Kolimbola Mibeko 3:1-29
3 “Na nsima, tobalukaki mpe tomataki na nzela ya Bashane. Bongo Oge+ mokonzi ya Bashane abimaki, ye ná bato na ye nyonso, mpo na kokutana na biso na etumba, na Edrei.+
2 Na yango, Yehova alobaki na ngai ete: ‘Kobanga ye te,+ mpo nakopesa mpenza ye ná bato na ye nyonso mpe mokili na ye na lobɔkɔ na yo; mpe osengeli kosala ye kaka ndenge osalaki Sihone+ mokonzi ya Baamore, oyo azalaki kofanda na Heshibone.’
3 Na yango, Yehova Nzambe na biso apesaki mpe na lobɔkɔ na biso Oge mokonzi ya Bashane mpe bato na ye nyonso, mpe tobɛtaki ye kino moto na ye ata moko te atikalaki na bomoi.+
4 Mpe tozwaki bingumba na ye nyonso na ntango yango. Ezali na sité ata moko te oyo tobɔtɔlaki bango te, bingumba ntuku motoba (60),+ etúká mobimba ya Argobe,+ bokonzi ya Oge, na Bashane.+
5 Nyonso wana ezalaki bingumba oyo ebatelami makasi na bifelo milai, baporte mpe bikangiseli, bakisa mpe basité mingi ya mike oyo ezangi bifelo.
6 Nzokande, tobebisaki yango,+ kaka ndenge tosalaki Sihone mokonzi ya Heshibone, na ndenge tobebisaki engumba mokomoko, mibali, basi mpe bana mike.+
7 Mpe banyama nyonso ya mboka mpe biloko oyo etikalaki na bingumba yango, topunzaki yango mpo na biso.+
8 “Mpe na ntango yango, tozwaki mokili na lobɔkɔ ya bakonzi mibale ya Baamore+ oyo bazalaki na etúká ya Yordani, banda na lobwaku ya mokɛli ya Arnone+ tii na Ngomba Heremone;+
9 (Basidone bazalaki kobenga Heremone Sirione,+ mpe Baamore bazalaki kobenga yango Senire,)+
10 bingumba nyonso ya ngomba patatalu, ná Gileade mobimba mpe Bashane mobimba tii na Saleka+ mpe Edrei,+ bingumba ya bokonzi ya Oge, na Bashane.
11 Mpo, na Barefaime+ oyo batikalaki, kaka Oge mokonzi ya Bashane nde atikalaki. Talá! Sanduku ya kokunda ye ezalaki sanduku ya ebende. Ezali na Raba+ ya bana ya Amone, boye te? Bolai na yango mapeko libwa, mpe bonene na yango mapeko minei, na lipeko ya moto.
12 Mpe na ntango yango, tozwaki mokili yango; longwa na Aroere,+ oyo ezali pene na lobwaku ya mokɛli ya Arnone, mpe etúká ya ngombangomba ya Gileade kabolá na mibale, mpe bingumba na yango, napesi yango Barubene mpe Bagade.+
13 Mpe ndambo oyo etikalaki ya Gileade+ mpe Bashane+ mobimba ya bokonzi ya Oge, napesi yango na ndambo moko ya libota ya Manase. Etúká mobimba ya Argobe+ ya Bashane mobimba, yango ebengami mokili ya Barefaime,+ boye te?
14 “Yaire+ mwana ya Manase azwaki etúká mobimba ya Argobe+ tii na ndelo ya Bageshure+ mpe ya Bamaakate,+ mpe abengaki bamboka mike yango ya Bashane na nkombo na ye moko, Havote-yaire,+ tii na mokolo ya lelo.
15 Mpe Makire,+ napesi ye Gileade.+
16 Mpe Barubene+ ná Bagade, napesaki bango banda na Gileade+ tii na lobwaku ya mokɛli ya Arnone, katikati ya lobwaku ya mokɛli nde ndelo, mpe tii na Yaboke, lobwaku ya mokɛli oyo ezali ndelo ya bana ya Amone;+
17 ná Araba ná Yordani mpe ndelo na yango, banda na Kinerete+ tii na mbu ya Araba, Mbu ya Mungwa,+ esika mopanzi ya Pisga+ ekiti, na nse, epai moi ebimaka.
18 “Bongo na ntango yango, napesaki bino mitindo ete: ‘Yehova Nzambe na bino apesi bino mokili oyo mpo bózwa yango. Bino, bilombe mibali nyonso, bokokatisa, bomibongisi ná bibundeli na bino, liboso ya bandeko na bino, bana ya Yisraele.+
19 Kaka basi na bino ná bana na bino ya mike mpe bibwɛlɛ na bino (nayebi malamu ete bozali na bibwɛlɛ mingi) bakotikala kofanda na bingumba na bino oyo napesi bino,+
20 kino Yehova akopesa bandeko na bino bopemi, ndenge apesi bino, mpe kino bango mpe bakozwa mokili oyo Yehova Nzambe na bino azali kopesa bango na ngámbo ya Yordani; nsima na yango nde bosengeli kozonga, moto na moto na esika na ye oyo napesi bino.’+
21 “Mpe na ntango yango, napesaki Yosua+ mitindo ete: ‘Miso na yo ezali komona nyonso oyo Yehova Nzambe na bino asalaki bakonzi mibale yango. Ndenge yango nde Yehova akosala makonzi nyonso epai ozali kokatisa.+
22 Bosengeli kobanga bango te, mpo Yehova Nzambe na bino Ye nde azali kobundela bino.’+
23 “Mpe na ntango yango, nabondelaki Yehova amonisela ngai boboto na maloba oyo:
24 ‘Ee Yehova Nkolo Mokonzi-Oyo-Aleki-Nyonso, yo moko obandi komonisa mosaleli na yo bonene+ na yo mpe lobɔkɔ na yo ya nguya,+ mpo, na likoló to na mabele, nani azali nzambe oyo asalaka misala lokola ya yo mpe makambo ya nguya lokola ya yo?+
25 Nabondeli yo, tiká nakatisa mpe namona mokili malamu+ oyo ezali na ngámbo ya Yordani, etúká ya ngombangomba+ oyo ya malamu mpe Libá.’+
26 Mpe Yehova azalaki kaka kosilikela ngai makasi mpo na bino+ mpe ayokelaki ngai te; kasi Yehova alobaki na ngai ete: ‘Suká wana! Koloba na ngai lisusu ata moke te likambo oyo.
27 Matá na nsɔngɛ ya Pisga+ mpe tombolá miso na yo na wɛsti mpe na nɔrdi mpe na sudi mpe na ɛsti mpe moná na miso na yo moko, mpo okokatisa Yordani oyo te.+
28 Mpe pesá Yosua mokumba+ mpe yikisá ye mpiko mpe lendisá ye, mpamba te ye nde akokatisa+ liboso ya bato oyo mpe ye nde akosala ete bázwa lokola libula mokili oyo okomona.’+
29 Ntango nyonso wana, tozalaki kofanda na lobwaku oyo etalani na Bete-peore.+
