Vava kifokokele o nkinzi a longo muna Kana, Yesu wele kuna Kafanau. Wele kumosi ye ngudi andi, ye aleke andi—Yakobo, Yosefe, Simone yo Yuda.

Ekuma Yesu kendele kuna Kafanau? Eyayi i mbanza isundidi e tunda yo vonga, ke ilendi tezaneswa ko ye Nazarete yovo Kana. Vana ntandu, ayingi muna alongoki antete a Yesu mu mbanz’a Kafanau bezingilanga yovo lukufi ye mbanza yayi. Dianu vo, Yesu olenda kubalonga mambu muna zunga kiau.

Muna lumbu ina kanangini muna Kafanau, o Yesu masivi mayingi mpe kavangidi. Wantu ayingi muna mbanza ye muna zunga ina lukufi, bawidi mana kavangidi. O Yesu ye akwandi, wau vo Ayuda akwikizi, ke kolo ko se bekwenda ku Yerusaleme mu kembelela e Nduta ya mvu wa 30 wa tandu kieto.

Ekolo bena mu tempelo muna Yerusaleme, alongoki a Yesu bamwene diambu diasivi mu kuma kia Yesu, e diambu diadi ke basidi dio muna ko.

O Nsiku a Nzambi ukanikinanga Aneyisaele batambikanga yimenga ya bulu muna tempelo. Anzenza madia bevuanga o mfunu mu kolo kina benanginanga muna Yerusaleme. Muna kuma kiaki, o Nsiku uvananga o nswa kwa anzenza ana betukanga kwandá mu nata e nzimbu za sumbila ‘ngombe, mameme, nkombo’ ye lekwa yankaka bevua o mfunu ekolo benangina muna mbanza. (Nsiku 14:24-26) Kiaki i kuma akiti muna Yesusaleme betekelanga twelezi ye nuni vana yanzala kia tempelo. Ankaka beyiyanga o nkangu muna tombola e ntalu a lekwa.

Yesu ofungidi makasi, okindwidi meza ma asobi a nzimbu, omwangidi e nzimbu zau yo vaikisa ateki awonso kuna mbazi. I bosi, Yesu ovovele vo: “Nukatula lekwa yayi mwamu! Nuyambula kitula nzo a Se diame se nzo ya kinkita!”—Yoane 2:16.

Vava alongoki a Yesu bamwene diadi, basungamene oma masakulwa mu kuma kia Mwan’a Nzambi: “Izala yo vema mu kuma kia nzo aku.” Kansi Ayuda banyuvuidi vo: “Nkia sinsu okutusonga wau ovanganga mambu mama?” Yesu ubavutwidi vo: “Nubwisa e tempelo yayi, yatelamesa yo muna lumbu tatu.”—Yoane 2:17-19; Nkunga 69:9.

Ayuda bayindwidi vo Yesu tempelo a Yerusaleme kayikidi. Muna kuma kiaki, banyuvuidi vo: “E tempelo yayi mu mvu 46 yatungwa, ongeye mu lumbu tatu otelamesa yo e?” (Yoane 2:20) Kansi, Yesu nitu andi kayikidi, ke tempelo a Yerusaleme ko. Vioka mvu ntatu, vava Yesu kafuluka, alongoki andi basungamena e mvovo miami.