Luvunu lwa Sia vo Nzambi Kena ye Nkumbu Ko

WANTU ADIEYI BEKWIKILANGA?

“Ke tuna ye ziku ko kana vo Nzambi una ye nkumbu. Avo nkumbu kena yau, ayeyi i nkumbu andi?”—David Cunningham wa Nlongi a Mambu ma Nzambi.

LUDI KIA NKAND’A NZAMBI.

Nzambi wavova vo: “Omono i Yave, eyayi i nkumbu ame.” (Yesaya 42:8) “Yave” i nkumbu a Nzambi. Muna Kiyibere, e nkumbu yayi isongele vo “On’okadisanga.”—Etuku 2:4.

Yave ozolele vo twasadila nkumbu andi. Nkand’a Nzambi uvovanga vo: ‘Yika nkumbu andi, nuzayisa mavangu mandi muna nkangu, nusamuna vo nkumbu andi yatunda.’—Yesaya 12:4.

Yesu wasadilanga nkumbu a Nzambi. Yesu wavova muna sambu vo: “Yabazayisa [alongoki a Yesu] nkumbu aku, nzayisa yo mpe.” Ekuma Yesu kazayisila nkumbu a Nzambi kw’alongoki andi? Yesu wakudikila vo: “O zola kuna [Nzambi] wanzola kwakal’omu yau, omono mpe omu yau.”—Yoane 17:26.

EKUMA DIADI DININA DIAMFUNU?

Walter Lowrie wa nlongi a mambu ma Nzambi wasoneka vo: “O muntu ona kazeye nkumbu a Nzambi ko, kanzeye kikilu ko. Avo ozayidi kaka Nzambi nze nkuma ankatu, kalendi kunzola ko.”

Muntu mosi oyikilwanga vo Victor wayendanga ku nzo a nzambi konso lumingu, kansi wamonanga vo kazeye Nzambi ko. I bosi wavova vo: “Yalongoka vo e nkumbu a Nzambi, Yave. Ediadi diatoma kungiangidika. Yamona nze mono ngwananene yo muntu Ona yawilanga kaka mu nsangu. Yayantika kwikila vo Nzambi una kieleka yo vanga yandi kikundi.”

Yave ofinamanga awana besadilanga nkumbu andi. Nzambi osianga nsilu kwa awana “bebadikanga nkumbu andi” vo: “Ikubafwil’e nkenda nze muntu ofwila mwan’andi on’okunsadilang’e nkenda.” (Malaki 3:16, 17) Nzambi osambulanga mpe awana bevovelanga nkumbu andi. Nkand’a Nzambi uvovanga vo: ‘Konso on’ovovela nkumbu a Yave, ovuluzwa.’—Roma 10:13.