Wantete wa Samuele 16:1-23
16 Yave ovovese Samuele vo: “Yamu nkia kolo okendalala mu kuma kia Saulu+ wau vo imbembwele mu kala se ntinu a Isaele?+ Zadisa mpoka aku yo mazi,+ wenda. Ikutuma kwa Yisai+ wa musi Beteleme, kadi nsolele ntinu muna wan’andi.”+
2 Samuele ovovele vo: “Aweyi ikwendela? Avo Saulu owidi wo, vonda kekumponda.”+ Yave umvutwidi vo: “Nata mwan’a ngombe ankento, vova vo, ‘Yave ngizidi kelela kimenga.’
3 Bokela Yisai kuna kimenga; ikuzayisa dina ovanga. Ofwete kusa mazi kwa ndiona ikusonga.”+
4 Samuele ovangidi dina Yave kavovele. Vava kalweke kuna Beteleme,+ akuluntu a mbanza bele kunkika ye wonga, bavovele vo: “E ngiz’aku ya luvuvamu?”
5 Ovutwidi vo: “Yaluvuvamu. Yave ngizidi kelela kimenga. Nuyivelelesa, nuiza yame kuna kimenga.” Ovelelese Yisai yo wan’andi, i bosi ubabokelese kuna kimenga.
6 Vava balwaka, Samuele omwene Eliabe,+ ovovele vo: “Kieleka, ndioyo i kuswa kia Yave.”
7 Kansi, Yave ovovese Samuele vo: “Kutadi ndose andi ko ngatu ntel’andi,+ kadi imbembwele. Kadi Nzambi ke mwenanga una muntu kemwenanga ko, o muntu ndose ketalanga, kansi o Yave ntima ketalanga.”+
8 Yisai obokele Abinadabi,+ umviokese vana vena Samuele. Kansi Samuele ovovele vo: “Ke yandi mpe ko kasolele o Yave.”
9 I bosi, Yisai oviokese Sama,+ kansi Samuele ovovele vo: “Ke yandi mpe ko kasolele o Yave.”
10 Yisai oviokese wan’andi nsambwadi vana vena Samuele, kansi Samuele ovovese Yisai vo: “Ke yau ko Yave kasolele.”
11 I bosi, Samuele ovovese Yisai vo: “Awaya i wan’aku awonso e?” Yisai ovutwidi vo: “Ona wa nsuka+ kaka osidi; mameme kevungulanga.”+ Samuele ovovese Yisai vo: “Umbokelesa, kadi ke tuvuanda ko twadia yavana kelwaka.”
12 Umbokelese yo kunkotesa. Wabwaka, meso mandi mambote-mbote ye mpw’ambote.+ Yave ovovele vo: “I yandi ndioyo, telama wankusa mazi!”+
13 Samuele obongele mpok’a mazi,+ unkusidi mo vana vena mpangi zandi. Mwand’a Yave ukumikini Davidi tuka e lumbu kiakina.+ I bosi Samuele ovutukidi kuna Rama.+
14 Mwand’a Yave ukatukidi muna Saulu,+ mwand’ambi utukidi kwa Yave uyantikidi kumbangika.+
15 E ntaudi za Saulu bamvovese vo: “E mfumu, mwand’ambi utukidi kwa Nzambi ukubangikanga.
16 Dodokolo, kanikina ntaudi zaku bena va ndose aku kimana bavavila muntu una ye ndekwa za sika e kokolo.+ Avo mwand’ambi utuka kwa Nzambi ulwakidi, kasikila e kokolo, ozevo omona o wete.”
17 Dianu vo, Saulu ovovese ntaudi zandi vo: “Dodokolo, numpavila muntu ozeye toma sika e kokolo, nuntwasila yandi.”
18 Mosi muna ntaudi zandi ovovele vo: “Ngwidi mosi muna wan’a Yisai wa musi Beteleme ozeye toma sika e kokolo, nkwa unkabu ye ukesa.+ Nkwa mpova zambote,+ wa mpw’ambote, Yave mpe una yandi.”+
19 Saulu otumini anati a nsangu kwa Yisai, oku vo: “Untwikila mwan’aku Davidi ona okalanga yo mameme.”+
20 Yisai osidi e mbolo vana buluku, mbwat’a vinyu, yo mwan’a nkombo, otwikidi yo kwa Saulu kumosi yo mwan’andi Davidi.
21 Davidi olweke kwa Saulu, oyantikidi kunsadila.+ Saulu unzolele, okitukidi nati a nuaninua yandi.
22 Saulu otwikidi nsangu kwa Yisai oku vo: “Dodokolo, yambula Davidi kakala mu salu kiame, kadi imwenene dienga va meso mame.”
23 Konso ntangwa mwand’ambi watukanga kwa Nzambi walwakilanga Saulu, Davidi wabonganga kokolo yo sika kio, Saulu wavevokanga yo mona wete, mwand’ambi wakatukanga muna yandi.+
