Zasoneka Yoane 10:1-42
10 “Kieleka, kieleka, inuvovese vo, ndiona olembi kotela muna mwelo a mpak’a mameme yo kotela kwankaka, mwivi ye nsanzi.+
2 Kansi, ndiona okotela muna mwelo, yandi i mvungudi a mameme.+
3 O nlangididi a mwelo okunziulwilanga,+ mameme mewanga nding’andi.+ Obokelanga mameme mandi muna nkumbu yo fila mo kuna mbazi.
4 Avo ovaikisi mawonso, okwendanga kuna ntwala au, o mameme mekunlandanga, e kuma kadi mazeye nding’andi.
5 Ke malendi landa nzenza ko, tina kaka mekuntina, e kuma kadi ke mazeye nding’a nzenza ko.”
6 Yesu ubatelele e kingana kiaki, kansi oyau ke babakwidi ko dina kabavovese.
7 Muna kuma kiaki, Yesu ubavovese diaka vo: “Kieleka, kieleka, inuvovese vo, mono i mwelo a mameme.+
8 Awonsono ana bayizila muna nkumbu ame, mivi ye asanzi; muna diadi mameme ke mabawila ko.
9 Mono i mwelo; konso ndiona okotela omu mono, ovuluzwa, okota yo vaika yo solola madilu.+
10 Mwivi ke kwizilanga mu kuma kiankaka ko, kansi okwizanga kimana kayiya, kavonda yo fwasa.+ Omono yayiza kimana nuavua o moyo, nuavua wo emvimba.
11 Mono i mvungudi ambote;+ o mvungudi ambote okalanga wakubama mu yekola moyo andi muna wete dia mameme.+
12 O nsadi una vo ke mvungudi ko, o mameme mpe ke mandi ko, avo omwene dievua dikwizanga, obembolanga mameme yo tina—e dievua dibakanga mo yo mwanganesa mankaka—
13 wau vo nsadi kaka, ke vuanga mameme mfunu ko.
14 Mono i mvungudi ambote. Nzeye mameme mame, mameme mame mpe manzeye,+
15 wauna o Se kanzayidi, omono mpe i una nzayidi o Se;+ ivananga moyo ame muna wete dia mameme.+
16 “Mameme mankaka mpe ngina mau, mana ke ma mpaka yayi ko;+ itwasa mo mpe mwamu, mewa nding’ame, mekala se kambi dimosi, mvungudi mosi.+
17 I kuma o Se kekunzolelanga,+ kadi iyekola moyo ame,+ kimana yabonga wo diaka.
18 Kavena muntu ko okunkatula wo, kansi mono kibeni iyekola wo. Ngina ye wisa kia yekola wo, ngina mpe ye wisa kia bonga wo diaka.+ O nkanikinu wau kwa Se diame ntambwidi wo.”
19 Ayuda bavambane diaka+ muna mambu mama kavovele.
20 Ayingi vana bena bavovele vo: “Nkuya kena wau, olaukidi. Ekuma nukunwilanga?”
21 Ankaka bavovele vo: “E mvovo miami ke mia muntu una ye nkuya ko. Nga o nkuya ulenda temona o meso ma mpofo e?”
22 Muna kolo kiakina, mwakala Nkinzi a Nsunzul’a Tempelo muna Yerusaleme. Nsungi a kiozi yakala,
23 Yesu wakangalanga muna tempelo, vana veta kia Solomo.+
24 Ayuda bezidi kunzunga, bamvovese vo: “Yamu nkia kolo okututelamesa o ntima? Avo ngeye i Kristu, utuzayisa dio.”
25 Yesu ubavutwidi vo: “Yanuzayisi wo kala, kansi ke nukwikidi ko. Mavangu mana ivangilanga muna nkumbu a Se diame, i mau mekunsilanga e kimbangi.+
26 Kansi ke nukwikidi ko, e kuma kadi ke nu mameme mame ko.+
27 Mameme mame mewanga e nding’ame, mono nzeye mo, mekundandanga.+
28 Mono ikubavana o moyo a mvu ya mvu,+ ke mekuyifwila ko yakwele mvu, kavena ona okutumuna mo ko va moko mame.+
29 Kina kampene o Se diame kisundidi lekwa yawonso, kavena ona olenda mo kutumuna ko vana moko ma Se.+
30 Mono yo Se diame tu mosi.”*+
31 Ayuda babongele diaka o matadi bantuba.
32 Yesu ubavutwidi vo: “Mavangu mayingi mambote ma Se diame yanusonga. Mu kuma kia nkia vangu nukuntubila o matadi?”
33 Ayuda bamvutwidi vo: “Ke tukutuba matadi mu kuma kia vangu diambote ko, kansi wau vo Nzambi otiangwini;+ kadi ongeye u muntu, kansi uyikitwidi se nzambi.”
34 Yesu ubavutwidi vo: “Nga muna Nsiku eno ke mwasonama ko vo: ‘Nzambi ovovele vo: “Oyeno nu zinzambi”’?*+
35 tuzeye wo vo e sono ke ilendi vunzunua ko. Avo Nzambi wayikila ana batumbwa kwa diambu diandi vo ‘zinzambi,’+
36 omono yavaulwa kwa Se yo tumwa ova nza, nga diafwana muna kumpovesa vo: ‘Otiangwini Nzambi,’ wau mpovele vo, ‘i Mwan’a Nzambi e’?+
37 Avo kivanganga mavangu ma Se diame ko, ke nukwikila mu mono ko.
38 Kansi avo i mau ivanganga, kana nkutu ke nukwikila mu mono ko, nukwikila muna mavangu mama,+ kimana nuazaya yo toma visa vo o Se una yame ntwadi, mono mpe ntwadi ngina yo Se.”+
39 Bavavidi diaka kunkanga, kansi otinini kwandá.
40 Wele diaka kuna simu dia Yodani, kuna Yoane kateka vubila o wantu,+ i kuna kanangina.
41 Wantu ayingi bezidi kwa yandi, bavovele vo: “O Yoane kavanga nkutu sinsu ko, kansi mawonso kavova mu kuma kia muntu ndioyu, maludi.”+
42 Okwakuna, ndonga ikwikidi muna yandi.
