Ngano kulendi bâ tinsamu tia mbongo tia buderede?
Mu nsi zazingi, bantu mbo badukaka mu nzila mu telamana bimfumu mu bungu ti mbo bamonaka ti kondo kwa buderede bisarilaka mu misamu mia mbongo. Coronavirus yayizi vutu tomo bebesa misamu; bantu bayizi vutu tomo bâ mu nkesi mu bungu ti confinement, kondo kwa bidia na musamu wutariri bukusu watomono songela luswaswanu lwe ha kati dia bamvwama na bamputu.
Ngano misamu mia mbongo mita mwisa bantu mpasi mbo miwa lumbu? Yee. Bibila mbo dizonzelaka misamu mi yirika Nzambi mu manisa misamu mieto miamiansoni.
Misamu mia mbongo mi yirika Nzambi
Musamu: Bantu ka balendela ko mu tûla tinsamu tia mbongo tilungisa nsatu za bantu babansoni.
Mpila yi yilamana musamu: Nzambi mbo kakatula guvernema zazansoni za bantu mpe mbo kayingasa ya yandi beni yi batâka Timfumu tia Nzambi. Tûka ku mazulu, mbo tiyâla mutoto wawansoni.—Daniele 2:44; Matie 6:10.
Ndandu: Mu bungu ti mbo tiyâla nza ya mukaka, Timfumu tia Nzambi mbo titomo kipa misamu mia bantu. Kani kabwe, bantu ka bavutu’â bâ bamputu ko peleko ka bavutu’â kondo tima ko. (Mikunga 9:7-9, 18) Mbo bamona nsayi ya tisalu tiawu, mpe mbo babâ na luzingu lwa nsayi mu kanda diawu. Bibila ditukanisini ti: ‘Mbo batunga nzo mpe mbo babêla zo, mbo bakuna miti mia vinu mpe mbo badila mio mbutu. Ka batunga ko ngatu muntu wakaka wabêla, ka bakuna ko ngatu muntu wakaka wadia.’—Izaya 65:21, 22.
Musamu: Misamu mi mwisaka mpasi na milendi sa ti takondo bima bie neto nsatu ka tulendi’â tadioka mio ko.
Mpila yi yilamana musamu: Mu nzila ya Timfumu tiandi, Nzambi mbo kakatula misamu miamiansoni mitâka lwaka na mitâka bunkuta.
Ndandu: Mu ntangu yiyâla Timfumu tia Nzambi, bantu ka bavutu’â bwabana na misamu ko mi sa ti, bawu peleko makanda mawu, bakondo bima bia mfunu. Mu tifwani, mizingu, kondo kwa bidia na pandemie ka bivutu’â kwa sala ko. (Mikunga 46:9; 72:16; Izaya 33:24) Nzambi têle ti: “Kanda diani mbo dibêla mu bibuka bia dzuna, mu nzo za ngolo na mu mbuka za humina za dzuna.”—Izaya 32:18, NWT.
Musamu: Bantu bê na bwimi mpe bê na bundiafu mbo bamwisaka bampwana’awu mpasi.
Mpila yi yilamana musamu: Bantu babâ mu Timfumu tia Nzambi mbo balongoka mu yôkesa nsatu za bantu bakaka ntete za bawu beni.—Matie 22:37-39.
Ndandu: Mu ntangu yiyâla Timfumu tia Nzambi, bantu babansoni mbo balanda luzolo lwa Nzambi, lulembo ‘dingaka ndandu ya yandi beni ko.’ (1 Bisi-Korente13:4, 5) Bibila mbo ditâka ti: ‘Ka kubâ kani mbi keti lufuku ko ku mongo’ani wawansoni wa santu, mu bungu ti mutoto mbo wufuluka mu luzabu lwa Yehova a, ntiana kwa mamba bu mayabamaka mubu.’—Izaya 11:9.
Bibila mbo disongelaka ti mu ntangu ya mansukina ya nza yi twena mpe ntamana Nzambi mbo kalungisa kani diandi dia manisa misamu miamiansoni mia mbongo. b (Mikunga 12:5) Ntete musamu wo watula, mitieno mia Bibila milendi lubakisa mu telamana misamu mi luta bwabana na mio bwawu bu. Mu tifwani, tala bimoko bie na mutu-diambu “Comment vivre avec moins” na “L’argent et vous.”
a Yehova ni nkumbu ya Nzambi yi bazonzelaka mu Bibila.—Mikunga 83:18.
b Mu zaba ka mu bungu dia nti lufweti kwikilaka Bibila, taleno timoko tie na mutu-diambu, “La Bible: une source de vérités fiable.”
