Nkand’a Nzambi ke uyikanga ko e lumbu kina Yesu kawutuka. Ke uyikanga mpe ko vo tufwete kembelela luwutuku lwandi. O nkanda McClintock and Strong’s uvovanga vo: “O nkinzi a Noele ke wasikidiswa ko kwa Nzambi, ke una mpe muna Luwawanu Lwampa.”

 O lufimpu lwavangwa mu kuma kia lusansu lwa Noele, lwasonga vo o nkinzi wau mu mabundu ma luvunu watuka. Nkand’a Nzambi usonganga vo, avo tusambidi Nzambi mu mpila ina ketondanga ko, tulenda kunkendeleka.—Luvaiku 32:5-7.

1.   Kembelela luwutuku lwa Yesu: “Akristu a tandu kiantete ke bakembelelanga luwutuku lwa [Yesu] ko, e kuma kadi, babadikilanga o nkinzi a luwutuku vo mu dibundu dia luvunu watuka.”— Enciclopédia Delta Universal

2.   Lumbu kia 25 kia Desemba: Ke vena ye ziku ko kisonganga vo Yesu mu mvu wau kawutuka. Nanga afidi a mabundu yau basoka e lumbu kiaki kimana kiakala e ngwizani ye nkinzi mia luvunu miakembelelwanga muna nsungi a mvula.

3.   Vanaziana tukau, madia mayingi ye nkinzi: O Nkanda Encyclopedia Americana uvovanga vo: “Mambu mayingi mevangamanga muna nkinzi a Noele mu nkinzi a saturnais matuka, esi Roma bakembelelanga nkinzi wau mu ngonde a Desemba. Muna nkinzi wau i mwatuka e fu kia lamba madia mayingi, vanaziana tukau yo kwika e vela.” O nkanda Encyclopædia Britanica uvovanga mpe: “Muna lumbu kia nkinzi wau o wantu kebasalanga ko ngatu teka.”

4.   Minda muna nkinzi a noele: O nkanda The Encyclopedia of Religion (Enciclopédia da Religião), uvovanga vo muna nsi za mputu o wantu “bakwikanga minda yo tula tayi ya nti ya makaya mankunzu muna nzo zau kimana zavienga,” mu kembelela nkinzi a solstício muna nsungi a mvula yo tinisa mianda mia mbi.

5.   Visco e azevinho: “Wantu ayingi muna nsi za mputu bayindulanga vo muna nti a visco mpandu zikalanga mo. Ndonga basambilanga o nti azevinho, nti wau makaya mandi ke meyumanga ko, kadi wabasadisanga mu zaya vo fioti kaka fisidi o mwini se uvaika.”

6.   Nti wa Noele: “O sambila o nti i fu kia wantu bena muna dibundu dia luvunu kuna Europa.” Kasikil’owu, betulanga o nti a noele vana mwelo yovo muna nzo ekolo bekembelelanga o nkinzi wau.—Encyclopædia Britannica.