MU MVU miavioka, muna zulunalu ya The Chosun Ilbo ya Coréia mwasonekwa ntu a diambu watokanesa wantu. Zulunalu yayi yayuvula vo: “Shim Cheong wa Nkento Ambote-Mbote Ona Walembi Zaya Diambu mu Kuma kia Yesu, Kubilungi Kayenda?”

Nkangu a Coréia ke bayangalela ntu a diambu wau ko, kadi Shim Cheong watoma zitiswanga wau vo wayekola moyo andi muna vuluza se diandi wa mpofo. Se mvu miayingi wantu bekunsanisinanga mu kuma kia vangu diandi. Kieleka, “Shim Cheong” wakituka se mbandu ambote kwa wan’amakento besadisanga mase mau kuna Coréia.

E ngindu za sia vo Shim Cheong kubilungi katubwa wau vo kakala Nkristu avubwa ko, wantu ayingi babadikila zo vo ke zansongi ko. Vana ntandu, nanga ndumba ndioyo wafwa vioka mvu miayingi vitila kialwaka malongi ma Kristu muna vata kazingilanga.

Muna zulunalu mwakala ye moko kia mfidi mosi a dibundu. Wayuvulwa kana vo wantu awonso bafwa lembi kala ye lau dia longoka malongi ma Yesu ku bilungi bia tiya batubwa. Nkia mvutu kavana? “Katuzeye ko. Kansi, tuna ye ziku vo vena ye diambu kevanga o Nzambi mu kuma kia wantu awaya.”

O nkanda Nova Enciclopédia Católica uvovanga vo: “Luvubu i diambu divwilu o mfunu muna vuluzwa. Nze una Kristu kavova, avo muntu kawutulukidi ko muna maza yo mwand’avelela, kalendi kota muna Kintinu kia Nzambi ko (Yoane 3:5).” Muna kuma kiaki, ayingi bekwikilanga vo awana befwanga lembi vubwa kubilungi bia tiya betubwanga yovo tumbwa mu mpila yakaka kuna nima lufwa.

Ayingi ke bekwikilanga muna malongi mama ko. Mafunda ye mafunda ma wantu bafwa lembi longoka Bibila. Nga wantu awaya tumbu kia mpasi zakwele mvu kuna bilungi bafwanukini? Adieyi Bibila kivovanga mu kuma kia diambu diadi?

Bibila kisonganga vo Nzambi ke vezanga wantu ko ana bafwa lembi longoka nkanikinu miandi. E sono kia Mavangu 17:30 kivovanga vo: “E tandu ya bubu, o Nzambi olandwidi yo.” Nkia vuvu kivananga Bibila mu kuma kia awana bafwa lembi kala ye lau dia longoka nkanikinu mia Nzambi?

Tulenda baka e mvutu muna dina Yesu kavovesa kwa kimpumbulu mosi wafwa vana ndambu andi. Muntu ndioyo walomba kwa Yesu vo: “Ungindula vav’oluaka muna kintinu kiaku.” Adieyi Yesu kamvutula? ‘Kieleka isamunwini o unu vo, okala yame muna Paradiso.’—Luka 23:39-43.

Nga Yesu wazayisa muntu ndioyo vo ku zulu kekwenda? Nkatu. Muntu ndioyo kavanga ko dina divavwanga mu kota muna Kintinu kia zulu, i sia vo ‘wutuluka’ muna maza yo mwand’avelela. (Yoane 3:3-6) Ozevo, Yesu nsilu wazingila “muna paradiso” kasila kwa kimpumbulu. Wau vo Nyuda kakala, muntu ndioyu watoma zaya oma ma paradiso ova ntoto ye mpatu a Edene iyikwanga muna Bibila. (Etuku 2:8) O nsilu wa Yesu wavana muntu ndioyu e vuvu kia fuluka ova ntoto vava ukituka se paradiso.

Bibila kiyikanga nsilu a “lufuluku lu’asongi y’ana balembi songa.” (Mavangu 24:15) “Ana balembi songa” i awana bafwa lembi lemvokela nkanikinu mia Nzambi wau vo ke bazaya luzolo lwandi ko. Yesu ofutumuna kimpumbulu kasila nsilu kumosi ye mafunda ye mafunda ma wantu “balembi songa” ana balembi zaya nkanikinu mia Nzambi. Muna paradiso ova ntoto ana befuluka belongwa nkanikinu mia Nzambi yo vewa e lau dia songa kana vo bezola Nzambi muna lungisa mana kevavanga.

Vava wantu “balembi songa” befulwa, nga befundiswa mun’owu wa mana bavanga vitila lufwa lwau? Nkatu. Sono kia Roma 6:7 kivovanga vo: ‘On’ofwidi kala, ovevokele mun’esumu.’ Ana “balembi songa” bafuta kala mu kuma kia masumu mau vava bafwa. Ozevo, wantu awaya besinga fundiswa mun’owu wa mana bevanga vava befulwa, ke mun’owu wa mana bavanga ko vitila lufwa lwau. Nkia nluta bevwa?

“Ana balembi songa” vava befulwa bevewa lau dia longwa nsiku mia Nzambi misengomonwa muna nkanda miampa miziulwa. I bosi, befundiswa “mun’owu wa mavangu mau” avo belemvokela nsiku mia Nzambi yovo ve. (Lusengomono 20:12, 13) “Ana balembi songa” bekala ye lau dia longoka luzolo lwa Nzambi muna vwa moyo a mvu ya mvu ova ntoto.

Malongi mama ma Nkand’a Nzambi mesadisanga ayingi mu kala yo lukwikilu muna Nzambi. Yeong Sug, mosi muna wantu awaya. Mu dibundu dia Katolika kasansukila. Akaka muna yitu yandi padre bakala. Wau vo wakala ye kani dia kituka madre, wakota muna sikola ya convento. Kuna kwalanda, wavaika kuna convento mu kuma kia mambu mambi mavangamanga ko. Vana ntandu, katambulwilanga longi dia bilungi bia tiya ko kadi wabadikilanga dio vo dialuvunu.

Mbangi mosi a Yave wasonga kwa Yeong Sug e mvovo miami mia Nkand’a Nzambi: “Wantu bazeye wo vo fwa befwa, kansi afwa ke bazeye diambu ko, ngatu kala diaka yo nsendo, kadi o luyindwilu luau luvilakene.” (Kimpovi 9:5) Mbangi a Yave wansadisa mu bakula vo akulu andi ke bena ku bilungi bia tiya ko. Kansi, baleka muna lufwa, bevingilanga e lumbu kina besinga fulwa.

Vava kawá vo ayingi ke bazeye ludi kia Bibila ko, Yeong Sug walemvokela mvovo mia Yesu mina muna Matai 24:14: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.” Owau, Yeong Sug osamunanga nsangu zambote yo zayisa e vuvu kiandi kwa akaka.

Bibila kikutuzayisanga vo ‘Nzambi kesianga mpambula ko, kansi muna zula yawonso, on’okumvumina yo vanga unsongi, wina y’edieng’oku kena.’ (Mavangu 10:34, 35) Owau i unsongi Nzambi kesonganga kadi ‘ozolanga unsongi ye ndungidi.’—Nkunga 33:5.