E mvita mfwilu miayingi itwasanga.

•   “Mu mvu waviokele, tuyalu mu nza yawonso bafwasidi vioka trilhôes 2 za dolare muna mvita lutila mvu miankaka.”—The Washington Post, 13 Fevelelo, 2024.

 E mfwilu mia mvita ke mia nzimbu kaka ko. Tala nona kimosi: Mvita kuna Ucrânia.

•   Masoladi. Akwa ngangu ayingi bevovanga vo nanga tezo kia 500.000 ma masoladi bavondelo kala yovo lwala tuka e mvita yayantikila se vioka mvu miole.

•   Nkangu. E nsangu za Nações Unidas zisonganga vo vioka 28.000 ma wantu bavondelo kala yovo lwala. Kansi, mfumu mosi a makesa ma Nações Unidas wavovele vo: “Diampasi mu zaya lutangu lwa wantu bafwidi kala vana vena nkangu mu mvita yayi. a

 E mvita zazi mpasi zayingi mpe zitwasanga kwa nkangu mu nza yawonso.

•   114 milhões. Lwalu i Iutangu lwa wantu bayalukidi mu kuma kia mvita ye umpumbulu nze una usonganga e nsangu za ngonde a Setemba ya 2023.

•   783 milhões. Lwalu i lutangu lwa wantu befwanga e nzala. “E mvita i kuma kiantete kitwasanga e nzala. Ayingi muna wantu befwanga e nzala mu zunga ina mu mvita ye umpumbulu bezingilanga.—Buka Kitalanga oma ma Madia mu Nza Yawonso.

 Nga e mvita zisinga fokoka emvimba? Nga tulenda kala ye vuvu vo luvuvamu lusinga kala ova nza? Nga vekala ye ntangwa usukami ufoka ye konso muntu okala ye madia mafwana? Adieyi e Bibila kivovanga?

 Bibila kiasakula vo e mvita, e zisunzulwanga kwa nkwa mvalu wambwaki, zikala mu fulu yayingi ova nza.

•   “Vavaikidi mvalu wankaka, wambwaki, ndiona ofongele wo oveno nswa wa katula luvuvamu ova nza kimana wantu bavondaziana, oveno mpe nsosolo ampwena.”—Lusengomono 6:4.

 O nkwa mvalu ndioyo olandilu kwa mvalu miole misunzulanga e nzala ye lufwa mu kuma kia vuku yovo kuma yankaka. (Lusengomono 6:5-8) Muna zaya diaka mayingi mu kuma kia ungunza wau wa Bibila ye kuma tulenda kadila ye ziku vo mu lungana wina mu lumbu yeto, tanga e longi dina yo ntu a diambu “Akwa Mvalu Nyá Nki Besunzulanga?”

 Ke kolo ko, e mavwa ma nza ke mesadilwa diaka mu mvita ko. Kansi, ediadi ke divangamena mu ngolo za wantu ko. Bibila kivovanga vo:

•   Nzambi ‘osukisa e vita muna nza yawonso.’—Nkunga 46:9.

•   Nzambi ofokola e mpasi zawonso bemonanga o wantu mu kuma kia mvita. “Okunguna mansanga mawonso muna meso mau, o lufwa ke lukala diaka ko, ngatu kala diaka dilu, yovo kazu ngatu mpasi. O mambu mantete maviokele.”—Lusengomono 21:4.

•   Nzambi otwasa luvuvamu yakwele mvu. “O nkangu ame uzingila vana fulu kia luvuvamu, muna fulu ya lutaninu ye muna fulu yavuvama.”—Yesaya 32:18.

 Mun’owu wa ungunza wa Bibila, e mvita ye mambu mankaka tumonanga o unu mesonganga vo e kolo kia luvuvamu kifinamene.

 Aweyi Nzambi ketwasila luvuvamu lwalu? Osinga sadila luyalu yovo Kintinu kiandi kia zulu. (Matai 6:10) Muna zaya kana nki i Kintinu kiaki ye nsambu kikutwasila, tala e video yankufi Nki i Kintinu kia Nzambi?