Nsangu ya mbote yina metuba ti bantu kevuanda na luzingu ya mvula na mvula awa na ntoto yakele na kati ya Biblia. (Nkunga 37:29) Biblia kele na mikanda ya fiotifioti 66. Nzambi sadilaka babakala ya kukuikama kana 40 samu basonika yau. Mikanda tanu ya ntete sonamaka na Moize bamvula 3 500 meluta. Mukanda ya nsuka sonamaka na ntumua Yoane bamvula 1 900 meluta. Bangindu ya nani bansoniki ya Biblia sonikaka? Nzambi tubilaka bau mambu na nzila ya mpeve ya longo na yandi (2 Samuele 23:2) Bau sonikaka bangindu ya Nzambi, kasi ya bau mosi ve. Na yau, Biblia kele mukanda ya Yehova.​—Tanga 2 Timoteo 3:16; 2 Piere 1:20, 21.

Tala video Biblia kele mukanda ya nani?

Beto mezaba ti Biblia kele mukanda ya Nzambi samu yau kesamunaka mambu yina kekuiza, mpe mutindu yina yau kesalamina. Muntu mosi ve lenda sala yau. (Yozue 23:14) Kaka Nzambi Nkua-Ngolo-Nionso lenda zaba na busikisiki mambu kekumina bantu na bilumbu kena kuiza.​—Tanga Yezaya 42:9; 46:10.

Yamebonga ti mukanda yina mekatuka na Nzambi yasuasana na mikanda nionso yankaka, mpe yau kele mutindu yina samu na Biblia. Bamiliare ya Babiblia memanisa kabulua na bankama ya bandinga. Atako bantu yankaka ketadilaka Biblia lokola mukanda ya ntama, mambu Biblia ketubaka kele na nguizani na siansi. Mpe bansoniki na yau kana 40 bavuandaka na nguizani na bampova na bau. * Katula yau, yina Biblia metuba samu na nzola yafueti katuka kaka na Nzambi ya kedika yina kele Nzambi ya nzola. Tii bubu yayi, mukanda yango kele kaka na ngolo ya kuvilula luzingu ya bantu mpe kubongisa yau. Mambu nionso yina kena kutinda mafunda ya bantu bandima ti Biblia kele Mpova ya Nzambi.​—Tanga 1 Batesalonika 2:13.

Tala video Yinki mutindu beto lenda ndima ti Biblia ketubaka kedika?

Biblia ketubilaka mingi nsangu ya mbote yina memonisa ti Nzambi kena zola kusala mambu ya mbote samu na bantu. Masonukua kena kumonisa mutindu bantu zimbisaka na ntonono ya luzingu ya bau diluaku ya mbote yina bavuandaka na yau ya kuvuanda na paladiso awa na ntoto, mpe mutindu nsukansuka, paladiso kevutukila diaka.​—Tanga Kusonga 21:4, 5.

Na kati ya Mpova ya Nzambi, beto kekuta diaka bansiku, bansikudukusu, mpe malongi. Katula yau, Biblia kele na bifuani yina kena kumonisa mutindu yina Nzambi kesadilaka bantu mambu. Bifuani yango kena sadisa beto beto zaba kana yandi kele muntu ya yinki mutindu. Na yau, Biblia lenda sadisa nge nge zaba Nzambi. Yau kena kumonisa diaka yina nge lenda sala samu na kukuma nkundi na yandi.​—Tanga Nkunga 19:7, 11; Yakobo 2:23; 4:8.

Mua mukanda yayi lenda sadisa nge nge bakusa Biblia na kusadilaka mayele yina Yesu sadilaka. Yandi vuandaka tubila kapu mosi na manima ya nkaka mpe kubangula ‘mfunu ya Masonukua.’​—Tanga Luka 24:27, 45.

Yakele na diambu mosi ve kele kitoko kuluta nsangu ya mbote yina mekatuka na Nzambi. Kasi bantu ya nkaka kemonaka yau mfunu mosi ve, mpe bayankaka kemonaka yau lokola nkuamusu. Kulemba nzutu ve. Kivuvu na nge ya kuvuanda na luzingu ya mvula na mvula na bilumbu kena kuiza metadila ngolo yina nge kena kusala samu na kuzaba Nzambi.​—Tanga Yoane 17:3.