Жезекиел 36:1—38
36 «Сен болсо, адам уулу, пайгамбарлык кылып, Ысрайылдын тоолору жөнүндө мындай де: „Оо, Ысрайылдын тоолору, Жахабанын сөзүн уккула.
2 Эгедер Теңир Жахаба мындай дейт: “Душман силер жөнүндө: “Ырас болду! Атүгүл байыркы бийик жерлер да биздин энчибизге тийди”,— деп жатат”“.+
3 Ошондуктан пайгамбарлык кылып, мындай деп айт: „Эгедер Теңир Жахаба мындай дейт: “Душмандар силерди кыйратып, туш-туштан кол салышты. Кошуна элдердин аман калгандары силерге ээлик кылгысы келип, силерди сөз кылып, жалаа жаап жатышат.+
4 Ошон үчүн, оо, Ысрайылдын тоолору, Эгедер Теңир Жахабанын сөзүн уккула! Эгедер Теңир Жахаба тоолор менен адырларга, дарыялар менен өрөөндөргө, талкаланып жаткан урандыларга+ жана тегеректеги элдердин аман калгандарына олжо болуп, шылдыңына калган ташталган шаарларга кайрылып жатат.+
5 Эгедер Теңир Жахаба: “Мен элдердин аман калгандарына, бүт Эдомго каарымды жалындатып,+ аларга каршы сүйлөйм. Алар кыйынсынып менин жеримди биздики деп жарыялашты, ошондой эле жайыттарын басып алып, жеримди талап-тоноону ойлошту,+ ошого төбөсү көккө жете сүйүнүштү”,+— дейт”“.
6 Ошондуктан Ысрайыл жери жөнүндө пайгамбарлык кылып, тоолор менен адырларга, дарыялар менен өрөөндөргө мындай де: „Эгедер Теңир Жахаба мындай дейт: “Башка элдер силерди кор кылып, басынтканы үчүн, каарданып, ачууланып алардын эмне болорун айтам”“.+
7 Ошон үчүн Эгедер Теңир Жахаба мындай дейт: „Мен колумду көтөрүп ант берем: тегерегиңердеги элдер өздөрү да кор болуп, басынтылышат.+
8 Силер болсо, Ысрайылдын тоолору, дарактарыңар бутак жайып, ысрайыл элиме жемиш берет,+ анткени элимдин кайтып келерине аз калды.
9 Мен силерди* колдоп, назарымды салам. Силер иштетилесиңер, силерге үрөн себилет.
10 Элиңерди, бүт ысрайыл элин, алардын баарын, көбөйтөм; шаарларга эл отурукташат,+ урап жаткан шаарлар кайра курулат.+
11 Элиңерди да, малыңарды да көбөйтөм.+ Көп балалуу болосуңар, малыңардын төлү да жакшы болот. Силерге мурунку убактагыдай эл отурукташтырам,+ баштагыдан да көбүрөөк гүлдөтөм.+ Ошондо менин Жахаба экенимди билесиңер.+
12 Үстүңөрдөн адамдарды — ысрайыл элимди — бастырам, алар силерди ээлешет.+ Силер алардын мурасы болосуңар, ошондон кийин алар силердин айыңардан балдарынан ажырабайт“».+
13 «Эгедер Теңир Жахаба мындай дейт: „Алар силерге: “Адамдарды жеп-жуткан, элдериңди балдарынан ажыраткан жерсиң”,— деп жатышат“.
14 „Ошондуктан мындан ары адамдарды жеп-жутпайсың, элдериңди балдарынан ажыратпайсың,— дейт Эгедер Теңир Жахаба.—
15 Мындан ары элдер сени кемсинтпегидей кылам, экинчи алардан кордук көрбөйсүң,+ элдериңди каргашага кабылтпайсың“,— дейт Эгедер Теңир Жахаба».
16 Жахаба мага дагы кайрылып, мындай деди:
17 «Адам уулу, ысрайыл эли өз жеринде жашап жүргөндө аны жүргөн жолу, кылган иштери менен арамдады.+ Айызы келип жатканда аял таза эмес болгондой эле, алардын жолу да көз алдымда таза эмес болчу.+
18 Ошондуктан бул жерде кан төгүшкөнү үчүн,+ бул жерди жийиркеничтүү буркандары менен арамдашканы үчүн аларга каарымды төктүм.+
19 Аларды элдердин арасына, жер-жерлерге чачыратып жибердим.+ Жүргөн жолуна, иштерине жараша соттодум.
20 Бирок алар ошол элдердин арасына барганда, ал элдер алар жөнүндө: „Булар — Жахабанын эли, бирок ал берген жерден кеткенге аргасыз болушту“,— деп айтып, ыйык ысмымды булгашты.+
21 Ошондуктан ыйык ысмым үчүн чара көрөм, себеби ысрайылдыктар өздөрү барган элдердин арасында ысмымды булгашты».+
22 «Ошондуктан ысрайыл элине айт: „Эгедер Теңир Жахаба: “Оо, ысрайыл эли, силер үчүн эмес, силер башка элдердин арасына барганда булгаган ыйык ысмым үчүн чара көрөм”,— дейт“.+
23 „Мен силердин айыңардан башка элдердин арасында булганган улуу ысмымды сөзсүз ыйыктайм.+ Силерге кылган мамилем менен башка элдерге өзүмдүн ыйык экенимди көрсөткөндө, алар менин Жахаба экенимди билишет,+— дейт Эгедер Теңир Жахаба.—
24 Силерди элдердин арасынан алып чыгып, бардык жерлерден кайра чогултуп, өзүңөрдүн жериңерге алып келем.+
25 Үстүңөргө таза суу чачам, ошондо тазаланасыңар.+ Силерди ыпылас нерселериңердин, жийиркеничтүү буркандарыңардын баарынан арылтып, тазалайм.+
26 Силерге жаңы жүрөк берем,+ ичиңерге жаңы рух салам.+ Көкүрөгүңөрдөн таш жүрөктү алып,+ эт жүрөк* берем.
27 Ичиңерге ыйык рухумду салам, ошондо силер менин көрсөтмөлөрүм боюнча жүрүп,+ чечимдериме карманып, аларды аткарасыңар.
28 Ошондо мен ата-бабаларыңарга берген жерде жашайсыңар. Силер менин элим болосуңар, мен силердин Кудайыңар болом“.+
29 „Силерди бардык ыпылас нерселериңерден арылтам, дан өсүмдүктөрүнө мол түшүм беришин буйрук кылам, ачарчылык жибербейм.+
30 Бак-дарактардын мөмөсүн, талаалардын түшүмүн мол кылам. Ошондон кийин ачарчылыктын айынан башка элдерге эч качан шылдың болбойсуңар.+
31 Силер жаман жүрүм-турумуңарды, жаман иштериңерди эстейсиңер, күнөөлөрүңөр менен жийиркеничтүү иштериңерден улам өзүңөрдөн жийиркенесиңер.+
32 Бирок билип койгула, муну силер үчүн кылып жаткан жокмун,+— дейт Эгедер Теңир Жахаба.— Оо, ысрайыл эли, жүрүм-турумуңардан уялгыла, басынгыла“.
33 Эгедер Теңир Жахаба мындай дейт: „Мен силерди бардык күнөөлөрүңөрдөн тазалаган күнү шаарларга эл отурукташтырам,+ талкаланган шаарлар кайра курулгудай кылам.+
34 Ары-бери өткөндөрдүн баары ээн калганын көргөн жер кайрадан иштетилет.
35 Элдер: “Ээн калган бул жер Эйден багындай+ болуп калды; кыйратылып, эч ким жашабай ээн калган шаарлар курулуп чыңдалды, аларга эл отурукташты”,— деп айтат.+
36 Ошондо тегерегиңердеги аман калган элдер кыйратылганды тургузган, ээн калганды гүлдөткөн мен, Жахаба, экенимди билишет. Муну айткан да, ишке ашырган да менмин, Жахабамын“.+
37 Эгедер Теңир Жахаба мындай дейт: „Ошондой эле ысрайыл элине өздөрүн отордой көбөйтүшүмдү өтүнүшүнө жол берип, өтүнүчүн орундатам.
38 Майрам учурунда+ Иерусалим адамдарга*, ыйыктардын тобуна, толгондой эле, урап жаткан шаарлар кайрадан элге толот.+ Ошондо эл менин Жахаба экенимди билет“».
Шилтемелер
^ Сыягы, бул жерде айтылган Ысрайылдын тоолору ысрайыл элин жана алардын жерин билдирет.
^ Б. а. Кудайдын жетегине баш ийген жүрөк.
^ Же балким: «курмандыкка чалына турган отор-отор койлорго».
