Aweyi Kimenga kia Yesu Kinina se “Lukûlu lwa Wantu Ayingi”?

WINIKINA MU

Mvutu za Bibila

Muna kimenga kia Yesu, Nzambi okutuvevola muna sumu yo lufwa. Bibila kivovanga vo menga ma Yesu mena se ntalu a lukûlu. (Efeso 1:7; 1 Petelo 1:18, 19) Muna kuma kiaki, Yesu wavova vo wayiza ova ntoto muna “vana moyo andi se lukûlu lwa wantu ayingi.”—Matai 20:28.

Ekuma “lukûlu lwa wantu Ayingi” lwinina o mfunu?

Nzambi wavanga Adami wa muntu antete se muntu walunga, kakala ye sumu ko. Wakala ye lau diazinga yakwele mvu, kansi wavidisa elau diadi vava kakolamena Nzambi. (Tuku 3:17-19) Vava kawuta wana, wabasambukisa e sumu diandi. (Roma 5:12) Muna kuma kiaki, Bibila kivovanga vo Adami ‘wateka’ yandi kibeni yo wan’andi muna ubundu wa sumu yo lufwa. (Roma 7:14) Ke vena muntu ko kwadi lenda futa kina Adami kavidisa, kadi awonso asumuki.—Nkunga 49:7, 8.

Nzambi wafwila wan’a Adami e nkenda wau vo ke bakala diaka ye vuvu ko. (Yoane 3:16) Kansi mu kuma kia unsongi wandi, Nzambi kakanga meso ko mu sumu diampwena bavola yovo kubayambulwila. (Nkunga 89:14; Roma 3:23-26) Wau vo Nzambi ozolanga wantu, wavanga e nkubika ya unsongi muna loloka yo vunzuna masumu meto. (Roma 5:6-8) O lukûlu lwa Yesu i nkubika yayi.

Adieyi lukûlu luvanganga?

Muna Bibila o mvovo “lukûlu” utadidi mambu matatu:

Mfutu.—Ntalu 3:46, 47.
Lutwasanga luvevoko yovo luvuluzu.—Luvaiku 21:30.
O mfutu ufwete kala wafwanana ye lekwa kina kifwete kûlwa. a

Tala una mambu mama mena ngwizani ye lukûlu wa Yesu Kristu.

Mfutu. Bibila kivovanga vo Akristu mu ‘ntalu basumbilwa.’ (1 Korinto 6:20; 7:23) E menga ma Yesu i mfutu “wasumbila Nzambi o nkangu muna makanda mawonso ye ndinga ye nkangu ye zula.”—Lusengomono 5:8, 9.
Luvevoko. E kimenga kia lukûlu lwa Yesu kikutuvevolanga muna sumu.—1 Korinto 1:30; Kolosai 1:14; Ayibere 9:15.
Lwafwanana. E kimenga kia Yesu kiafwanana ye kina Adami kavidisa, i sia vo, moyo alunga. (1 Korinto 15:21, 22, 45, 46) Bibila kivovanga vo: “Wau vo muna ukolami wa muntu mosi, ndonga yakitulwa se asumuki, diau dimosi mpe muna nlemvo wa muntu mosi [Yesu Kristu], ndonga bekitulwa se ansongi.” (Roma 5:19) E sono kiaki kitoma kiesesanga una lufwa lwa muntu mosi kaka, lwafutila lukûlu lwa asumuki ayingi. Ozevo, e kimenga kia Yesu, i “lukûlu lwafwana kwa wantu awonso,” ana bevaganga e ngolo muna tambula e nluta miandi.—1 Timoteo 2:5, 6.

a Muna Bibila o mvovo wasekola vo “lukûlu” una ye nsasa vo mfutu yovo ntalu ifutwanga muna sumba e lekwa. Muna bonga e nona, mvovo wa Kiyibere ka·fár una ye nsasa vo “fuka.” (Tuku 6:14) Diau dimosi mpe o mvovo wa Kingerekia lyʹtron, usekolwanga vo “lukûlu” olenda sekolwa mpe vo “ntalu.” (Matai 20:28) Asoneki a Ngerekia basadila mvovo wau muna yika e ntalu yafutwanga muna kûla soladi wakala muna boloko yovo muna vevola ntaudi.