Mi ka ovu urisi mi a’du ’ye ya?— Mi eco nzu mi andri vu kaniku mi ati vu azakoma isuzu.Te agu azi ecopi mi aza kopi ra ni vini ci. Eri okporu tu aga ’ba dria ra. Mi ni eri ra ya?— Ee, eri Yehova Mungu i. Ama ma oniki nga e’yo karile azi oderu Biblia ma alea Daudi ma dria. Ni ndra ra kini Yehova ni nga sawa driasi i ma aza ko ra, ani ’ye ni ndra urisi aluani ku.

Ndra e’dozu sawa Daudi ni ovuzu odekua ru risi, eri ma tipika imbaki ndra eri Yehova ni lezu. Imbata ’di ko ndra Daudi ma aza ovuzu uri koko ka tro dri fu e’yo ewaru be ra ti. Ni ndra ra Yehova ni ima agyi ni dika Eri nga ima aza ko ra. O’du azini alu Daudi ni kabilo oce ria, kami amboru ni nga kabilo bi nyazaru! Mi ni Daudi ’yo a’du afa ni’ari ra ya? Nga kami nderi dro dika ’di eri ima ngulupi si! ’Da ma vutia nguru emu vini kabilo bi, Daudi ’di vini eri te! Mini ega risi a’di ko ndra Daudi ma aza ni ya?— Adaru, Yehova i.

Sawa azi nduni ni ma alea, Daudi e’da vini i ma uri yo ri ra. O’du azini alu ’ba Israelini ’diyi mu ndra a’di ’di ’ba Filisitia ’diyi pie. Asikari azi alu ’ba Filisitia ’diyini ni ndra izu azini ambo! Eri ma ru ndra Goliato i. Agu izu azini ambo ’di nga ndra inzamatara nze asikari Israelini ’diyi ma rua azini Yehova ma rua. Nga di asikari Israelini ’diyi omve emuzu a’di ’dizu i be. Te asikari Israelini dria ngaki eca urisi a’di ’dizu eri be. Daudi ka mu e’yo ’diri eri ’bo, ’yo Goliato ma tia kini: ’Ma mu a’di ’di mi be! Yehova ni nga ma aza ko, ma nga mi nde ra!’ Mini ega risi Daudi ma uri ndra yo ya?— Ee, eri ma uri ndra yo. Mi le di e’yo ’yepiru vuti vuti ru ri ni ra ya?

Daudi nga baka oni ’bezu ri ’du oni rua onzokonzo towi be, coti ko dri mu a’di ’dizu agu izu amboru ’di be. Goliato ka mu mva werea Daudi ni ne ’bo, e’do gu Daudi si! Te Daudi nga ’yo eri ma tia dika: ‘Mi emu ma vu sei be, te ma mani mu mivu ru Yehova ni risi!’ Nga di oni  ’ba baka oni ’bezu ri ma alea, nzu Goliato vu enyia, dika nga eri ’be oni si. Oni nga ri eri ma andretia! Agu ambo ’di ’nga e’de vaa kai! Uri nga di asikari Filisitia ’diyi bi dria dria, coti ceki yi ongua apaki te. Mva oderu Daudi le ’di eco agu izu azini ambo ’diri ’di ngoni ngoni?— Yehova ko eri ma aza ni, azini Yehova ma okpo nde agu izu dika ambo ’di dri te!

E’yo mini eco oni engazu Daudi vu ri ngoni?— Yehova ma okpo aga ’ba dria dri ra. Eri vini mi agyi ni. ’Dini sawa azini si mi ka eca urisi, le mi egara kini Yehova eco mi aza ko ecazu uri kokoru ra!