Nzembo 6:1-10
Epai ya mokambi ya nzembo; eyembamaka elongo na bibɛtɛlo ya bansinga oyo ebongisami mpo ekokana na lolaka ya Sheminite.* Mondule ya Davidi.
6 Ee Yehova, kopamela ngai te na nkanda na yo,Mpe kosembola ngai te na nkanda na yo ya makasi.+
2 Moniselá ngai boboto,* Ee Yehova, mpo makasi na ngai ezali kosila.
Bikisá ngai, Ee Yehova,+ mpo mikuwa na ngai ezali kolɛnga.
3 Ɛɛ, nabulungani* mingi mpenza,+Mpe nazali kotuna yo, Ee Yehova: ekoumela tii ntango nini?+
4 Zongá, Ee Yehova, mpe bikisá ngai;*+Bikisá ngai mpo na bolingo na yo ya sembo.+
5 Mpo na kati ya liwa batángaka* nkombo na yo te;Na kati ya Nkunda,* nani akosanzola yo?+
6 Nalɛmbi na kolelalela* na ngai;+Butu nyonso nazali kopɔlisa mbeto na ngai na mai ya miso;Nazali kotondisa kiti na ngai ya mpɔngi na mai ya miso.+
7 Liso na ngai elɛmbi mpo na mawa na ngai;+Elɛmbi* mpo na baoyo nyonso bazali konyokola ngai.
8 Bólongwa liboso na ngai, bino nyonso baoyo bosalaka makambo ya mabe,Mpo Yehova akoyoka mongongo ya kolela na ngai.+
9 Yehova akoyoka lilɔmbɔ na ngai mpo na koluka ete andima ngai;+Yehova akondima libondeli na ngai.
10 Banguna na ngai nyonso bakoyoka nsɔni mpe bakobulungana;Bakozonga nsima, na mbala moko bakoyoka nsɔni.+
Maloba na nse
^ Talá Ndimbola ya maloba.
^ To, “motema mawa.”
^ To, “molimo na ngai ebulungani.”
^ To, “molimo na ngai.”
^ To, “bakanisaka.”
^ To, “Sheole,” elingi koloba, nkunda ya bato nyonso. Talá Ndimbola ya maloba.
^ To, “kokimela.”
^ To, “Enuni.”
