Hosea 13:1-16
13 “Ntango Efraime azalaki koloba, bato bazalaki kolɛnga;Azalaki na lokumu na Yisraele.+
Kasi akómaki na ngambo mpo na losambo ya Baala+ mpe akufaki.
2 Sikoyo bazali kobakisa masumu na bango,Mpe basali bikeko ya ebende* na palata na bango.+Babimisi mayele mpo na kosala bikeko, nyonso mosala ya bato ya misala ya mabɔkɔ.
Bazali koloba na bango: ‘Bato oyo bazali kopesa bambeka bápesa bana-ngɔmbɛ lipwɛpwɛ.’*+
3 Yango wana, bakokóma lokola mapata ya ntɔngɔ,Lokola mamwɛ oyo elimwaka na ntɔngɔ mpenza,Lokola mposo ya blé na esika ya kotutatuta mbuma oyo ememami na mopɛpɛ makasi,Mpe lokola milinga oyo ezali kobima na lidusu ya nsamba.
4 Kasi ngai nazali Yehova Nzambe na yo banda na mokili ya Ezipito;+Oyebaki Nzambe mosusu te kaka ngai,Mpe longola ngai mobikisi azali te.+
5 Nayebaki yo na esobe,+ na mokili ya kokauka.
6 Batondaki na bisika na bango ya koleisa bibwɛlɛ matiti,+Batondaki mpe mitema na bango ekómaki na lolendo.
Na yango babosanaki ngai.+
7 Nakokóma epai na bango lokola mwana-nkɔsi,+Lokola nkoi oyo ebombani pene na nzela.
8 Nakobimela bango lokola urse oyo ebungisi bana na yango,Mpe nakopasola ntolo na bango.*
Nakolya bango kuna lokola nkɔsi;Nyama moko ya zamba ekopasola bango mikemike.
9 Ekobebisa yo, Ee Yisraele,Mpo obalukeli ngai, obalukeli mosungi na yo.
10 Bongo, wapi mokonzi na yo, mpo abikisa yo na bingumba na yo nyonso,+Mpe bayangeli* na yo, oyo mpo na bango olobaki,‘Pesá ngai mokonzi mpe bankumu’?+
11 Napesaki bino mokonzi na nkanda na ngai,+Mpe na nkanda na ngai makasi nakolongola ye.+
12 Libunga ya Efraime ezingami;*Lisumu na ye ebombami.
13 Akonyokwama lokola mwasi oyo azali kobota.
Kasi azali mwana oyo azangi bwanya;Ntango ya kobotama ekoki, kasi azali kobima te.
14 Nakosikola bango na nguya ya Nkunda.*Nakobikisa bango na liwa.+
Wapi bitubeli na yo,* Ee Liwa?+
Wapi nguya na yo ya kobebisa, Ee Nkunda?+
Nakoyoka lisusu mawa te.
15 Ata soki azali kobota mingi na kati ya matiti ya ebale,Mopɛpɛ moko ya ɛsti ekoya, mopɛpɛ ya Yehova,Ezali kouta na mokili ekauká, mpo na kokaukisa libulu na ye ya mai mpe kosilisa mai ya liziba na ye.
Oyo wana akopunza biloko nyonso ya motuya oyo ezali na esika ya kobomba biloko ya motuya.+
16 Samaria akomema ngambo,+ mpo atombokeli Nzambe na ye.+
Bakobomama na mopanga,+Bana na bango bakokatama mikemike,Mpe basi na bango ya zemi bakopasolama mabumu.”
Maloba na nse
^ To, “ya ebende oyo enyangwisami.”
^ To, “bizi.”
^ Lil., “mwa eloko oyo ezingi motema na bango.”
^ Lil., “basambisi.”
^ To, “ebatelami.”
^ To, “Sheole,” elingi koloba, nkunda ya bato nyonso. Talá Ndimbola ya maloba.
^ To, “nguya na yo ya kopesa mpasi.”
