Nzembo 35:1-28
Loyembo ya Davidi.
35 Ee Yehova, sambá likambo na ngai na baoyo bazali kotɛmɛla ngai;+Bundá na baoyo bazali kobundisa ngai.+
2 Simbá nguba na yo ya moke* mpe nguba na yo ya monene,+Mpe tɛlɛmá osamba mpo na ngai.+
3 Tombolá likɔnga ná epasola na yo ya etumba* mpo na kobundisa baoyo bazali kolanda ngai.+
Lobá na ngai* ete: “Ngai nazali lobiko na yo.”+
4 Bato oyo bazali koluka koboma* ngai báyoka nsɔni mpe básambwa.+
Bato oyo bazali kokana koboma ngai bázonga nsima mpe báyoka nsɔni.
5 Bákóma lokola mposo ya blé na mopɛpɛ;Anzelu ya Yehova abengana bango.+
6 Nzela na bango ekóma molili mpe mosɛlu,Wana anzelu ya Yehova azali kolanda bango.
7 Mpo kaka mpamba, babombi monyama mpo na kotyela ngai motambo;Kaka mpamba, batimoli libulu mpo na ngai.
8 Libebi ekwela bango kozanga ete báyeba,Monyama oyo babombaki ekanga bango;Bákwea na kati na yango mpe bákufa.+
9 Kasi nakosepela na Yehova;Nakozala na esengo na misala ya lobiko na ye.
10 Mikuwa na ngai nyonso ekoloba ete:
“Ee Yehova, nani azali lokola yo?
Obikisaka moto ya mpasi na mabɔkɔ ya baoyo baleki ye na makasi,+Moto ya mpasi mpe mobola na mabɔkɔ ya baoyo bazali koyiba ye.”+
11 Batatoli ya lokuta bayei,+Mpe bazali kotuna ngai makambo oyo nayebi te.
12 Bazali kozongisela ngai mabe mpo na malamu,+Yango esali ete nayoka mawa makasi.
13 Kasi ntango bakómaki kobɛla, nalataki ngɔtɔ;*Namiyokisaki mpasi na kokila bilei,Mpe ntango libondeli na ngai ezalaki kozonga kozanga eyano,*
14 Nazalaki kotambola epai na epai na kolela, lokola nde moninga to ndeko na ngai akufi,Nagumbamaki na mawa lokola moto azali kolela ebembe ya mama na ye.
15 Kasi ntango nabulunganaki, basepelaki mpe bayanganaki;Bayanganaki na esika ya kobombana mpo na kobɛta ngai;Bapasolaki ngai bitenibiteni mpe bafandaki nyɛɛ te.
16 Bato oyo babangaka Nzambe te bazali koyina ngai nakotyola mpenza,*Bazali kolyela ngai mino.+
17 Ee Yehova, tii ntango nini okotala likambo yango?+
Bikisá ngai mpo báboma ngai te,+Bikisá bomoi na ngai ya motuya* na bana-nkɔsi.*+
18 Bongo, nakokumisa yo na kati ya lisangá monene;+Nakosanzola yo na kati ya bato ebele.
19 Kotika te ete baoyo bazali banguna na ngai kaka mpamba básepela na mpasi na ngai;Kotika te ete baoyo bazali koyina ngai kaka mpamba+ báfinana liso na makanisi ya mabe.+
20 Mpo bazali koloba makambo ya kimya te,Kasi bazali kobongisa nde makambo ya lokuta mpo na kotɛmɛla bato ya kimya na mabele.+
21 Bazali kofungola monɔkɔ polele mpo na kofunda ngai,Balobi: “Aha! Aha! Miso na biso emoni yango.”
22 Ee Yehova, omoni yango. Kofanda nyɛɛ te.+
Ee Yehova, kozala mosika na ngai te.+
23 Lamuká mpe tɛlɛmá osamba mpo na ngai,Yehova, Nzambe na ngai, kɔtelá ngai na likambo oyo nazali kosamba.
24 Ee Yehova Nzambe na ngai, sambisá ngai na kolanda bosembo na yo,+Kotika te ete básepela na mpasi na ngai.
25 Báloba ata moke te na motema na bango ete: “Aha! Tozwi oyo tolingaki!”*
Báloba ata moke te: “Tomɛli ye.”+
26 Bango nyonso báyoka nsɔni mpe básambwaBaoyo bazali kosepela na mpasi na ngai.
Baoyo bazali komitombola bálata nsɔni mpe básambwa.
27 Kasi baoyo basepelaka na bosembo* na ngai báganga na esengo;Báloba ntango nyonso ete:
“Yehova akumisama, ye oyo asepelaka na kimya ya mosaleli na ye.”+
28 Bongo lolemo na ngai ekolobela* bosembo na yo+Mpe ekosanzola yo mokolo mobimba.+
Maloba na nse
^ Nguba ya moke, yango ezalaki kosalelama mbala mingi na babwaki mbanzi.
^ To, “sóka na yo ya mitó mibale.”
^ To, “na molimo.”
^ To, “koluka molimo na.”
^ Talá Ndimbola ya maloba.
^ To, “kozonga na ntolo na ngai.”
^ To mbala mosusu, “kosɛka mpo na gato.”
^ Lil., “bomoi na ngai kaka moko,” azalaki kolobela molimo na ye, to bomoi.
^ To, “bana-nkɔsi oyo nkingo etondi na nsuki.”
^ To, “Ah! molimo na biso.”
^ To, “boyengebene.” Talá Ndimbola ya maloba.
^ To, “ekomanyola na.”
