Le ama dria ma ovu sende be ecozu afa ama akuni le ’diyi isuzu. (E’yo O’beza 30:8) Asisile ’disi, ‘sende ni ’ba ma ta mba.’ (Eklesiaste 7:12) E’yo nzezu sende ma dria mi aje ma azi be ri eco ovu ewaru, te le mi ma fe sende ma eji e’yo ewaru aje emini ma alea ku. (’Ba Efesoa ’Diyi 4:32) Le ’ba aje ma alea ’diyi ma api e’yo ’yeza eyi ma eselea risi azini ma nga azi tualu geri sende ayuzu ri peria.

E’YO BIBLIA NI ’YORI: “’Ba emi eselia lepi jo izuru sipiri a’di i ya, eri ngani ri va silingi erini ngale ezaleri lazu raka ku ya, nizu kani eri ovu afa dri fupi jo nde dezu rari be?” (Luka 14:28) Eri orodriru emini geri emini ngazu sende ayuzu ri otuzu tualu. (Amosi 3:3) Emi ma pe afa emini le je ri azini sende emini eco ayu ra ri tualu. (E’yo O’beza 31:16) Le mi ma je afa sende mini ecozu eri jezu rini ovuzu ci risi ku. Mi o’bi mari ’duza ku ja. Mi ayu lu sende mivu ci ri i.—E’yo O’beza 21:5; 22:7.

AFA MINI ECO ’YERI:

• Sende azi ka ace mba ni i deria ci, emi otu emi nga eri ayu ngoniru’ari tualu

• Sende ka ca emini ayuzaru ku, emi ma ’ba otuta sende ayuza omvizu. Eceta si, emini muzu afa jezu ria, emi ma nda afa aje be were ’diyi je ’i

E’YO BIBLIA NI ’YORI: ‘Ama le e’yo ovupi kililiru ’diyi ’ye Yehova ma milia a’dule ku, te ’ba ma milia indi.’ (2 ’Ba Korintoa ’Diyi 8:21) Mi ma ece e’yo ada sende mini isu azini ayu ri ma dria ri mi aje ma azi ni.

Mi ma nze e’yo mi aje ma azi be mini peta angiri sende ayuza ma dria ’diyi peria. (E’yo O’beza 13:10) E’yo nzezu sende ayuza ma dria ri ni nga emi aza ko asianzu ma ta mbazu aje emini ma alea. Mi ma ne sende mini isu ri mini a’dule ku, te sende aku ni ru.—1 Timoteo 5:8.

AFA MINI ECO ’YERI:

• Emi otu sende ’ba alu alu ni eco ayu ’ba azi zikokoru ri ma ovu ngopi’ari

• Emi ma te e’yo ewaru ni efuzu raka e’yo nzezu sende ma dria ndo ku