FRANÇOIS una vo nkuluntu ozingilanga ku nsi mosi ya usukami, wavova vo: “Vava kiafokoka e nsolelo a nyadi, e mavwanga mayantika. Mavwanga mama mafila ulolo wa Mbangi za Yave mu sisa e nzo zau. Diampasi diakala muna solola lekwa kia dia ye nlongo. E lekwa ina yatekwanga ntalu yayingi yafwanga. E banco zawonso zakangama, e multicaixa ke zasalanga diaka ko.”

Vana vau, ampangi kuna vula bakubika nzimbu ye nlongo mu sadisa Mbangi za Yave ana basisa nzo zau yo tinina muna Maseka ma Kintinu muna nsi yawonso. E buka yau yole yasianga e mavwanga yakanga e nzila, kansi wau bazaya wo vo Mbangi za Yave ke bekuyisianga mu mambu ma tuyalu ko, baviokesanga makalu matukanga kuna vula.

François wavova vo: “Vava twayendanga kun’Eseka dimosi dia Kintinu, masoladi bayantika nonga ekalu twakala. Kansi, e mpunza zaviokela vana kati kweto. Vava twamona soladi diayiza zaulanga kuna twakala yo nkele andi vana koko, vana vau twavilula ekalu yo vutuka kuna vula. Twavutula matondo kwa Yave wau katuvuluza. Muna lumbu kialanda, mpangi 130 bakala mun’Eseka diadina dia Kintinu, batinina ku fulu kiakaka. Akaka bayiza kuna vula yo kubavana lusadisu lwa mwanda ye lwa nitu bavwanga o mfunu yavana mavwanga mafokoka.”

François wavova vo: “Kuna kwalanda, ampangi batwika nkanda miayingi kuna vula mu vutula matondo. Vava bamona una mpangi zau muna fulu yakaka babasadisila, diawokesa vuvu kiau muna Yave.”

Vava vebwanga e sumbula yovo vita, ke tuvovesanga mpangi zeto bena muna mpasi ko vo ‘bayangalala yo yukuta.’ (Yak. 2:15, 16) Kansi, tuvavanga lungisa nsatu zau za nitu. Diau adimosi mpe diavangama muna tandu kiantete. Vava balukiswa mu kuma kia mvengele wafinamanga, “alongoki, konso muntu mun’efuka diandi, bakanini o tuma lusadisu kwa wanangudi ana bena muna Yuda.”—Mav. 11:28-30.

Wau vo tu selo ya Yave, tukalanga ye luzolo lwa sadisa awana bena muna mpasi yo lungisa nsatu zau za nitu. Kansi, wantu lusadisu lwa mwanda mpe bavwidi o mfunu. (Mat. 5:3) Muna kubasadisa bazaya e nsatu zau za mwanda yo lungisa zo, Yesu watuma alandi andi mu kitula wantu s’alongoki. (Mat. 28:19, 20) Tusadilanga ntangwa, ngolo ye mavwa meto muna lungisa salu kiaki. Nze nkubika, tusadilanga nzimbu zakaka zitukanga muna tukau twa mvevo mu vana lusadisu lwa nitu. Kansi, ekani diantete dia tukau twatu i nungununa oma ma Kintinu yo samuna nsangu zambote. Muna mpila yayi, tusonganga zola kweto muna Nzambi ye muna mfinangani zeto.—Mat. 22:37-39.

Awana bevananga lusadisu muna salu kia Mbangi za Yave mu nza yawonso, balenda kala ye ziku vo tukau twau tusadilwanga mu mpila yambote. Nga olenda sadisa mpangi zaku bena muna mpasi? Nga ozolele vana moko muna salu kia kitula wantu s’alongoki? Avo i wau, “kunanginina mbote kw’awana bafweno yo ko, wau vo o koko kwaku kulenda yo vanga.”—Nga. 3:27.