MUNA ndinga zantete zasonekenwa Nkand’a Nzambi, e mvovo wa Kiyibere sheʼohlʹ ye wa Kingerekia haiʹdes vioka nkumbu 70 miasonama. E mvovo miami lufwa miyikanga. Nsekola zakaka za Nkand’a Nzambi zisekolanga mvovo miami vo “ziami,” “bilungi” yovo “ewulu.” Ndinga zayingi ke zina ye mvovo wasikididi ko balenda sadila mu sekola e mvovo wau wa Kiyibere ye Kingerekia. E nsekola ya Nkand’a Nzambi, “Nsi-a-fwa” yisadilanga. Ayeyi i nsasa akieleka ya mvovo wau? Yambula twatala una usadilwanga muna sono yayingi ya Nkand’a Nzambi.

Muna Kimpovi 9:10 tutanganga vo: “Ke vena mfuntu ko yovo lukanu, yovo zayi yovo ngangu muna Nsi-a-fwa, kun’okwenda.” Nga e Nsi-a-fwa i wulu dizikwanga azolw’eto? Ve. Kadi vava Nkand’a Nzambi keyikanga ewulu yovo ziami, kesadilanga mvovo Nsi-a-fwa ko (Seol ye Hades). (Etuku 23:7-9; Matai 28:1) O Nkand’a Nzambi ke sadilanga mpe “Nsi-a-fwa” ko nze s’ewulu yovo ziami kia esi nzo.—Etuku 49:30, 31.

E “Nsi-a-fwa” diambu diakaka isonganga ke wulu dizikwanga ndonga ya wantu ko. Muna bong’e nona, muna Yesaya 5:14 tutanganga vo “e Nsi-a-fwa inungunwini eketo diandi, iyasikidi o nua ke mu tezo ko.” Kana una vo ulolo wa wantu befwanga, e Nsi-a-fwa ke yiyukutanga ko. (Ngana 30:15, 16) Nswaswani y’ewulu dilenda zala, e Nsi-a-fwa ke yizalanga ko, ke ina ye tezo ko. ‘Nsi-a-fwa ke iyukutanga ko.’ (Ngana 27:20) Ozevo, e Nsi-a-fwa i nki? Ke fulu kimonekanga ko muna konso zunga. I lufwa, kondwa moyo.

 Elongi dia Nkand’a Nzambi dia lufuluku dikutusadisa mu toma bakula e nsasa “Nsi-afwa,” (Seol ye Hades.) Nkand’a Nzambi usadilanga Nsi-a-fwa muna yika fwa yovo lufwa lw’awana bevingilanga lufuluku. * (Yobi 14:13; Mavangu 2:31; Lusengomono 20:13) Nkand’a Nzambi usonganga mpe vo ke selo ya Yave kaka ko bevingilanga lufuluku, kansi kumosi ye ndonga y’awana ke bansadila ko. (Etuku 37:35; Nkunga 55:15) Muna kuma kiaki, Nkand’a Nzambi ulonganga vo vekala “lufuluku lu’asongi y’ana balembi songa.”—Mavangu 24:15.