Mokanda ya liboso ya Samwele 1:1-28
1 Ezalaki na moto moko na Ramataime-zofime,*+ na etúká ya ngombangomba ya Efraime,+ nkombo na ye Elekana.+ Azalaki mwana ya Yerohame, mwana ya Elihu, mwana ya Tohu, mwana ya Zufe; mobali yango azalaki Moefraime.*
2 Azalaki na basi mibale: moko nkombo na ye Hana, mpe mosusu nkombo na ye Penina. Penina azalaki na bana, kasi Hana azalaki na bana te.
3 Mbula na mbula, mobali yango azalaki kotika engumba na ye mpe komata na Shilo+ mpo na kosambela* Yehova ya mampinga mpe kopesa ye mbeka. Kuna nde esika Hofini ná Finehase,+ bana mibali mibale ya Eli, bazalaki banganga-nzambe ya Yehova.+
4 Mokolo moko, ntango Elekana azalaki kopesa mbeka, apesaki mwasi na ye Penina mpe bana na ye nyonso ya mibali mpe ya basi biteni mingi,+
5 kasi apesaki Hana eteni oyo eleki malamu mpo azalaki kolinga Hana mingi; kasi Yehova apesaki ye te likoki ya kobota bana.*
6 Lisusu, mbanda na ye Penina azalaki kotyola ye mingi mpo na koyokisa ye nkanda, mpo Yehova apesaki ye te likoki ya kobota bana.
7 Azalaki kosala ye bongo mbula na mbula. Mbala nyonso oyo Hana azalaki kokende na ndako* ya Yehova,+ mbanda na ye azalaki kotyola ye mingi mpenza; na yango Hana azalaki kolela mpe koboya kolya.
8 Kasi mobali na ye Elekana alobaki na ye: “Hana, mpo na nini ozali kolela, mpe mpo na nini ozali kolya te? Mpo na nini ozali mawamawa boye?* Epai na yo, ngai naleki bana mibali zomi te?”
9 Na nsima, ntango basilisaki kolya mpe komɛla na Shilo, Hana atɛlɛmaki. Na ntango yango, nganga-nzambe Eli afandaki na kiti, pene na ekɔtelo ya tempelo*+ ya Yehova.
10 Hana ayokaki mpasi mingi na motema,* bongo abandaki kobondela Yehova+ mpe kolela mingi mpenza.
11 Na yango, asalaki elako oyo: “Ee Yehova ya mampinga, soki otali mpenza mpasi na ngai mosaleli na yo, mpe soki okanisi ngai mpe obosani ngai mosaleli na yo te, mpe opesi ngai mosaleli na yo mwana ya mobali,+ nakopesa ye epai na yo Yehova mikolo nyonso ya bomoi na ye, mpe razware ekoleka na motó na ye te.”+
12 Wana azalaki kobondela ntango molai liboso ya Yehova, Eli azalaki kotala monɔkɔ na ye.
13 Hana azalaki koloba na motema, kaka mbɛbu na ye nde ezalaki koningana, kasi mongongo na ye ezalaki koyokana te. Yango wana Eli akanisaki ete alangwe.
14 Eli alobaki na ye boye: “Okolangwa boye tii ntango nini? Tiká komɛla vinyo.”
15 Na yango Hana ayanolaki: “Te, nkolo na ngai! Nazali mwasi oyo atungisami mingi;* namɛli vinyo te, namɛli mpe masanga oyo elangwisaka te, nazali nde kosopa mitungisi na ngai liboso ya Yehova.+
16 Kozwa mosaleli na yo te lokola mwasi moko ya mpamba. Soki nazali koloba tii sikoyo, ezali mpo bampasi mpe mitungisi elekeli ngai.”
17 Na yango Eli azongisaki: “Kende na kimya, mpe tiká Nzambe ya Yisraele apesa yo oyo osɛngi ye.”+
18 Mpe Hana alobaki: “Tiká mosaleli na yo akoba kondimama na miso na yo.” Bongo mwasi yango asimbaki nzela mpe akendaki; alyaki, mpe elongi na ye ezalaki lisusu na mawa te.
19 Elekana ná libota na ye balamukaki ntɔngɔntɔngɔ mpe bakendaki kogumbama liboso ya Yehova, na nsima bazongaki na ndako na bango na Rama.+ Elekana asangisaki nzoto na mwasi na ye Hana, mpe Yehova atyelaki Hana likebi.*+
20 Mbula mobimba ekokaki te,* Hana azwaki zemi mpe abotaki mwana mobali; apesaki ye nkombo+ Samwele,* mpo alobaki: “Nasɛngaki ye epai ya Yehova.”
21 Na nsima Elekana akendaki elongo na bato ya ndako na ye nyonso mpo na kopesa Yehova mbeka ya mbula na mbula,+ mpe likabo mpo na elako.
22 Kasi Hana akendaki te,+ mpo alobaki na mobali na ye: “Ntango kaka mwana akolongwa na mabɛlɛ,* nakomema ye na ndako* ya Yehova mpo asengeli kofanda kuna mpo na libela.”+
23 Na yango, mobali na ye Elekana alobaki na ye: “Salá oyo ezali malamu na miso na yo. Tikalá na ndako tii ntango okolongola ye na mabɛlɛ. Tiká Yehova akokisa likambo oyo olobi.” Bongo mwasi yango atikalaki na ndako mpe akobaki komɛlisa mwana na ye tii ntango mwana yango alongwaki na mabɛlɛ.
24 Ntango kaka Hana alongolaki mwana yango na mabɛlɛ,* amataki elongo na ye na Shilo, ná ngɔmbɛ-mobali ya mbula misato, efa* moko ya farini, ná elokó moko monene ya vinyo.+ Akendaki elongo na mwana yango ya mobali na ndako ya Yehova na Shilo.+
25 Na nsima, babomaki ngɔmbɛ-mobali yango mpe bamemaki mwana yango ya mobali epai ya Eli.
26 Na yango, Hana alobaki: “Limbisá ngai, nkolo na ngai! Lokola ozali solo na bomoi,* nkolo na ngai, ngai nazali mwasi oyo atɛlɛmaki pene na yo na esika oyo mpo na kobondela Yehova.+
27 Nazalaki kobondela nde mpo na kozwa mwana oyo, mpe Yehova ayokaki libondeli na ngai mpe apesaki ngai oyo nasɛngaki ye.+
28 Yango wana, ngai mpe, nadefisi ye Yehova. Mikolo nyonso ya bomoi na ye, akozala moto oyo badefisi Yehova.”
Mpe agumbamaki* kuna liboso ya Yehova.
Maloba na nse
^ To, “ya Rama, moto ya Zofime.”
^ To, “kofukamela.”
^ Lil., “akangaki libumu na ye.”
^ Elingi koloba, tabernakle.
^ To, “Mpo na nini motema na yo ezali koyoka mpasi?”
^ Elingi koloba, tabernakle.
^ To, “Molimo ya Hana ekómaki bololo.”
^ To, “atungisami na elimo.”
^ Lil., “akanisaki ye.”
^ To mbala mosusu, “Na ntango oyo esengeli.”
^ Elimboli, “nkombo ya Nzambe.”
^ Lil., “akomonana liboso.”
^ To, “akokilisama mabɛlɛ.”
^ To, “akilisaki mwana yango mabɛlɛ.”
^ To, “lokola molimo na yo ezali na bomoi.”
^ Emonani ete ezali Elekana.
