Mikayele, wubatâka mpe “Santu Mikayele,” mu mabundu makaka, ni nkumbu yi bahana kwe Yezu ntete kiza ha mutoto mpe bu kakâla ku zulu. a Ha manima ma lufwa lwa Mose, Mikayele na Satana badisikita mpe Mikayele wabakisa mbazi yimosi mu kwe hana nsangu za Nzambi kwe mbikuri Daniele. (Daniele 10:13, 21; Yude 9) Mikayele misamu mi delakane na nkumbu’andi kayirikaka, yita zolo tâ​—“Nani we ntiana Nzambi?”​—mu bungu ti nkumbu ya Nzambi kanwaninaka mpe mbeni zandi ka nwanisaka.​—Daniele 12:1; Nzabukusu 12:7.

 Tataluzuleno misamu mita songela ti Yezu ni Mikayele Mfumu-Bambazi.

•   Mikayele ni “Mfumu-Bambazi.” (Yude 9) Nkumbu ya buzitu ya “Mfumu-Bambazi,” mu verse zole kwa yimonekaka. Mpe mu mbuka zango za zole, nkumbu yo ya muntu wumosi kwa yena, mpe wusongele ti mbazi yimosi kwa batâka yo. Mu mosi ya verse zango mbo tutangaka ti Mfumu Yezu “mbo kakoka ku zulu na zu dia bamfumu, na zu dia mfumu-bambazi.” (1 Bisi-Tesalonike 4:16) Yezu “zu dia Mfumu-Bambazi” die nandi mu bungu ti ni yandi we mfumu-bambazi.

•   Mikayele mukangu wa binwani wa bambazi katumaka. “Mikayele na mbazi zandi banwanisa drago,” Satana. (Nzabukusu 12:7) Mikayele lutumu lwa nkatika lwa lunene lwe nandi, mu bungu ti mbo bamutâka “mosi wa mfumu za zinene” na “mfumu ya yinene.” (Daniele 10:13, 21; 12:1) Nkumbu zo za buzitu zisongele ti Mikayele ni “mfumu ya mukangu wa wunene wa bambazi,” ntiana buta watâ Nouveau Testament ya David E. Aune muntu wumosi wa mayela.

   Bibila nkumbu ya muntu wumosi wakaka dizonzelaka wutumaka mukangu wa binwani wa bambazi. Mbo dizonzelaka ntangu “Mfumu Yezu katelama ku zulu na mbazi zandi za ngolo mu tiya twa ngolo bu kakarisa mbi.” (2 Bisi-Tesalonike 1:7, 8; Matie 16:27) Yezu “wayenda ku zulu, mpe batûla mu lutumu lwandi bambazi, bimfumu, na ngolo.” (1 Piere 3:21, 22) Ka tulendi’â tabanza ko ti Nzambi watûla Mikayele na Yezu ntiana mfumu ze mbanda mu tuma mukangu’andi wa santu wa bambazi. Ntiangu wudelakane mu banza ti Yezu na Mikayele muntu wumosi kwa wena.

•   Mikayele “mbo katelama” mu “ntangu ya mpasi” mu mpila yi yalembo toko moneka. (Daniele 12:1) Mu mukanda wa Daniele, ntêlo ya “telama” mutinu wuta telama mu yirika tima yizonzelaka. (Daniele 11:2-4, 21) Yezu Kristo wubatâka “Zu dia Nzambi,” mpe “Mutinu wa mitinu” mbo kayirika musamu mu honda mbeni zazansoni za Nzambi mpe mbo kakengerela bisari biabiansoni bia Nzambi. (Nzabukusu 19:11-16) Mu ntangu ya “mpasi ntiana bu kwalembo kwabâ tûka mbatukulu ya nza” kayirika musamu wo.​—Matie 24:21, 42.