Tuku 8:1-22
8 Kansi, Nzambi osidi e sungididi kwa* Noa, kwa bulu yawonso ya mfuta ye bulu ya vata ina yakala yandi muna nzaza,+ Nzambi oviokese tembwa ova ntoto, o maza mayantikidi kuluka.
2 E nto za maza ye mielo mia maza ma zulu mikangamene, e mvula ikiele.+
3 I bosi, o maza mayantikidi kuluka malembe-malembe ova ntoto. Kuna mfoko a lumbu 150, o maza makulukidi emvimba.
4 Muna ngonde yansambwadi, muna lumbu kia 17 kia ngonde yayi, e nzaza itensamene vana miongo mia Ararate.
5 O maza makulukidi malembe-malembe yamuna ngonde yakumi. Muna ngonde yakumi, muna lumbu kiantete kia ngonde yayi, mbata za miongo zimonekene.+
6 Kuna mfoko a lumbu 40, Noa oziwidi zianela+ ina kavanga muna nzaza,
7 ovaikisi e ngono-ngono; yele atilumukingi kuna mbazi yo vutuka, yavana o maza mayuma ova ntoto.
8 Kuna kwalanda ovaikisi e yembe, kimana kazaya kana vo maza makulukidi ova ntoto.
9 E yembe ke dimwene fulu kia vundila ko, divutukidi kwa Noa muna nzaza, kadi o maza makinu kaka ova ntoto wawonso.+ Muna kuma kiaki, Noa ovaikisi o koko kwandi kuna mbazi, okotese e yembe muna nzaza.
10 Ovingidi diaka lumbu nsambwadi, i bosi, ovaikisi diaka e yembe muna nzaza.
11 Vava e yembe divutukidi muna nkokela, Noa omwene lukaya lwa nkunzu lwa olive muna zozo* kiandi! Owau Noa obakwidi vo maza makulukidi ova ntoto.+
12 Ovingidi diaka lumbu nsambwadi. I bosi, ovaikisi e yembe, kansi ke divutukidi diaka kwa yandi ko.
13 Muna mvu wa 601,+ muna ngonde yantete, muna lumbu kiantete kia ngonde, maza mayumini ova ntoto; Noa obangwidi e ndambu a nludi a nzaza, omwene vo maza mayumini ova ntoto.
14 Muna ngonde yazole, muna lumbu kia 27 kia ngonde, o ntoto uyumini emvimba.
15 Nzambi ovovese Noa vo:
16 “Vaika omo nzaza, ongeye, nkaz’aku, wan’aku ye akento a wan’aku.+
17 Vaikisa e vangwa yawonso yamoyo ya mpila zawonso,+ vangwa itilumukanga ye bulu ye vangwa iyatatanga ova ntoto, kimana yatetana, yawutana yo wokela ova ntoto.”+
18 Noa ovaikidi kumosi yo nkaz’andi, wan’andi,+ ye akento a wan’andi.
19 E vangwa yawonso yamoyo, ma iyatatanga ova ntoto, vangwa itilumukanga ye vangwa iyatatanga ova ntoto, ivaikidi muna nzaza mun’owu wa makanda mau.+
20 I bosi, Noa otungidi Yave e ziku,+ obongele yankaka muna bulu yawonso yavelela ye vangwa yawonso yavelela itilumukanga,+ otambikidi yo se lukau lwa ngioka vana ziku.+
21 Yave owidi nsunga zambote.* Dianu vo, Yave ovovele muna ntim’andi vo: “Kisiba diaka ntoto+ ko mu kuma kia mavangu ma wantu, kadi e ngindu za ntim’a muntu zambi kaka tuka muna kileke kiandi;+ kifukisa diaka vangwa yawonso yamoyo ko nze una mpangidi.+
22 Tuka owau, e nsungi a kuna e mbongo yo kutika, e nsungi a kiozi ye mbangazi, e nsungi a sivu ye mvula, fuku yo mwini, ke zisuka ko.”+
Mvovo vana yand'a lukaya
^ Mvovo wa sina: “Nzambi oyindwidi.”
^ Yovo “nsodi.”
^ Yovo “nsunga zilembekanga; zivuvikanga ntima.” Mvovo wa sina: “zivundisanga.”
