Жакан 10:1—42
10 Иса: «Силерге чындыкты айтып коёюн, ким кой короого эшигинен эмес, башка жагынан кирсе, ал — ууру, талап-тоноочу.+
2 Ал эми ким эшигинен кирсе, ал — койчу.+
3 Кароолчу ага эшикти ачып берет.+ Койлор койчунун үнүн угушат.+ Ал болсо койлорун атынан чакырып, тышка чыгарат.
4 Койлорунун баарын чыгаргандан кийин алардын алдына түшөт, койлору болсо артынан ээрчишет, анткени анын үнүн таанышат.
5 Алар чоочун бирөөнү эч качан ээрчибейт, тескерисинче, андан качышат, анткени чоочундардын үнүн таанышпайт»,— деди.
6 Иса өзүн угуп тургандарга ушундай мисал айтып берди. Бирок алар айтылгандардын маанисин түшүнүшкөн жок.
7 Ошондуктан Иса кайрадан мындай деди: «Силерге чындыкты айтып коёюн, мен койлор кире турган эшикмин.+
8 Ал эми менин атымды жамынып келгендердин баары — ууру, талап-тоноочу. Койлор алардын үнүн уккан эмес.
9 Мен эшикмин. Ким мен аркылуу кирсе, ал куткарылат. Ал ичкери кирет, тышка чыгат, жайыт табат.+
10 Ууру койлорду уурдаганы, өлтүргөнү, жок кылганы гана келет.+ Мен болсо алар өмүр алышы үчүн, чексиз өмүр алышы үчүн келдим.
11 Мен жакшы* койчумун.+ Жакшы койчу койлору үчүн жанын берет.+
12 Ал эми жалданган киши койчу эмес, койлор да ага таандык эмес. Ошондуктан карышкырдын келатканын көргөндө ал койлорду таштап, качып кетет. Карышкыр койго тийип, аларды туш тарапка чачыратат.
13 Ал киши тек гана жалчы болгондуктан койлорду карабайт. Ошон үчүн качып кетет.
14 Мен жакшы койчумун. Атам мени, мен Атамды билгендей эле,+
15 мен койлорумду билем, алар да мени билет.+ Мен койлорум үчүн жанымды берем.+
16 Менин бул короодогу койлордон башка койлорум да бар.+ Мен аларды да алып келишим керек. Алар менин үнүмө кулак салат. Ошондо бир отор, бир койчу болот.+
17 Атам мени жакшы көрөт,+ себеби мен өз өмүрүмдү берип жатам.+ Мен аны кайра алыш үчүн берем.
18 Өмүрүмдү менден эч ким тартып алып жаткан жок, аны өз эрким менен берип жатам. Өмүрүмдү бергенге да, кайра алганга да бийлигим бар.+ Ушундай кылышым керектигин мага Атам айткан*».
19 Ушул сөздөрдөн улам жүйүттөр кайрадан өз ара бөлүнүп-жарыла башташты.+
20 Көптөрү: «Мунун ичинде жин бар, акыл-эси жайында эмес. Муну эмнеге угуп турасыңар?» — дешсе,
21 башкалары: «Ичинде жини бар киши минтип сүйлөбөйт. Анын үстүнө, жин сокурлардын көзүн айыктыра алмак беле?» — деп жатышты.
22 Ошол убакта Иерусалимде Арноо майрамы* өтүп жаткан. Кыш мезгили эле.
23 Иса ибадаткананын Сулаймандын катар түркүктөрү деп аталган жеринде+ басып жүргөндө,
24 жүйүттөр аны тегеректеп алып: «Качанкыга чейин бизге айтпай жүрө бересиң? Машаяк болсоң, ачык эле айтпайсыңбы»,— дей башташты.
25 Иса аларга: «Мен силерге айткам, бирок ишенбей жатасыңар. Атамдын атынан кылып жаткан иштерим менин ким экенимди тастыктап турат.+
26 Ошентсе да ишенбей жатасыңар, анткени менин койлорум эмессиңер.+
27 Менин койлорум үнүмө кулак салат. Мен аларды билем, алар да мени ээрчийт.+
28 Мен аларга түбөлүк өмүр берем,+ алар эч качан өлбөйт, аларды менин колумдан эч ким тартып ала албайт.+
29 Атамдын мага берген койлору баарынан баалуу. Аларды Атамдын колунан эч ким тартып ала албайт.+
30 Атам экөөбүз бирбиз*»,— деди.+
31 Жүйүттөр кайрадан таш алып, Исаны урмакчы болушту.
32 Ошондо ал: «Мен Атамдын эрки менен силердин көз алдыңарда көп жакшы иштерди кылдым. Ошолордун кайсынысы үчүн мени таш бараңга алганы жатасыңар?» — деди.
33 Жүйүттөр ага: «Биз сени жакшы ишиң үчүн эмес, Кудайга акарат кылганың үчүн таш бараңга алганы жатабыз.+ Анткени сен адам болуп туруп, өзүңдү кудай кылып жатпайсыңбы»,— деп жооп беришти.
34 Иса аларга: «Өзүңөрдүн Мыйзамыңарда Кудай: „Мен өзүм: “Силер кудайларсыңар*”,+— дегем“,— деп айтпады беле?
35 Ыйык Жазмада айтылгандарды эч бир адам жокко чыгара албайт. Эгер Кудай өзү айыптагандарды „кудайлар“+ деп атаса,
36 анда эмнеге Атам өзү ыйыктап, дүйнөгө жиберген мага „Кудайдын Уулумун“+ дегеним үчүн: „Кудайга акарат кылып жатасың“,— дейсиңер?
37 Эгер Атам айткан иштерди кылбай жатсам, анда мага ишенбей эле койгула.
38 Ал эми кылып жатсам, айткандарыма ишенбесеңер да, иштеримди көрүп ишенбейсиңерби.+ Ошондо Атам мени менен, мен Атам менен биримдикте экенимди билесиңер да, муну айкыныраак түшүнө бересиңер»,+— деди.
39 Муну укканда алар Исаны кармаганга кайрадан аракет кылышты, бирок ал карматкан жок.
40 Андан кийин Иса кайрадан Иордан дарыясынын аркы өйүзүнө — Жакан башында элди чөмүлдүргөн жерге+ — барды да, ошол жакта калды.
41 Ага көп киши келди. Алар: «Жакан эч кандай керемет көрсөтпөсө да, бул киши жөнүндө айткандарынын баары чын экен»,+— деп жатышты.
42 Ошентип, ал жакта Исага көптөр ишенип калды.
Шилтемелер
^ Же: «мыкты, эң сонун».
^ Же: «буйрук кылган».
^ Жүйүттөрдүн Сирия-Грек бийлигинен эркиндикке чыкканын жана биздин заманга чейинки 165-жылы Иерусалимдеги ибадаткананын Жахабага кайрадан арналганын эске салган майрам.
^ Же: «биримдиктебиз».
^ Же: «кудай сыяктуусуңар».
