Levitiku 27:1-34
27 Yave okwamanene vovesa Mose vo:
2 “Vovesa Aneyisaele vo: ‘Avo muntu osidi nsilu a mfunu+ wavana kwa Yave e ntalu yasikidiswa mu kuma kia muntu mosi,
3 e ntalu isikidisu mu kuma kia wan’amakala bena ye mvu tuka 20 yakuna mvu 60, sekele* 50 za palata mun’owu wa sekele ya fulu kiavauka.*
4 Avo i wan’amakento, e ntalu isikidisu, sekele 30.
5 Avo wan’amakala bena ye mvu 5 yakuna mvu 20, e ntalu isikidisu, sekele 20. O wan’amakento, sekele 10.
6 Avo wan’amakala a ngonde mosi yakuna mvu ntanu, e ntalu isikidisu, sekele tanu za palata. Avo wan’amakento, sekele tatu za palata.
7 “‘Avo mwan’ayakala una ye mvu 60 yovo vioka, e ntalu isikidisu, sekele 15. Avo mwan’ankento, sekele 10.
8 Kansi, avo ndiona osidi o nsilu okitukidi se nsukami kikilu, ke lenda futa ntalu isikidisu ko,+ o muntu ndioyo okwenda vana ndose a nganga, o nganga okunsikidisila e ntalu. O nganga osikidisa e ntalu mun’owu wa mbakilu a muntu wasia o nsilu.+
9 “‘Avo nsilu kasidi wa vana bulu kilenda tambikwa se lukau kwa Yave, kina kivewa kwa Yave kikituka se lekwa kiavauka.
10 Kalendi kio vingisa ko ngatu soba eki kiambote muna eki kiambi yovo eki kiambi muna eki kiambote. Kansi, avo osobele kio muna bulu kiankaka, e bulu kiantete ye bulu kisobelo, yau yole ikituka se yavauka.
11 Avo e bulu kiafunzuka+ kina ke kilendi sunzulwa ko se lukau kwa Yave, ozevo otelamesa e bulu vana ndose a nganga.
12 O nganga osikidisa e ntalu a bulu mun’owu wa mpila kemwena kio, kana vo kiambote yovo kiambi. E ntalu kesikidisa o nganga i yau ilandwa.
13 Kansi, avo muntu ndioyo ozolele kio sumbulula, kafwete kudikila tini kiatanu vana ntandu a ntalu isikidisu.+
14 “‘Avo muntu ovene* e nzo andi kwa Yave se lekwa kiavauka, kiakala vo yambote yovo yambi, o nganga osikidisa e ntalu a nzo yoyo. E ntalu kesikidisa o nganga i ntalu itekelwa e nzo.+
15 Kansi, ndiona ovene* e nzo andi avo ozolele yo sumbulula, kafwete kudikila tini kiatanu vana ntandu a ntalu isikidisu, e nzo ikala se yandi.
16 “‘Avo muntu ovene* kwa Yave e ndambu a mpatu andi ina vo vua kwandi, e ntalu a mpatu isikidiswa mun’owu wa mbongo ikunua mo: e kome* mosi a mbongo a bale 50 ma sekele za palata ifwa.
17 Avo ovene* e mpatu andi muna Mvu wa Luvevoko,+ e ntalu isikidisu ke isoba ko.
18 Avo ovene* e mpatu kuna nim’a Mvu wa Luvevoko, o nganga osikidisa e ntalu mun’owu wa mvu misala yamuna Mvu wa Luvevoko ulanda, e ntalu yasikidiswa ifwete kululwa.+
19 Kansi, ndiona ovene* e mpatu avo ozolele yo sumbulula, kafwete kudikila tini kiatanu vana ntandu a ntalu isikidisu, e mpatu ikwamanana kala se yandi.
20 Kansi e mpatu avo kasumbulwidi yo ko, e mpatu yoyo yatekwa kwa muntu ankaka, ke ilendi sumbululwa diaka ko.
21 Avo e mpatu ivutwilu muna Mvu wa Luvevoko, ikituka se lekwa kiavauka kwa Yave, se mpatu yavewa kwa yandi. Ikituka se vua dia anganga.+
22 “‘Avo muntu ovene* kwa Yave e mpatu kasumbidi, ina vo ke vua diandi ko,+
23 o nganga okunsikidisila e ntalu mun’owu wa mvu misidi yamuna Mvu wa Luvevoko, oyandi ovana e ntalu isikidisu muna lumbu kiokio.+ Ekiaki lekwa kiavauka kwa Yave.
24 Muna Mvu wa Luvevoko, e mpatu ivutulwa kwa ndiona wantekela yo, ndiona ovuidi o ntoto.+
25 “‘Konso ntalu ifwete sikidisilwa mun’owu wa sekele ya fulu kiavauka. E sekele mosi, 20 ma ngera.*
26 “‘Kansi, ke vakadi muntu ko ovana* mwan’antete a bulu, wau vo owutukanga kala se mwan’antete kwa Yave.+ Kiakala wa ngombe a koko yovo wa meme, kwa Yave kavuilu.+
27 Avo mwan’antete wa bulu kiafunzuka, kankûla mun’owu wa ntalu isikidiswa, kafwete kudikila tini kiatanu vana ntandu a ntalu isikidiswa.+ Kansi, avo e bulu ke kisumbulwilu ko, kitekwa mun’owu wa ntalu isikidisu.
28 “‘Kansi, konso lekwa o muntu kavambwidi muna lekwa yandi mu kuma kia Yave, ke kilendi tekwa ko ngatu sumbululwa, kiakala muntu yovo bulu yovo mpatu ina vo i yandi. Konso lekwa kivambwilu, i lekwa kisundidi o vauka kwa Yave.+
29 Kuna diak’e sambu, o muntu watumbwa,* ona wavaulwa kimana kafwasa, kalendi kûlwa ko.+ Kafwete vondwa kikilu.+
30 “‘Konso tini kiakumi+ kia ntoto, kiakala kia mbongo a mpatu yovo kia bundu ya nti, kwa Yave kivuilu. Ekiaki i lekwa kiavauka kwa Yave.
31 Avo muntu ozolele sumbulula ndambu muna tini kiandi kiakumi, kafwete kudikila tini kiatanu vana ntandu a ntalu ya kina kasumbulwidi.
32 Konso tini kiakumi kia kambi dia ngombe ye dia mameme, i sia vo, konso bulu kiakumi* muna bulu yawonso iviokela kuna nsi a nkau a mvungudi, kikituka se lekwa kiavauka kwa Yave.
33 Kafwete fimpa bulu kiaki ko, kana kiambote yovo kiambi ngatu soba kio. Kansi, avo otezele kio soba, e bulu kiantete ye bulu kisobelo, yau yole ikituka yavauka.+ E bulu ke kifwete sumbululwa ko.’”
34 Emiami i nkanikinu kavana o Yave kwa Mose mu kuma kia Aneyisaele vana Mongo a Sinai.+
Mvovo vana yand'a lukaya
^ Yovo “mun’owu wa sekele yavauka.”
^ Mvovo wa sina: “ovawidi.”
^ Mvovo wa sina: “ovawidi.”
^ Mvovo wa sina: “ovawidi.”
^ Mvovo wa sina: “ovawidi.”
^ Mvovo wa sina: “ovawidi.”
^ Mvovo wa sina: “ovawidi.”
^ Mvovo wa sina: “ovawidi.”
^ Mvovo wa sina: “ovaula.”
^ Yovo “wavambulwa muna lufwasu.”
^ Yovo “o ntu wakumi.”
