၣ်သးအိၣ်လၢ ကစၢ်ယွၤအမဲာ်ညါ+ ဒီးတမ့ၢ်လၢ တၢ်မၢဆူၣ်အဃိဘၣ်န့ၣ်တက့ၢ်.+ ဒီးတဘၣ်မၤအီၤလၢ တၢ်သးကွံလၢ သုကမၤန့ၢ်တၢ်လၢ သုနီၢ်ကစၢ်အဂီၢ်အဃိတဂ့ၤ. မၤအီၤလၢ တၢ်သူၣ်ဆူၣ်သးဆူၣ်အပူၤတက့ၢ်.
၃ ဒီးတဘၣ်ပာ်သုသး ဒ်ကစၢ်အသိး လၢပှၤလၢအမ့ၢ် ကစၢ်ယွၤ အတၢ်န့ၢ်သါအံၤ အဖီခိၣ်တဂ့ၤ.+ လၢတၢ်န့ၣ်အလီၢ် ကဲထီၣ်တၢ်ဒိတၢ်တဲာ်လၢ သိတဖုန့ၣ်အဂီၢ်တက့ၢ်.+
၄ ဖဲပှၤကွၢ်သိအခိၣ်+ ပာ်ဖျါထီၣ်အသးအခါ သုကဒိးန့ၢ်ဘၣ် တၢ်လၤကပီၤအခိၣ်သလုးလၢ အဟးဂီၤတသ့ဘၣ်လီၤ.+
၅ ဒ်န့ၣ်အသိး သုဝဲလၢအမ့ၢ် ပိာ်ခွါသးစၢ်တဖၣ်န့ၣ် ဒိးပၢသုသးလၢ ပိာ်ခွါလၢ အသးပှၢ်တဖၣ်အဖီလာ်တက့ၢ်.+ ဘၣ်ဆၣ် သုဝဲခဲလၢာ် ရ့လိာ်သးတဂၤဒီးတဂၤလၢ တၢ်ဆီၣ်လီၤသးအပူၤတက့ၢ်. ကစၢ်ယွၤန့ၣ် ထီဒါ ပှၤလၢအပာ်ထီၣ်ထီအသး ဒီးမ့မ့ၢ်ပှၤလၢ အဆီၣ်လီၤအသးန့ၣ်+ အဝဲပာ်ဖျါထီၣ် တၢ်သးကညီၤ ဒိၣ်ဒိၣ်မုၢ်မုၢ်လၢ အဝဲသ့ၣ်အဖီခိၣ်လီၤ.
၆ အဃိ ဆီၣ်လီၤသုသးလၢ ကစၢ်ယွၤလၢ အစိကမီၤဒိၣ်တဂၤန့ၣ် အစုဖီလာ်တက့ၢ်. သုမ့ၢ်မၤဒ်န့ၣ်ဒီး တၢ်ဆၢကတီၢ်မ့ၢ်ဘၣ်န့ၣ်+ အဝဲ ကပာ်ထီၣ်ထီ သုလီၤ.
၇ ဒီးမ့ၢ်လၢ ကစၢ်ယွၤ သးအိၣ်သုအဃိ+ ပာ်ထီၣ် သုတၢ်ဘၣ်ယိၣ်ဘၣ်ဘှီခဲလၢာ်လၢ အအိၣ်တက့ၢ်.+
၈ အိၣ်ဆၢပံၢ်ကလာ် ဒီးအိၣ်ပလီၢ်သးတက့ၢ်.+ သုဒုၣ်သုဒါ မုၣ်ကီၤလံၢ် ဟးဝ့ၤဝီၤ ဒ်ခ့ယုၢ်လၢအကညီၤတၢ် ရုၢ်ရုၢ်အသိး ဒီးဃုပှၤတဂၤဂၤလၢ+ အကယူၢ်လီၤကွံာ်ဝဲလီၤ.
၉ ဘၣ်ဆၣ် ထီဒါအီၤ+ ဒီးအိၣ်ဆၢထၢၣ် ဂၢၢ်ဂၢၢ်ကျၢၤကျၢၤလၢ တၢ်နာ်အပူၤတက့ၢ်. ဒ်သုသ့ၣ်ညါအသိး သုဒီပုၢ်ဝဲၢ်ခဲလၢာ်လၢ ဟီၣ်ခိၣ်ဒီဘ့ၣ်န့ၣ်+ တူၢ်ဘၣ်စ့ၢ်ကီးတၢ်နးတၢ်ဖှီၣ် ဒ်အံၤတဖၣ်လီၤ.
၁၀ ဘၣ်ဆၣ် သုတူၢ်တၢ်တစိၢ်တလီၢ် မ့ၢ်ဝံၤအလီၢ်ခံ တၢ်သးကညီၤ ဒိၣ်ဒိၣ်မုၢ်မုၢ်ခဲလၢာ် အကစၢ်လၢ အကိးန့ၢ်သု ခီဖျိခရံာ် ဒ်သိးသုကဒိးန့ၢ်ဘၣ် တၢ်လၤကပီၤ အထူအယိာ်အဂီၢ်န့ၣ်+ အနီၢ်ကစၢ်ဒၣ်ဝဲ ကဟ့ၣ်သုတၢ်သိၣ်လိ တုၤလၢအလၢအပှဲၤတစုလီၤ. အဝဲကမၤဂၢၢ်မၤကျၢၤသု,+ အဝဲကဒုးဆူၣ်ထီၣ်သု+ ဒီးအဝဲကဒုးဆၢထၢၣ်သု ဂၢၢ်ဂၢၢ်ကျၢၤကျၢၤလီၤ.
၁၁ တၢ်ဂံၢ်တၢ်ဘါ မ့ၢ်အတၢ် လီၤထူလီၤယိာ်လီၤ. အၤမ့ၣ်.
၁၂ ယကွဲးန့ၢ်သု လံာ်ပရၢ ဖုၣ်ဖုၣ်ဖိတဘ့ၣ်အံၤ ဒ်သိးကဟ့ၣ်ဂံၢ်ဟ့ၣ်ဘါသု ဒီးအုၣ်ယသးလၢ တၢ်သူၣ်ဆူၣ်သးဆူၣ်အပူၤ ဘၣ်ဃးဒီး ကစၢ်ယွၤ အတၢ်သးကညီၤဒိၣ်ဒိၣ်မုၢ်မုၢ်န့ၣ် မ့ၢ်တၢ်လၢအမ့ၢ်အတီလီၤ. ယကွဲးလံာ်အံၤခီဖျိ စီၤစံၤလဝ့နုၤ*+ လၢယပာ်အီၤဒ် ဒီပုၢ်ဝဲၢ်လၢ အသးတီတဂၤလီၤ. ဆၢထၢၣ်ဂၢၢ်ဂၢၢ်ကျၢၤကျၢၤလၢ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် အပူၤတက့ၢ်.
၁၃ ပိာ်မုၣ်လၢ အအိၣ်လၢ ဝ့ၢ်ဘၤဘူၤလိၣ်အပူၤ လၢအဘၣ်တၢ်ဃုထၢအီၤ ဒ်သုအသိး ဒီးစီၤမၢ်ကူးလၢ+ ယပာ်အီၤဒ် ယဖိခွါအသိးန့ၣ် ဆၢဂ့ၤဆၢဝါသု စ့ၢ်ကီးလီၤ.
၁၄ ဆၢဂ့ၤဆၢဝါလိာ်သး တဂၤဒီးတဂၤလၢ တၢ်အဲၣ်တၢ်ကွံအပူၤတက့ၢ်.*
သုဝဲခဲလၢာ် လၢအမ့ၢ် ခရံာ်အပျဲၢ်အဘီၣ်တဖၣ်န့ၣ် မ်သုအိၣ်ဒီး တၢ်ဃူတၢ်ဖိးတက့ၢ်.
