YOMARA ye mpangi zandi Marcelo yo Hiver, bezingilanga kuna vata dimosi diakete kuna Guatemala. Yomara wayantika longoka e Bibila ye Mbangi za Yave ye kuna kwalanda, e mpangi zandi mpe batonda longoka e Bibila. Kansi, diambu diakala vo. Yau atatu mpofo bena ye ke bazeye tanga masono ma braile ko. Muna kuma kiaki, o nlongi au a Bibila, wabatangilanga e tini ye sono ya Bibila.

Diampasi mpe diakala kwa yau mu kwendanga muna tukutakanu. Ke dialendakananga ko kwa yau mu lwaka kuna Seka dia Kintinu dia kala lukufi mu tezo kia 40 ma kilometa. Kansi, ampangi babasadisanga mu kwenda muna tukutakanu twawonso. Vava bayantika vanga yiyekwa yau muna nkutakani, ampangi babasadisa mu lunda e yiyekwa yau muna ntu.

Muna ngonde ya Mayu ya mvu wa 2019, o tukutakanu twayantika vangamena muna vata diau. Muna kolo kiakina, akazi mosi basalanga se aviti a nzila a ngonde ke ngonde, bayenda zingila kuna vata dina. Bakala ye kani dia sadisa e mpangi tatu zazi kimana bazaya tanga yo soneka e braile, kana una vo akazi awaya ke bazaya braile ko, kansi bayenda kuna lundilu dia nkanda muna longoka una e braile isadilwanga ye ndekwa za kubalongela.

Ngonde tatu kaka zavioka, yau atatu bayantika tanga e braile, ediadi diabasadisa mu wokesa o zola kwau muna Yave. Owau, Yomara, Marcelo yo Hiver besalanga se aviti a nzila a ngonde ke ngonde. Marcelo selo kia salu. Betoma kuyivananga muna salu kia Yave tumingu twawonso. O vema kwau, sambukila kusambukilanga.

E mpangi zazi, betoma vutulanga matondo muna lusadisu lwawonso betambulanga muna nkutakani. Mpangi Yomara wavova vo: “Muna nkumbu a ntete kaka twamokena ye Mbangi za Yave, batoma kutusonga o zola kwa Kikristu.” Marcelo wakudikila: “Tuna ye akundi ambote mu nkutakani ye tuna muna kintwadi kia wan’angudi omu nza yawonso ana bayikakiana muna zola.” Kieleka, Yomara ye mpangi zandi Marcelo yo Hiver, bevingilanga ye kiese kiawonso e lumbu bemona o ntoto ukituka se paradiso.—Nku. 37:10, 11; Yes. 35:5.