O mvovo wau wasadilwanga muna yika wantu ana bazengwanga e nkandi. Kuna nza nkulu, akaka muna awana babakamanga muna vita yovo kitulwa se abundu batumbwanga muna zengwa e nkandi. Akaka bazengwanga e nkandi kimana balangidilanga akento muna nzo za atinu. Muna bonga e nona, o nzimba Engai yo Sasengaze balunga-lunganga akento ye makangu ma Akasurose wa Ntinu a Parasa ona oyikilwanga mpe vo Kesate 1.​—Esete 2:3, 14.

Kansi, ke wantu awonso ko beyikilwanga nzimba muna Bibila i bazengwa e nkandi. Akaka muna akwa ngangu bevovanga vo o mvovo nzimba wasadilwanga mpe muna yika awana basadilanga muna nzo za ntinu. E yayi i nsas’a mvovo nzimba kayikilwa Ebede-meleke wa nkundi a Yeremiya yo Ntiopia ona Filipo kasila umbangi. Ka lukatikisu ko vo Ebede-meleke selo kia tunda kakala kadi wamokenanga yo Ntinu Sedekiya. (Yeremiya 38:7, 8) Bibila kiyikanga vo nzimba a Ntiopia ona ‘wayenda kuna Yerusaleme muna samba,’ wakala ye kiyekwa kia lunga-lunga mavua ma ntinu.​—Mavangu 8:27.

Vava kayika lufundisu luvangama kuna sentu, Yesu wavova vo: “Vava o Mwan’a muntu kekwizila muna nkembo andi, . . . ovambanisa wantu nga una mvungudi kevambanisinanga mameme ye nkombo.” (Matai 25:31, 32) Ekuma avungudi bavambulwilanga e bulu yayi yaswaswana?

Muna mwini, mameme ye nkombo kumosi badilanga. Muna fuku, basiwanga muna mpaka muna kubatanina mu kuma kia bulu yansisi, mivi ye kiozi. (Etuku 30:32, 33; 31:38-40) Mameme ye nkombo mu mpaka zaswaswana basiwanga muna tanina wana mameme ye mameme makala ma yimita kimana malembi vangulwa kwa nkombo. Nkanda umosi Todas as coisas na Bíblia uyikanga vo, avungudi bavambulanga “mameme vava mawutanga, makamwanga e kimvumina ye vava masakwanga e mika.” Ozevo, Yesu wabakila kingana kiandi muna salu yasalwanga kwa nkangu a Isaele nze vungula mameme ye nkombo.