ဖဲဖိသၣ်အိၣ်ဖျဲၣ်ထီၣ်အခါန့ၣ် ကမ့ၢ်တၢ်လီၤသူၣ်ပိၢ်သးဝး ဒီးတကတီၢ်ဃီန့ၣ် ကကဲထီၣ်တၢ်သူၣ်လီၤဘှံး သးလီၤတီၤလၢ နီၢ်ဒီမိဝၤခံၤဂၤလၢာ်အဂီၢ်လီၤ. ဒ်သုထီၣ်သီမိၢ်လီၢ်ပၢ်လီၢ်အသိး ဘၣ်သ့ၣ်သ့ၣ် သုကကမၢကမၣ်ဘၣ်လၢ သုဘၣ်ဟ့ၣ်တၢ်ဆၢကတီၢ်ဒီး တၢ်ဂံၢ်တၢ်ဘါအါမးလၢ တၢ်လုၢ်ဒိၣ်ထီၣ်ဖိအဂီၢ်န့ၣ်လီၤ. ခီဖျိသုမံတလၢမံ ဒီးသုတၢ်သူၣ်ဟူးသးဂဲၤ ဆီတလဲအသးအဃိ တၢ်ကီတၢ်ခဲ ဟဲအိၣ်ထီၣ်လၢ သုတၢ်ရ့လိာ်သးအပူၤသ့လီၤ. ဒ်သိးသုအံးထွဲကွၢ်ထွဲ သုဖိဆံးဒီးမၤဂၢၢ်မၤကျၢၤ သုတၢ်ဆီဟံၣ်ဆီဃီ ကသ့ဒံးအဂီၢ်န့ၣ် သုဒီမိဝၤခံဂၤလၢာ် သုကဘၣ်ဆီတလဲ သုတၢ်အိၣ်သးန့ၣ်လီၤ. ဖဲသုကွၢ်ဆၢၣ်မဲာ် တၢ်ကီတၢ်ခဲသ့ၣ်တဖၣ်အံၤအခါ လံာ်စီဆှံအတၢ်ဟ့ၣ်ကူၣ် မၤစၢၤသုကသ့ဒ်လဲၣ်.

လံာ်စီဆှံစံးဝဲ– “တၢ်အဲၣ်တၢ်ကွံ ဝံသးစူၤတၢ်ဃဲးဃဲး, ဒီးမၤဂ့ၤတၢ်” လီၤ. တၢ်အဲၣ်တၢ်ကွံ “တဃုဘၣ်အတၢ်ဒၣ်ဝဲဘၣ်, အသးတဒိၣ်ထီၣ်” စ့ၢ်ကီးဘၣ်. (၁ ကရံၣ်သူး ၁၃:၄, ၅) ဒ်ပှၤကဲထီၣ်သီ မိၢ်တဂၤအသိး နသးကစၢၢ်ဆၢလၢ နကကဟုကယာ်နဖိန့ၣ် မ့ၢ်ဒၣ်န့ဆၢၣ်လီၤ. လၢတၢ်န့ၣ်အဃိ ဘၣ်သ့ၣ်သ့ၣ် နဝၤကတူၢ်ဘၣ်လၢ နကွၢ်ကပာ်အီၤအဃိ တဘၣ်သးပ့ၤနီၣ်လၢ အဝဲလိၣ်ဘၣ်စ့ၢ်ကီး နတၢ်သးစၢၢ်ဆၢန့ၣ်တဂ့ၤ. လၢတၢ်အဲၣ်ဒီးတၢ်ဝံသးစူၤအပူၤ ဒုးသ့ၣ်ညါအီၤလၢနလိၣ်ဘၣ် အဝဲအတၢ်မၤစၢၤလၢ တၢ်အံးထွဲကွၢ်ထွဲ ဖိသၣ်အဂီၢ်န့ၣ်တက့ၢ်.

“ပိာ်ခွါသ့ၣ်ဧၢ. . .အိၣ်ဒီးသုမါဒ် တၢ်သ့ၣ်ညါအသိး” န့ၣ်တက့ၢ်. (၁ ပ့းတရူး ၃:၇) နၢ်ပၢၢ်စၢၤနမါလၢ ဘၣ်သူဝဲအဂံၢ်အဘါ အါတက့ၢ်လၢ နဖိအဂီၢ်န့ၣ်တက့ၢ်. အဝဲဒိးန့ၢ်ဘၣ်မူဒါအသီတဖၣ်ဒီး ဘၣ်သ့ၣ်သ့ၣ် ကကီခဲဝဲလၢအဂီၢ်, ကလီၤဘှံးလီၤတီၤ မ့တမ့ၢ် အသးကဟးဂီၤဝဲဒၣ်လီၤ. တဘျီတခီၣ် ကသးအ့န့နၤဘၣ်ဆၣ် ဂုာ်ကျဲးစၢး ပၢၤဃာ် တၢ်ဃူတၢ်ဖိးတက့ၢ်. မ့ၢ်လၢ “ပှၤလၢအသးထီၣ်ကီန့ၣ် ဂ့ၤန့ၢ်ပှၤဆူၣ်တက့ၢ်” အဃိလီၤ. (ကတိၤဒိ ၁၆:၃၂) အိၣ်ဒီးတၢ်သ့ပဲာ်ဖးနီၤဖးတၢ်ဂ့ၤဂ့ၤ ဒီးဆီၣ်ထွဲမၤ စၢၤ အဝဲအတၢ်လိၣ်ဘၣ်တက့ၢ်.—ကတိၤဒိ ၁၄:၂၉.

တၢ်လၢနမၤသ့–

• ပၢ်သ့ၣ်ဧၢ– မၤစၢၤနမါလၢ တၢ်အံးထွဲကွၢ်ထွဲဖိသၣ်လၢ မုၢ်နၤအကတီၢ်ဒၣ်လဲာ်န့ၣ်တက့ၢ်. ဒ်သိးနဟ့ၣ် နဖိနမါတၢ်ဆၢကတီၢ် ကန့ၢ်အါထီၣ်အဂီၢ် မၤစှၤလီၤတၢ်ဆၢကတီၢ်လၢ နသူအီၤလၢတၢ်မၤအဂၤ အဂီၢ်န့ၣ်တက့ၢ်

• မိၢ်သ့ၣ်ဧၢ– ဖဲနဝၤတဲနၤလၢ ကကွၢ်စၢၤနဖိအခါန့ၣ် တူၢ်လိာ်အတၢ်မၤစၢၤတက့ၢ်. အဝဲကွၢ်ထွဲဖိသၣ် မ့ၢ်တသ့ဂ့ၤဂ့ၤသနာ်က့ တဘၣ်ဒူအီၤကလာ်အီၤတဂ့ၤ. လၢတၢ်န့ၣ်အလီၢ် ကဘၣ်မၤဝဲဒ်လဲၣ်ဒ်လဲၣ်န့ၣ် မၤပၠးအီၤလၢ တၢ်သးစူၤအပူၤတက့ၢ်

လံာ်စီဆှံစံးဝဲ– “ပှၤခံဂၤန့ၣ်ကကဲထီၣ် တၢ်တသွံၣ်ဃီတညၣ်ဃီ” လီၤ. (၁ မိၤၡ့ ၂:၂၄) နဟံၣ်ဖိဃီဖိအသီ မ့ၢ်အါထီၣ်တဂၤဒၣ်လဲာ် သ့ၣ်နီၣ်ထီၣ်လၢသုဒီမိဝၤခံဂၤ သုမ့ၢ်ဒံး “တၢ်တသွံၣ်ဃီ တညၣ်ဃီ” န့ၣ်တက့ၢ်. ဂုာ်ကျဲးစၢးမၤဂၢၢ်ကျၢၤထီၣ် သုတၢ်ရ့လိာ်သးန့ၣ်တက့ၢ်.

မါသ့ၣ်ဧၢ, စံးဘျုးစံးဖှိၣ်သုဝၤလၢ အတၢ်ဆီၣ်ထွဲမၤစၢၤ အဃိန့ၣ်တက့ၢ်. နတဲဖျါထီၣ်လၢ နစံးဘျုးဘၣ်အီၤန့ၣ် “မၤဘျါက့ၤတၢ်” သ့လီၤ. (ကတိၤဒိ ၁၂:၁၈) ဝၤသ့ၣ်ဧၢ, တဲဘၣ်သုမါလၢသုအဲၣ်အီၤဒီး သုပာ်လုၢ်ပာ်ပှ့ၤအီၤ ထဲလဲၣ်န့ၣ်တက့ၢ်. ပတြၢၤအီၤလၢ အတၢ်အံးထွဲကွၢ်ထွဲ ဟံၣ်ဖိဃီဖိအဃိန့ၣ်တက့ၢ်. —ကတိၤဒိ ၃၁:၁၀, ၂၈.

“မ်ပှၤသုတဃု အတၢ်ဒၣ်ဝဲနီတဂၤတဂ့ၤ, မ်အဃုပှၤဂၤအတၢ် ကိးအဂၤဒဲးတက့ၢ်.” (၁ ကရံၣ်သူး ၁၀:၂၄) ထီဘိန့ၣ်မၤတၢ်လၢ ကကဲဘျုးလၢ နသးသမူတံၤသကိး အဂီၢ်န့ၣ်တက့ၢ်. ဒ်သုမ့ၢ်နီၢ်ဒီမိဝၤအသိး ဟံးန့ၢ်တၢ်ဆၢကတီၢ်လၢ သုကကတိၤတၢ်, ပတြၢၤလိာ်သုသး, ဒီးဒိကနၣ်လိာ် သုတၢ်ကတိၤတက့ၢ်. ဘၣ်ဃးဒီး တၢ်မံဃုာ်လိာ်သးန့ၣ် တဘၣ်ကွၢ်တၢ်ထဲနဂီၢ်တဂ့ၤ. ဆိကမိၣ်နသးသမူတံၤသကိး အတၢ်လိၣ်ဘၣ်တက့ၢ်. လံာ်စီဆှံစံးဝဲလၢ “မ်ဝၤမၤတၢ်ကြၢးဒီးအမါ, ဒီးမါလၢအဝၤ ဒ်န့ၣ်အသိးစ့ၢ်ကီးတက့ၢ်.” (၁ ကရံၣ်သူး ၇:၃, ၄) လၢတၢ်န့ၣ်အဃိ သုခံဂၤကဘၣ်တဲသကိး တၢ်ဂ့ၢ်အံၤပျီပျီလီၤ. နတၢ်သူၣ်စူၤသးစူၤ ဒီးတၢ်နၢ်ပၢၢ်စၢၤန့ၣ် ကမၤဂ့ၤထီၣ်နတၢ်ရ့လိာ်သးလီၤ.

တၢ်လၢနမၤသ့–

• တဘၣ်သးပ့ၤနီၣ်လၢ သုကဟံးန့ၢ်တၢ်ဆၢကတီၢ်လၢ ထဲဒၣ်သုခံဂၤအဂီၢ်န့ၣ်တဂ့ၤ

• ပာ်ဖျါထီၣ်နတၢ်အဲၣ်ခီဖျိလၢ နမၤတၢ်လၢအဆံးကိာ်ဖိ ဒ်သိးဒီးနဟ့ၣ်အီၤ တၢ်ဟ့ၣ်ဖိတခါ မ့တမ့ၢ် ကွဲးန့ၢ်အီၤလံာ်ဖိ တကျိၤခံကျိၤတက့ၢ်

လံာ်စီဆှံစံးဝဲ– “လၢနမ့ၢ်ဖိဒံဖိသၣ်လံၤလံၤန့ၣ် နသ့ၣ်ညါတၢ်ကွဲးအသးစီဆှံတဖၣ်, လၢအဒုးကူၣ်သ့ကူၣ်ဘၣ်နၤ, တုၤလၢတၢ်အုၣ်က့ၤခီၣ်က့ၤနၤ” လီၤ. (၂ တံၤမသ့း ၃:၁၅) နကဘၣ်သိၣ်လိ နဖိဆံးဒ်လဲၣ်န့ၣ် ရဲၣ်ကျဲၤပာ်တက့ၢ်. ဖဲဖိသၣ်အိၣ်လၢ အမိၢ်အဟၢဖၢပူၤ အခါဒၣ်လဲာ် လီၤကမၢကမၣ်လၢ အဝဲအိၣ်ဒီးတၢ်သ့တၢ်ဘၣ်လၢ အမၤလိတၢ်သ့လီၤ. အဝဲတိၢ်နီၣ်နကလုၢ်ဘၣ်ဒီး သ့ၣ်ညါနတၢ်သူၣ်ဟူးသးဂဲၤသ့ဝဲလီၤ. ဖဲအဝဲမ့ၢ်ဒံး ဖိသၣ်အီၣ်နုၢ်အခါဒၣ်လဲာ် ဖးန့ၢ်အီၤလံာ်တက့ၢ်. မ့ၢ်တနၢ်ပၢၢ်ဝဲ တၢ်လၢနဖးသနာ်က့ ဖဲဒိၣ်ထီၣ်ဝဲအကတီၢ် တၢ်အံၤကမၤစၢၤအီၤလၢ ကကဲထီၣ်ပှၤအဲၣ်ဖးလံာ် ဖးလဲၢ်တဂၤန့ၣ်လီၤ.

နဖိတဆံးကဲၣ်ဆိးလၢ နကတဲဘၣ်အီၤ လၢကစၢ်ယွၤအဂ့ၢ်န့ၣ်ဘၣ်. ဖဲနဃ့ဘါထုကဖၣ်အခါ မၤသီၣ်နကလုၢ်တုၤ နဖိနၢ်ဟူတက့ၢ်. (၅ မိၤၡ့ ၁၁:၁၉) ဖဲနလိာ်ကွဲဒီးအီၤအခါဒၣ်လဲာ်န့ၣ် တဲဘၣ်အီၤယွၤအတၢ်ဘၣ်တ့ အဂ့ၢ်န့ၣ်တက့ၢ်. (စံးထီၣ်ပတြၢၤ ၇၈:၃, ၄) ဖိသၣ်ဒိၣ်ထီၣ်ဝဲဒၣ်ဒီး အဝဲကထံၣ်ဘၣ် နတၢ်အဲၣ်ယဟိဝၤယွၤ ဒီးအဝဲစ့ၢ်ကီးကအဲၣ်ယွၤလီၤ.

တၢ်လၢနမၤသ့–

• ဃ့ဘါထုကဖၣ် လီၤလီၤဆီဆီလၢ နကဒိးန့ၢ်တၢ်ကူၣ်သ့လၢ နကသိၣ်လိမၤယုၤ နဖိအဂီၢ်န့ၣ်တက့ၢ်

• တၢ်လၢနအဲၣ်ဒိး ဒုးသ့ၣ်ညါအီၤတဖၣ်န့ၣ် တဲဘၣ်အီၤခဲအံၤခဲအံၤတက့ၢ်. နမ့ၢ်မၤဒ်န့ၣ်န့ၣ် အဝဲမၤလိတၢ်ကသ့လၢ အီၣ်နုၢ်အခါလံၤလံၤန့ၣ်လီၤ