1. Nga ko rr nari ká ka ndi é kpakpa addudho?

 NJA SAA na, ká ni adi rinja ri kʉ kpakpa ni rrnga? Pi Daudi ma bangʉeni fø di ná lo na ddi, føri dho ke nzingʉeri Mungu tso: “Ali ni dho ma ka ma rrnga nari dhi ù ma na.” (Zb. 51:12) Daudi jingʉe Yova ji. Ro, nja saa na ringʉe kpakpa Daudi dho ke rrnga ndirigoti ko dho ma rie fø ddi. Ká addudho? Dhonalo ya kwanza, ko gøni gø nzɨ le ngarr ná føri na ko ndí na. Ya pili, Shetani adi rimbu ndi cho ko, ko tsatsa Yova ro ndi njingʉeri nari bbai. (2 Ko. 11:3) Ya tatu, ko ronga tso d’e nari kʉ i dz’ dzá tsatsa ná ndrŭ dhó ngaddidha, føri i kʉ “nzɨ ngarr ná nzø na adi njínji kpadjo ná roho.” (Efe. 2:2) Ko nzá ka ko njí kpakpanga ko njí lɨ chenga na ka ndi tsu ko ná lo tso ró dhé ri, ro Ibilisi ma, tsatsa ná i dz’ ma na adi ko cho ndiro nzɨ ko rrnga ró ná lo tso ró maddi. Ringani ko njí kpakpanga bbo ndiro ko rrnga Yova dho ndirigoti bbobbonga ke bbʉ dhó ná kpa dho maddi d’e.

2. “Tayari le kʉ ngarrdha dho” nari na mana ká kʉ addu? (Yakobo 3:17)

² Azø Yakobo 3:17. Roho dda chutso ndi dho ro Yakobo pongʉeri, nyodyu dhi ndrŭ e “tayari ngarrdha dho.” Addinga fø lo na mana ká kʉ addu ma nari djo. Ringani ko nanga jini ji ndirigoti ko é tayari ngarrdha dho bbobbonga Yova bbʉ dhó ná kpa dho. Bbʉbbʉ dhé, Yova nzɨ adi riji ko rrnga nzá gbani ndidhó yadha na ná lo po ko njí ná ke dho ri.​—Mdo. 4:18-20.

3. Ko djo kʉ bbonga na ná kpa dho ko ngarr nari ká Yova adi nja mana na addudho?

³ Njaro ko ka ko ddiri Yova dho ko ngarr nari kʉ sʉsʉ ndrŭ dho ko ngarr nari djolu. Føri djolu pli, Yova dhó chutsoddadha e ka ndi ka ro. (Zb. 19:7) Ro, bbobbonga na kʉ nari kʉ nzá kaka ná ndrŭ. Nì mai ri kʉ føro, kodhi ra nǎ Baba bbʉ ddikpa bbonga ro gø dhi ndrŭ ma, guvernema ma, wazee ma na dhó. (Mez. 6:20; 1 Te. 5:12; 1 Pe. 2:13, 14) Bbʉbbʉ dhé, ko di ngarr kpa dho ró, føri na ko ngarr Yova dho. Akonja  ngbaribbai ma ko ka ko rrnga bbonga Yova bbʉ dhó ná ndrŭ dho nari, ngbà mai nja saa na ko ka ko njari nari kʉ, ri kʉ kpakpa ko rrnga ndirigoti ko dyø kpadhó chutsoddadha ro.

4. Bí kʉ ná nzø ká adi ngarr nzɨ ndima dhi gø dhi ndrŭ dho addudho?

⁴ Jadda kpa ronga tso d’e nari kʉ “nzɨ ngarr ndima dhi gø dhi ndrŭ” dho ná jadda kpa. (2 Ti. 3:1, 2) Kpa kana bí kʉ ná kpa ká adi ngarr nzɨ addudho? Nja kʉ ná gø dhi ndrŭ nzɨ adi ndima po ndima dhi nzø njí ná lo ro nji ri. Føri dho, kpadhi nzø adi rinja ndima nzá ka ndima rrnga kpa dho ri. Nja kʉ ná nzø njari nari kʉ ndima dhi gø dhi ndrŭ dhó shauri ddo da b’lo, ri na nzá le ka le njinjí ri inga ri kʉ makali bbo. Njati ni é jadda ke ró ni ma ká adi riddi føi? Bí kʉ ná nzø njari, ri kʉ kpakpa le rrnga Yova dhó i yadha dho: “Anirrnga nidhi gø dhi ndrŭ dho, ddi ni tso gbani Bboke na ro dhonalo føri kʉ chølo.” (Efe. 6:1) Nde, ni tsotso ká addu ka ndi kó ndiro ni njiri fø d’e?

5. Ká addudho Yesu kʉ bblo pli kʉ ná loroji ndidzá gø dhi ndrŭ dho ndi ngʉ ngarr nari kana? (Luka 2:46-52)

⁵ Ni ka ni ba somo nga le rr nari djo Yesu dhó bblo pli kʉ ná loroji nǎ ro. (1 Pe. 2:21-24) Ke ngʉe kaka ná ke, ro kedhó gø dhi ndrŭ ngʉe nzá kaka ná ndrŭ. Ro, Yesu ngʉ adi heshima bbʉ ndidzá gø dhi ndrŭ dho njati kpa njí kosa ma, inga kpa famu ndi nzá ma bblo nja saa na ró. (Kut. 20:12) Akonja 12 Yesu dhó cho ngʉe ro njingʉeni ná lo. (Azø Luka 2:46-52.) Yesu dzá gø dhi ndrŭ bbangʉe ke Yerusalemu na. Ringangʉeni Yosefu ma, Maria ma na churi nari kʉ, ndima ngʉ nzø ma na krʉ ngbà abba fete goti. Føro, Yosefu ma, Maria ma na ba Yesu nari goti Maria ongʉe bbo Yesu na ke mangʉe Yerusalemu na nari dho! Yesu ka ndi pongʉeri føri nga kʉ chølo ri. Ro, ke ngʉngʉe logoti bblo ndi chu na ndirigoti heshima na ndidzá gø dhi ndrŭ dho. Nì mai ri kʉ føro, Yosefu ma, Maria ma na “nzá famungʉe ke po ndima dho ná lo ro ri.” Ro, Yesu “rangʉe anzi dhé ndi ngarr kpa dho nari na.”

6-7. Jadda kpa tsotso ká addu ka ndi kó ndima rrnga ndima dhi gø dhi ndrŭ dho d’e?

⁶ Jadda kpa ni dho ká rie kpakpa ni rrnga nidhi gø dhi ndrŭ dho, njati kpa njí kosa inga kpa famu ni bblo nzá ró? Ni tsotso ká addu ka ndi kó? Ya kwanza, addinga ngbaribbai ma Yova ndi mbu nari djo. Biblia ripo, nidhi gø dhi ndrŭ dho ni ngarr ná føri kʉ “Bboke nyǒ adi tho ná lo.” (Kol. 3:20) Yova chu nja saa na nzá nidhi gø dhi ndrŭ ka ndima famu ni ro ri nari chu inga kpa ka ndima bbʉ kpakpa ronga dyu ná yadha ni dho nari maddi. Ro, ni rrnga kpa dho krʉ kʉ ná chu nǎ ró, føri na ni hwè bbʉ Yova thí dho.

⁷ Ya pili, addinga ngbaribbai ma nidzá gø dhi ndrŭ ndima mbu nari djo. Njati ni rrnga nidzá gø dhi ndrŭ dho ró, føri na ni hwè bbʉ kpa dho ndirigoti føri ka ndi liri kpa li ndima thí bbo ni djo. (Mez. 23:22-25) Føri goti ni kana nga sie chøchø kpa na. Le-djo Alexandre pori, “Madzá gø dhi ndrŭ po ná lo ma ngʉ adi rr ná saa na, ko kana nga ngʉngʉe chøchø bbo ndirigoti ko ngʉe hwè na.” Ya tatu, addinga ngbaribbai ma nidzá gø dhi ndrŭ dho ni ngarr njʉ nari si ni tsotso ko gosi ná saa na nari djo. Brésil nǎ di ná Paulo pori, “Madzá gø dhi ndrŭ dho ma ngʉ adi ngarr nari kongʉe ma tsotso ma rrnga Yova dho ndirigoti bbobbonga na kʉ ná kpa dho.” b Mungu dzá lo  d’ra nidzá gø dhi ndrŭ dho ni ka ni rrnga dho ná bblo pli kʉ ná sababu. Ri pori: “Føri ka ndi liri nidhó lo bbi bblo ndirigoti ni ddo bicha dz’ djó.”​—Efe. 6:2, 3.

8. Bí kʉ ná jadda kpa ká vʉri ndima rrnga ndima dhi gø dhi ndrŭ dho addudho?

⁸ Bí kʉ ná jadda kpa ra ri utso d’i ndima dhó lo adi bbi bblo ndima di ngarr ró. Brésil nǎ di ná le-ve Luiza pori, ya kwanza ringʉe kpakpa ndi famu addudho ma le pongʉeri ndi é ngadhó telefone ro nari, dhonalo ddiddi na ngba ma dhó cho ngʉe ná bí kʉ ná nzø ngʉe ndima dhó telefone na. Ro, luti le rangʉe ri utso d’i ndidzá gø dhi ndrŭ ngʉ ndi ronga b’ob’o. Kpadjo le pori, “ndi churi chu nari kʉ, ndidzá gø dhi ndrŭ dho ndi ngarr nari dho nzá ringani ndi mbu ndi prizo nǎ kʉ nari bbai ri, dhonalo kpa bbʉ nari kʉ ndidhó lo u ná shauri nganga.” États-Unis nǎ di ná le-ve Elisabeth dho rie kpakpa godhé ndi rrnga ndidzá gø dhi ndrŭ dho nja saa na. Le pori, “Nzá ma famu madzá gø dhi ndrŭ li ddikpa yadha dho ná lo bblo ró, føro ma adi ngaddi anziro kpadhó yadha b’ongʉe ma ronga nari djo.” Arménie nǎ di ná le-ve Monica pori, ndidzá gø dhi ndrŭ dho ndi rrnga ró ndidhó lo adi bbi bblo, ro nzá ndi rrnga kpa dho ró ndidhó lo nzɨ adi bbi bblo ri.

9. Bí kʉ ná ndrŭ ká adi riddi ngbǎ yadha dho le ngarr nari djo?

⁹ Biblia nzi guvernema “bbobbonga na kʉ ná kpa” ndirigoti bí kʉ ná ndrŭ uri nari kʉ, ri kʉ bblo le rrnga guvernema dho ndirigoti le rrnga ro kpadhó nja kʉ ná yadha dho maddi.” (Ro. 13:1) Ro, kpa nzɨ adi ngarr nzá ndima ji inga nga kʉ chø ri ndima nja ná yadha dho ri. Loroji na, akotilo kitase le bbʉ nari djo. Europe nǎ ddikpa ngø nǎ bí kʉ ná ndrŭ njari nari kʉ, ndima nzá ka ndima bbʉ nga kʉ chø ri ndima nja ná kitase ro ri.” Føri dho, fø ngø nǎ di ná bbaraia “nzɨ adi guvernema po ndima dzi ná kitase ro dzi krʉ ri.

10. Nzá ko ji ná yadha dho ma krʉ ká ko adi ngarr addudho?

¹⁰ Biblia pori ndrŭ dhó guvernema nzadha bbʉ, ri dho Shetani adi chutso ddá ndirigoti karrnga goti ri tso si d’ød’ø. (Zb. 110:5, 6; Muh. 8:9 Lu. 4:5, 6) Godhé ri pori, “Ddikpa ke di ddani guvernema tso ró ró, fø ke ddani Mungu kpe ná lo tso ró.” Yova bbanga guvernema nyopi nari dho, ke jiri ko maddi rrnga kpa dho. Føri dho ringani ko “bbʉ ndrŭ krʉ dho, kpa dho ringani ko bbʉ na ritsi” føri tsu ndi nǎ kitase ma, heshima ma, nga le rr nari ma na. (Ro. 13:1-7) Njaro ko ka ko nja ddikpa yadha nzá thonga ri, nga kʉ chø ri ndirigoti bbo ronga dyu ri. Ro, ko adi ngarr bbobbonga na kʉ ná kpa dho dhonalo Yova pori ko njiri fø, njati rie nzá ri d’rɨ ndidhó yadha nanga ri ró.​—Mdo. 5:29.

11-12. Luka 2:1-6 ripo nari bbai, Yosefu ma, Maria ma na ká njingʉe addu ndiro ndima rrnga yadha dho d’e ndirigoti ri nǎ ro ká ngbá matokeo singʉe? (Anja ji maddi.)

 ¹¹ Ko ka ko ba somo Yosefu ma, Maria ma na dhó loroji nǎ ro, tayari ndima ngʉe ndima rrnga bbobbonga na kʉ ná kpa dho ro, nga mai ringʉe sʉsʉ ndima dho fø saa na ndima njiri fø ro. (Azø Luka 2:1-6.) Maria dhó lɨnga ngʉ si chøchø bi 9 ro, le ma, Yosefu ma na dhó ngarrdha tsungʉe mbudha kana. Roma nǎ pi Augusto nzingʉeri ndidhó pidhinga tsena kʉ ná ndrŭ krʉ njí resasema ndima gøngʉeni ná bbagʉ. Yosefu ma, Maria ma na dho ringʉngani ndima rá Betlehemu na, føga kpa ka ndima njie kilometre 150, bí kʉ ná glʉ djó ndima ngʉ dji ndirigoti ndima ngʉ thʉ ro. Fø safari ka ndi ée kpakpa bbo, pli si ri Maria dho. Kpa nanga ri ka ndi die d’o Maria ma, ndidzá nzá d’e gøni ná ngba ma na dhó afya djo. Nde, ledhó lo ká ka ndi ée ngbǎ njati ledhó ngba gøeni go le ma kʉ chu nǎ ro ró? Le zz nǎ ngʉe tso djo le tsongʉeni ná Masiya. Nde, føri dho i ká le ka ndi rr e nga nzá guvernema dho?

¹² Ngbà mai Yosefu ma, Maria ma na ka ndima njie do dho ná lo ngʉe ro kpa rrngʉe nga yadha dho. Yova lengʉe kpadhó ngarrdha ronga le. Maria singʉe bblo Betlehemu na, le gøngʉe bblo dhó afya kʉ ná ngba ndirigoti føri lingʉeri Biblia nǎ unabi njini njí!​—Mi. 5:2.

13. Kodhó ngarrdha ká ka ndi lø ko djoi ronga ngbaribbai?

¹³ Ko di ngarr bbobbonga na kʉ ná kpa dho ná saa na ko ma, nja ndrŭ ma na adi faida ba. Nde, føri ká ka ndi njini ngbaribbai? Ko ka ko pʉ nzɨ ngarr ná ndrŭ ba ná malipizi ko ró ro. (Ro. 13:4) Ko di ngarr bbobbonga na kʉ ná kpa dho ná saa na, kpa ka ndima famu ri nari kʉ Yova dzá Dimu kʉ nì adi ngarr ná ndrŭ. Drrdrr b’lo da ná cho na Nigéria nǎ bbasødda tsungʉe Pidhinga dzá dza na njudha dhi saa na ndiro ndima ne nzá uri ndima bbʉ kitase ná ndrŭ d’e. Ro, kpadhó komanda pongʉeri kpa vʉvʉ ndirigoti ke pongʉeri: “Yova dzá  Dimu adi kitase bbʉ nì.” Krʉ saa ró nì ngarr yadha dho nari na ni rili bblo lo tini Yova dzá ndrŭ djo. Nja saa na føri ka ndi rili Yova dzá ndrŭ ronga b’oni b’o.​—Mt. 5:16.

14. Addui ká kongʉe ddikpa le-ve tsotso nja ndi é “tayari ngarrdha dho” bbobbonga na kʉ ná kpa dho d’e?

¹⁴ Ro, nja saa na nzá ko ka ko jiri ko rrnga bbobbonga na kʉ ná kpa dho ri. États-Unis nǎ kʉ ná le-ve Joanna pori, “ri ngʉe kpakpa bbo ma dho ma rrnga dhonalo madhó familia nǎ nja ndrŭ ró bbobbonga na kʉ ná kpa njingʉe nga kʉ chø ná lo.” Ro, Joanna njingʉe kpakpanga bbo ndiro ndi le ndidhó ngaddidha thika bbobbonga na kʉ ná kpa laidjo d’e. Ya Kwanza, le bbangʉe eternete djó ndrŭ adi ti bbobbonga djo ná lo ndi zø nari tso. (Mez. 20:3) Ya pili, le njingʉe sala Yova kó ndi tsotso ndi li ndi thí ke djo ndirigoti le bbangʉe guvernema thika le øe ø nari ndi nzi nari tso bba. (Zb. 9:9, 10) Ya tatu, le zøngʉe le ro nga kʉ ngbá laidjo maddi ri nari djo tilo ná kodhó vichapo. (Yoh. 17:16) Kpadjo Joanna pori, heshima le bbʉ ndirigoti bbobbonga na kʉ ná kpa dho le ngarr ná føri liri ndi é “ngoi na bbo pli.”

15. Nja saa na ká Yova dhó tengenezo bbʉ ná chutsoddadha dho ko ngarr nari adi si kpakpa addudho?

¹⁵ Yova rinzi ko tso ko “rrrnga chutso ddá ko dho ná kpa dho” kutaniko nǎ. (Ebr. 13:17) Nì mai ko dho chutso ddá ná Bboke Yesu kʉ kaka ná ke ro, i dz’ djó ke li ndima ddá chutso ko dho nari kʉ nzá kaka ná kpa. Nja saa na ri ka ndi é kpakpa ko dho ko rrnga kpa dho, pli si ri kpa nzi ko tso nari é nzá ko ji ná lo ró. Ddikpa saa na, mutume Petro nanga rɨngʉeni rɨ ndi ka ndi rrnga nari djo. Ddikpa malaika pongʉeri ke á nzá tsetse ri Musa dhó sheria ngʉ adi nzǐ ná zǎ ná saa na ke gʉngʉe ri gʉ, ri nzá ke gʉngʉe ddikpa ina dhé ri ro gbo ina! (Mdo. 10:9-16) Ká addudho? Ke nzá famungʉe ø kʉ ná chutsoddadha na mana ri. Føri ngʉe njonjo pli anziro ke ngʉ adi nji ndidhó maisha nǎ ná lo ró ro. Nde, rie Petro dho ringʉe kpakpa ndi rrnga kaka ná malaika bbʉngʉe ndi dho ná chutsoddadha dho ri ró, ri ka ndi é kpakpa bbo ko rrnga nzá kaka ná kpa bbʉ ko dho ná chutsoddadha dho!

16. Ngbà mai Paulo bangʉe ná chutsoddadha ngʉ njani nzá thonga nari bbai ro, ke ká njingʉe addu? (Matendo 21:23, 24, 26)

¹⁶ Mutume Paulo ngʉe “tayari ngarrdha dho” njati ndi dho le bbʉ ná chutsoddadha njani nzá dho ma le ka le rrnga nari bbai ró. Wakristo kʉ ná Wayaudi rrngʉe nga tselu ndrŭ ngʉ ti Paulo djo ná lo, ná fø lo ngʉe ke riddi “ndrŭ tsatsa Musa dhó sheria ro” ndirigoti nzɨ ndrŭ rrnga Musa dhó sheria dho. (Mdo. 21:21) Yerusalemu nǎ ngó ngʉ ná kpa jangʉeri Paulo dho ke dzi tho kʉ ná kpetsi kpa ndi kpa ma na ke ma rá hekalu na ndirigoti kpa liri ndima tsetse desturi nzingʉeri nari bbai, ndiri na ndima dhori nari kʉ ndima ngarr nì Musa dhó Sheria dho d’e. Ro, Paulo chungʉeri chu Wakristo ki nga kʉ Musa dhó Sheria tsena ri. Ndirigoti ke nzá njingʉe che kʉ ná ddikpa lo ro maddi ri. Ro, Paulo nanga ro nzá rɨngʉeni fø lo dho ndi ngarr nari dho ri. Ke “dzingʉe fø kpetsi kpa bbʉdyi ndirigoti ke ma, fø kpa ma na lingʉeri ndima tsetse desturi nzingʉeri nari bbai.” (Azø Matendo 21:23, 24, 26.) Paulo dhó ngarrdha lingʉeri le-djoi tso gbani ddi.​—Ro. 14:19, 21.

17. Ni ká ba ngbá somo Stephanie dhó loroji nǎ ro?

¹⁷ Stephanie ró dho kʉ ná le-ve dho ringʉe kpakpa ndi rrnga ndima dhó ngø nǎ  chutso ddá ná le-djoi vʉngʉe nanga ná lo dho. Le ma, ndibbá ke ma na ngʉe hwè na bbo d’i ngø nǎ luga le ngʉ ti nǎ ná kikundi nǎ ndima ngʉe nari dho. Ro, Tawi pongʉeri nzɨ fø kikundi njinjí ná saa na, ringʉngani kpa ngʉ ndima nganga dhó luga le ngʉ ti nǎ ná kutaniko na. Stephanie pori “føri nzá bbʉngʉe hwè ro ma dho karrrnø maddi ri. Ma nzá famungʉe ko nganga dhó luga ndrŭ ti nǎ ná kutaniko nǎ ká mahitaji ngʉe bbo ddi ma nari ro ri.” Nì mai ri kʉ føro, le vʉngʉeri ndi rrnga rr ø ndima bangʉe ná chutsoddadha dho. Le pori, “luti ma vengʉe fø le-djoi vʉngʉe nanga nari ngʉe nyodyu dhi lo nari famu.” “Kodhó ø kutaniko nǎ bí kʉ ná le-djoi ma, le-vei ma na dhó familia nga kʉ Yova dzá Dimu ri. Føri dho, ko ngʉ kpadhó familia ndirigoti ko adi kpa li kpakpa. Ma adi ngazø ø ki ngʉ ko kana ná djø djøngʉe ná le-ve na. Ndirigoti kpadjo saa e ma dho bbo ndiro ma njí funzo la pekee d’e.” Le pori, “Madhó zamiri tsetse dhonalo ma churi ma nji kpakpanga ngbà ka ná ngatsi ndiro ma rrnga d’e.”

18. Nga ko rr nari nǎ ro ká ko adi faida ba ngbaribbai?

¹⁸ Ri ka ndi kaka ko chu ngarrdha nga. Yesu “chungʉe ngarrdha nga ndi bangʉe ná nzadha ró ro.” (Ebr. 5:8) Yesu bbai bí ina ko adi nga le rr nari chu kpakpalo na ko bani ná saa na. Loroji na, Coronavirus tso ngangʉeni ná saa na le nzingʉeri nzɨ ko njuni Pidhinga dzá dza na ndirigoti nzɨ ko d’ra lo ki nyumba kwa nyumba, nde ni dho ká ringʉe kpakpa nì rrnga fø lo dho? Bbʉbbʉ dhé, nidhó ngarrdha b’ongʉe ni ronga b’o ndirigoti ri lingʉeri kutaniko tso gbani ddi ndirigoti føri bbʉngʉe hwè Yova dho. Ko krʉ le tayarisha bblo ndiro ko si ngarr bbò mbudha dhi saa na ko si ba ná lojadha dho d’e. Fø lojadha dho ko si ngarr nari si kodhó shinga ronga b’ob’o!​—Yob. 36:11.

19. Ni ká jiri ni rrnga addudho?

¹⁹ Ko churi nari kʉ kodhó ngarrdha adi bí kʉ ná ledha bbʉ. Ro, ko adi rivʉ ko rrnga Yova dho ya kwanza dho ná lo kʉ, ko ji ke ji ndirigoti ko jiri ko bbʉ hwè ke dho. (1 Yo. 5:3) Ko nzá ka ko bbʉ krʉ Yova nji ko dho ná fø ritsi be ro ri. (Zb. 116:12) Ro, ri ka ndi kaka ko rrnga ke dho ndirigoti bbobbonga na kʉ ná kpa dho. Njati ko rrnga ró føri na ko ridho ko kʉ nyodyu. Ndirigoti ko é nyodyu na ró føri na ko adi rili ke thí ba hwè.​—Mez. 27:11.