Nzembo 7:1-17
-
Yehova azali Mosambisi ya sembo
-
“Sambisá ngai, Ee Yehova” (8)
-
Loyembo ya mawa* oyo Davidi ayembelaki Yehova mpo na maloba ya Kushi Mobenyamina.
7 Ee Yehova Nzambe na ngai, nakimi epai na yo.+
Longolá ngai na mabɔkɔ ya baoyo nyonso bazali konyokola ngai mpe bikisá ngai,+
2 Noki te bakopasola ngai bitenibiteni ndenge nkɔsi epasolaka,+Mpe bámema ngai wana moto ya kobikisa ngai azali te.
3 Ee Yehova Nzambe na ngai, soki nasali mbeba,Soki nasali likambo oyo ezangi bosembo,
4 Soki nasali mabe na moto oyo asaleli ngai bolamu,+To soki napunzi monguna na ngai kozanga ntina,*
5 Boye, tiká monguna alanda mpe azwa ngai;*Tiká ete azwa ngai mpe anyata ngai* tii na mabele mpenzaMpe abebisa nkembo na ngai na putulu. (Sela)
6 Tɛlɛmá na nkanda na yo, Ee Yehova;Tɛmɛlá nkanda makasi ya banguna na ngai,+Lamuká mpo na ngai mpe pesá mitindo mpo likambo ekatama na bosembo.+
7 Tiká bikólo ezinga yo,Mpe okotɛmɛla yango uta na likoló.
8 Yehova akokatela bato ya bikólo etumbu.+
Sambisá ngai, Ee Yehova, na kolanda bosembo* na ngaiMpe na kolanda ezaleli na ngai ya kozanga mbeba.+
9 Nabondeli yo, tyá nsuka na misala ya bato mabe.
Kasi bikisá bato ya sembo,+Mpo ozali Nzambe ya sembo+ oyo atalatalaka mitema+ mpe mayoki oyo ebombaná mpenza na kati.*+
10 Nzambe azali nguba na ngai,+ Mobikisi ya baoyo bazali na motema sembo.+
11 Nzambe azali Mosambisi ya sembo,+Mpe Nzambe asakolaka bitumbu* na ye mikolo nyonso.
12 Soki moto abongoli motema te,+ Nzambe apelisaka mopanga na ye;+Agumbaka litimbo na Ye, mpe abongisaka yango mpo na kobwaka.+
13 Abongisaka bibundeli na ye oyo ebomaka;Abongisaka makula na ye oyo ezali kopela.+
14 Talá moto oyo azwi zemi ya makambo oyo ezali mabe;Amemi zemi ya mpasi mpe aboti lokuta.+
15 Atimoli libulu, mpe akómisi yango mozindo,Kasi akwei na libulu yango oyo ye moko asalaki.+
16 Mpasi oyo abimisi ekozonga na motó na ye moko;+Mobulu na ye moko ekokitela motó na ye.
17 Nakosanzola Yehova mpo na bosembo na ye,+Nakoyemba mpo na kosanzola*+ nkombo ya Yehova, Oyo-Aleki-Likoló.+
Maloba na nse
^ To, “Loyembo ya kolela.”
^ To mbala mosusu, “nabikisaki kozanga ntina moto oyo azalaki kotɛmɛla ngai.”
^ To, “molimo na ngai.”
^ Lil., “bomoi na ngai.”
^ To, “boyengebene.” Talá Ndimbola ya maloba.
^ To, “amekaka mitema mpe bangɛi.”
^ To, “abimisaka makaneli.”
^ To, “Nakobɛta miziki mpo na.”
