Levitiku 21:1-24
21 Yave ovovese Mose vo: “Vovesa anganga, o wan’a Arone vo: ‘Ke vakadi nganga ko ofwete kuyifunzula mu kuma kia muntu afwa vana vena o nkangu andi.+
2 Kansi, olenda wo vanga mu kuma kia yitu kiandi kia menga, mu kuma kia ngudi andi, se diandi, mwan’andi ayakala, mwan’andi a nkento, mpangi andi,
3 olenda kuyifunzula mu kuma kia nsang’andi avo mwenze, ona ozinganga yandi lukufi, ona kasompelo ntete ko.
4 Kafwete kuyifunzula ko yo kuyisafula mu kuma kia nkento una ye yakala diandi vana vena nkangu andi.
5 Ke bafwete katula luvanda ko muna ntu miau+ yovo vala konko ya nzevo zau ngatu lweka e nitu zau.+
6 Bafwete kala bavauka kuna kwa Nzambi au,+ ke bafwete safula nkumbu a Nzambi au ko,+ kadi tukau twa Yave besunzulanga vana tiya, i sia vo, mbolo* a Nzambi au, bafwete kala bavauka.+
7 Ke bafwete sompa nkembi* ko,+ nkento ona wasafulwa yovo nkento wavonda longo yo nkaz’andi,+ kadi o nganga wavauka kwa Nzambi andi.
8 Nufwete badikila nganga vo wavauka,+ kadi yandi osunzulanga e mbolo a Nzambi eno. Kafwete kala wavauka kwa yeno, kadi omono Yave, ona okunuvaulanga, yavauka.+
9 “‘Avo mwan’ankento a nganga uyisafwidi muna vanga e vangu dia kinkembi, se diandi kasafwidi. Mwana ndioyo kafwete yokwa vana tiya.+
10 “‘O ngang’ambuta vana vena e mpangi zandi, ona wayitidilwa o mazi mankusa* vana ntu,+ ona watumbikwa* mu vuata e mvuatu mia kinganga,+ kafwete yambula kubika nsuki zandi ko, kafwete tiazuna mvuatu miandi ko.+
11 Kafwete finama muntu afwa* ko;+ kafwete kuyifunzula ko kana nkutu mu kuma kia se diandi yovo ngudi andi.
12 Kafwete vaika muna nzo avauka ko, kafwete safula nzo avauk’a Nzambi andi ko,+ kadi e sinsu kia kukiyekola yo mazi mankusa* ma Nzambi andi+ vana ntu andi mena. Mono i Yave.
13 “‘Kafwete sompa nkento una vo mwenze.+
14 Kafwete sompa nkento wafwilwa yakala ko, nkento wavonda longo, nkento ona wasafulwa yovo nkembi;* kansi kafwete sompa nkento una vo mwenze vana vena nkangu andi.
15 Kafwete safula mbongo andi ko vana vena nkangu andi,+ kadi mono i Yave, ona okumvaulanga.’”
16 Yave okwamanene vovesa Mose vo:
17 “Vovesa Arone vo: ‘Ke mosi ko muna mbandu zawonso za wan’aku* amakala una ye fu muna nitu ofwete finama mu sunzula e mbolo a Nzambi andi.
18 Avo vena yo muntu una ye fu muna nitu, kafwete finama nzo avauka ko: muntu una vo mpofo, yovo koka, yovo una yo nzunu wapasuka,* yovo una yo kulu yovo koko kusundidi kwankaka o lambuka,
19 muntu una yo kulu yovo koko kwavanguka,
20 muntu una ye nkunki yovo mbaka; muntu una ye fu mu disu, yovo una ye kimbevo kia nkand’a nitu, yovo una ye basa-basa* yovo nkandi zabofoka.+
21 Ke mosi ko muna wan’a* Arone wa nganga, ona una ye fu muna nitu ofwete finama e ziku mu sunzula tukau kwa Yave twayoka vana tiya. Wau vo fu kena kiau, kalendi finama ko kasunzula e mbolo ya Nzambi andi.
22 Olenda kwandi dia e mbolo a Nzambi andi vana vena lekwa isundidi o vauka+ ye vana vena e lekwa yavauka.+
23 Kansi, kafwete finama vana rido ko,+ kafwete finama ziku ko,+ kadi fu kena kiau muna nitu; kafwete funzula nzo ame avauka ko,+ kadi mono i Yave, ona okubavaulanga.’”+
24 I wau wuwu o Mose kavovesa Arone yo wan’andi ye Aneyisaele awonso.
Mvovo vana yand'a lukaya
^ Yovo “madia,” i sia vo, yimenga.
^ Yovo “nkento a ndumba.”
^ I sia vo, mazi masadilwanga muna tumbika muntu.
^ Mvovo wa sina: “ona ozadisu o koko.”
^ Yovo “moyo afwa.” Omu sono kiaki, o mvovo wa Kiyibere néfesh uyikwanga kumosi yo mvovo wa Kiyibere una ye nsasa vo “fwa.”
^ I sia vo, mazi masadilwanga muna tumbika muntu.
^ Yovo “nkento a ndumba.”
^ Mvovo wa sina: “mbongo aku.”
^ Yovo “una ye fu vana lose.”
^ Yovo “kinsampala.”
^ Mvovo wa sina: “mbongo.”
