Kuna Paddington, zunga kiampwena kuna Londres, Inglaterra yawutukila. Kumosi yazinganga yo ngudi ame ye nsanga zame zitatu. Twavambana yo se dieto mu kuma kia nkolwa zandi.

Muna kileke, ngudi ame wandonga o mfunu wa sambanga konso fuku. Yakala yo Nkand’a Nzambi wakete, nkand’a Nkunga kaka wakala mo, yavanga mawonso mu longoka mio yo yimbila mio. Lumbu kimosi yatanga diambu muna nkanda mosi diatokanesa ngindu zame: “Vena ye lumbu kina mawonso mefokoka.” E mvovo miami mia luvunu miavempolanga o tulu twame mu fuku yo kumfila mu yindula e zingu kiame kia kusentu. Yayindulanga vo, ‘Vena ye mambu mayingi mfwete vanga muna zingu.’ ‘Ekuma nginina ova nza?’ Kizolele fwa ko!

Yayantika yangalela e mavangu ma mpandu. Yamokenanga ye mafwa, twayenda kingula ziame ye akundi ame a sikola, yo tala filmes za ngemi. Wonga wayingi twamonanga kansi twayindulanga vo filmes zambote kwandi.

Vava yakala ye mvu 10 yayantika kolama kwayingi. Yayantika nua fomo yo kituka se nduvu. Kuna kwalanda yayantika nua diamba. Vava yalungisa mvu 11 yayantika nua malavu ma nkolwa. Kiayangalelanga o ntomo a malavu ko, kansi yayangalelanga e nkolwa. Yazolanga mpe miziki yo makinu. Konso ntangwa yayendanga muna nkinzi ye nzo za makinu ma fuku. Kia malu yayendanga muna fuku yo vutuka kia malu muna mene-mene. Muna lumbu kialanda e nitu yayoyanga. Kiayendanga kwame ku sikola ko. Avo ngiele, ku nsi a nkolwa yalongokelanga.

Kuna mfoko a mvu, kia bakanga ko muna kizame. Mu kuma kia umpumbulu wame, ngudi ame wakendalalanga yo kumfungila makasi. Lumbu kimosi twazonza, i bosi yatina kuna nzo. Yayenda zinga kumosi yo makangu mame Tony, Rasta kakala. Oyandi diaka kimpumbulu kiangolo kakala, mfomo za ngolo katekanga. Kiazingila ko mu yimita, yayiza wuta mwan’eto a yakala muna kimbuta kia mvu 16.

Yamokena ye Mbangi za Yave mu nkumbu antete vava yazingilanga kuna nzo ya ngudi za lembi sompa ye nsedia miau.  Mfumu za luyalu bambakila ko e suku. Mbangi za Yave zizole za makento bayizanga kutukingula. Lumbu kimosi yamokena yau. Yazola kubasonga vo Mbangi za Yave akwa luvunu. Kansi kuna lulembamu lwawonso basadila Nkand’a Nzambi muna vana e mvutu za yuvu yame. Batoma kunsonga e ngemba ye kiese, ediadi diatoma kungiangidika. Dianu vo, yayantika longoka Nkand’a Nzambi yo mosi muna yau.

Ke vavioka lumbu yayingi ko, yalongoka diambu diasoba e zingu kiame. Tuka muna kileke kiame lufwa yamwenanga wonga. Kansi yayiza longoka vo Yesu lufuluku kalonganga kwa wantu. (Yoane 5:28, 29) Yalongoka mpe vo Nzambi mono kevuanga o mfunu. (1 Petelo 5:7) O mambu masonama muna Yeremiya 29:11 matoma simba o ntim’ame. E sono kiaki kivovanga vo: “‘Kadi nzeye ngindu zina ngindulang’omo yeno, i Yave wau, ngindu za luvuvamu, ke za bi ko, yanuvan’e vuvu muna mbaninu eno.’” Yayantika kwikila vo ndenda kala ye vuvu kia zinga muna Paradiso yakwele mvu.—Nkunga 37:29.

Mbangi za Yave bansonga o zola kwa kieleka. Lumbu kiantete yayenda muna lukutakanu lwau, yau awonso batoma kuntambula ye kiese. Diakala nze yeto twazayana kala! (Yoane 13:34, 35) Kansi ke wau ko o wantu bantambulwilanga muna dibundu dina yayendanga. Mbangi za Yave ke basia sungididi muna kiwuntu kiame ko. Bampana e ntangwa yasoba, batokanena e wete diame yo kumpana lusadisu lwafwana. Yamonanga nze mono ngina muna kanda diampwena dikunzolanga.

Vava twalongokanga Nkand’a Nzambi, yabakula vo mfwete soba e zingu kiame kimana yalanda e nsiku mia nsongi mia Nzambi. Ke diakala dia sazu ko mu yambula nua fomo. Yabakula mpe vo miziki mina yazolanga miawokesanga e tima dia nua diamba, muna kuma kiaki kia wanga mio diaka ko. Muna yambula e nkolwa, kiayendanga diaka mu nkinzi ko ye nzo za makinu ma fuku kimana yalembi bwa muna vonza kia kolwa malavu. Yavava akundi ambote ana balenda kunsadisa mu tatidila e zingu kiampa yayantika.—Ngana 13:20.

O makangu mame Tony wayantika mpe longoka Nkand’a Nzambi ye Mbangi za Yave. Wau vo Nkand’a Nzambi basadilanga muna vana e mvutu za yuvu yandi, Tony wabakula vo ludi kikilu kalongokanga. Wavanga nsobani zampwena muna zingu kiandi: wayambula akundi andi ana bakala vo yimpumbulu, wayambula mavangu ma nsoki, kanuanga diaka diamba ko. Muna yangidika Yave una ufwene, yeto awole twamona vo diambote twasoba e mpila zingu kieto kimana o mwan’eto mpe kakala ye zingu kiambote. Muna mvu wa 1982 twakazala.

Yavavululanga muna Eyingidilu ye Despertai! * Tusansu twa wantu ana bavanga e nsobani zina omono yavavanga o vanga. O tusansu twau twansadisa kwayingi! Yakasakeswanga mu kwamanana vanga e nsobani yo lembi vutuka manima. Yasambanga kwa Yave kalembi kungiambula. Muna mvu wa 1982, mono yo Tony twavubwa yo kituka Mbangi za Yave.

E kikundi yo Yave wa Nzambi kiatanina o moyo ame. Mono yo Tony tumonanga lusadisu lwa Yave muna ntangw’a mpasi. Tubundanga e vuvu kieto kiawonso kwa Nzambi muna lumbu yayi yampasi, tumonanga vo Yave okutusadisanga yo sikina esi nzo eto.—Nkunga 55:22.

Yamona e kiese kia sadisa mwan’eto a yakala ye wa nkento bazaya e nzila za Yave nze una omono yavanga. Owau kiese ikalanga kiau vava imonanga atekulo ame benungunukanga muna ludi kia Nzambi.

Kisikamanga diaka mu fuku ko yo tokana mu kuma kia lufwa ye zingu kia kusentu. Mono yo Tony tukwenda kingulanga nkutakani za Mbangi za Yave muna konso lumingu muna kumika ampangi zeto bakala ye ngwizani ambote yo Nzambi. Tusalanga kumosi ye mpangi zeto e salu kia longa o wantu bakwikila muna Yesu kimana bavua o moyo a mvu ya mvu.