Yindula diambu edi: Júlia uyitadidi muna pelo, edi kaka kamwene vo mpongo kena zau. Ovovele muna nsi a ntima vo: “Mfwete kulula e mpongo zazi mu nzaki zawonso.” Kansi, mase ye akundi andi bekumvovesanga vo “nitu zakete” kena zau.

Júlia obakidi e nzengo za tanda fiakete, kana nkutu kilo tanu kaka kakatula. Omwene vo kafwete vanga lumbu yayingi lembi dia kimana katanda . . .

Kele vo ngeye i Júlia, adieyi wadi vanga?

Ke diambi ko dia tokanena e mpw’aku. Nkand’a Nzambi uyikanga selo yayingi ya Nzambi bakala ye mpw’ambote. Akaka muna yau i Sara, Rakele, Abingaile, Yosefe yo Davidi. Nkand’a Nzambi uvovanga vo nkento mosi wakala ye nkumbu Abisangi, “mote kikilu” kakala.—1 Ntinu 1:4.

Kansi, aleke ayingi betokananga kwayingi mu kuma kia mpw’au. Diadi dilenda twasa mpasi zayingi. Tala nona eyi:

• Lufimpu lwavangamene lwasongele vo vana vena dumbelele 58 bekuyimwenanga vo mpongo zasaka bena zau, 17 kaka bena kikilu ye mpongo.

• Muna lufimpu lwankaka, diamoneka vo 45 dia akento bakala ye nitu zakete bayimwenanga vo mpongo bena zau.

• Muna kuma kia vava vo batanda, aleke ayingi bebakamanga kimbevo kia anorexia. Kimbevo kiaki kiavonza kikilu kadi kifilanga muntu mu kuyivonda ye nzala.

 Avo kimbevo kiaki una kiau yovo kimbevo kiankaka, diambote wavava lusadisu. Mokena yo mase maku yovo muntu ankaka una vo se mbuta obundang’e vuvu. Nkand’a Nzambi uvovanga vo: ‘O nkundi ozolanga ntangwa zawonso, mpangi wawutukila muna ntangw’a mpasi.’—Ngana 17:17.

Edi ditoma viengesanga o muntu i kiwuntu kia kati, ke mpwa ko. Badika nona kia Abesalome wa mwan’a ntinu Davidi. Nkand’a Nzambi uvovanga vo:

‘Ke mwakala on’ofwete saniswa nze Abesalome muna mpw’ambote ko: tuka muna tambi yaku mband’a ntu ke mwakala twangu ko.’—2 Samuele 14:25.

Kansi, Nkand’a Nzambi ke uvovelanga Abesalome mu mpila yambote ko. Toko diadi diakituka nkwa lulendo, loko ye makani mambi. Walwaka yamu tezo kia vondesa wantu.

Ekiaki i kuma o Nkand’a Nzambi ukutuvoveselanga vo:

“Nuvuata kiwuntu kiampa.”—Kolosai 3:10.

“O vienga kweno ke kukadi kwa ku mbazi ko . . .  kansi kwa kiwuntu kiaswekama kia ntima.”—1 Petelo 3:3, 4.

Kana una vo ke diambi ko mu vava kala ye mpw’ambote, e diambu tufwete toma silanga e sungididi i kiwuntu kieto. Kadi edi difilanga wantu mu toma kutuyangalela i fu yeto yambote, ke kala ye mpw’ambote ko. Dumbelele kimosi una ye nkumbu a Phylicia, wavova vo: “O kala ye mpw’ambote kulenda tunta sungididi kia wantu mu nzaki, kansi dina wantu betoma sungamena muna yeto, i kiwuntu ye fu yeto yambote.”

Nga nkumbu miayingi okendalalanga mu kuma kia mpw’aku?

Nga wonga wa dia okalanga wau muna lembi vonga?

Adieyi wadi soba muna mpw’aku kele vo olenda dio vanga? (Sia sinsu mu mvovo.)

• NTELA

• VONGA

• NSUKI

• NITU

• NDOSE

• SE KIA NITU

Avo elo ovutwidi muna yuvu yole yantete yo sia sinsu mu mvovo ntatu yovo vioka muna kiuvu kiatatu, zaya dio vo Akaka ke bekubadikilanga mu mpila ina okuyibadikilanga ko. Diasazu mu viokesa tezo yo tokana kwayingi mu kuma kia mpw’aku.—1 Samuele 16:7.