Ve, mabundu mawonso ke mafwanana ko. Bibila kivovanga vo vena ye mabundu mayingi ke meyangidikanga Nzambi ko. E mabundu mama mu mpila zole mavambulwa.

Mpila ya 1: I mabundu mesambilanga nzambi zaluvunu

 Bibila kivovanga vo o sambil’a nzambi zaluvunu i “mpavala,” “vavala” ye “yakondwa mfunu.” (Yeremiya 10:3-5; 16:19, 20) Yave a wa Nzambi wakanikina nkangu a Isaele vo: “Kufwete sambila nzambi zankaka ko. Mono kaka ofwete sambila.” (Luvaiku 20:3, 23; 23:24) Vava Aneyisaele basambilanga nzambi zankaka, ‘makasi ma Yave mabafusukilanga.’—Ntalu 25:3; Levitiku 20:2; Afundisi 2:13, 14.

 Yamu wau, Nzambi kasoba ngindu zandi ko mu kuma kia sambila “awana beyikilwanga vo nzambi.” (1 Korinto 8:5, 6; Ngalatia 4:8) Okanikinanga awonso bazolele kunsambila vo bayambula kalanga entwadi ye awana besambilanga nzambi zaluvunu. Ovovanga vo: “Nuvaika vana bena, nubavambuka.” (2 Korinto 6:14-17) Kele vo mabundu mawonso makala mafwanana yo nata wantu kwa Nzambi, ekuma kavanina nkanikinu wau?

Mpila ya 2: I mabundu mesambilanga Nzambi aludi mu mpila ina ke tondanga ko

 Ntangwa zankaka, Aneyisaele basadilanga mavangu ye malongi ma nsambil’a nzambi zaluvunu. Kansi, Yave katondanga e vangu diadi ko dia bundakekesa e nsambil’a luvunu ye nsambil’aludi. (Luvaiku 32:8; Nsiku 12:2-4) Yesu watumba afidi a nsambila a lumbu yandi mu kuma kia mpila ina basambidilanga Nzambi. Bakisananga vo yau basambilanga kieleka Nzambi, kansi ampuki bakala ye babembolanga “mambu masundidi o mamfunu muna Nsiku, i sia vo, unsongi, nkenda ye kwikizi.”—Matai 23:23.

 Diau dimosi mpe o unu, e dibundu dilonganga e ludi i diau kaka dinatanga o wantu kwa Nzambi. E ludi kiaki kina muna Bibila. (Yoane 4:24; 17:17; 2 Timoteo 3:16, 17) E mabundu mana melonganga malongi maswaswana ye ludi kia Bibila, i mau mefilanga wantu mu vavuka Nzambi. Malongi mayingi beyindulanga o wantu vo mu Bibila matuka, mu nsambil’a zaluvunu metukanga. Mankaka muna malongi mama i Longi dia Nzambi mu Ntatu, moyo ulembi fwanga yo bangikwa kuna bilungi. E nsambila ya mpila yayi “yakondwa mfunu” kadi ilonganga nkanikinu mia wantu vana fulu kia longa nsiku mia Nzambi.—Maku 7:7, 8.

 Nzambi omenganga umpuki wa mabundu. (Tito 1:16) E dibundu muna sadisa wantu bakala ye ngwizani ambote yo Nzambi, e malongi mandi mafwete sadisanga o wantu muna zingu kiau kia lumbu ke lumbu, kansi, ke mpasi sambila kaka ko. Muna bonga e nona, Bibila kivovanga vo: “Konso muntu obanzanga vo Nzambi kesambilanga, kansi ke kebanga lubini lwandi ko, ntim’andi kevunanga, e nsambil’andi mpe yampavala. E nsambila ina yavelela yo kondwa usafu vana ndose a Nzambi wa Se dieto i yayi: lunga-lunga wan’a nsona ye akento bafwilwa akala muna mpasi zau, yo kondwa e tona muna mambu ma nza.” (Yakobo 1:26, 27, tala mvovo vana yanda lukaya) Bibila kiyikilanga nsambila yayi vo ‘nsambila yavelela,’ kadi yakondwa umpuki.